每消滅一隻怪獸，我條女對波就大一個cup！: 9

啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊——

升cup戰衣嘅戰鬥力隨住我嘅聲量一路飆升。

每當力量增加50%，升cup戰衣嘅頭盔就會用英文從內部發出信號：

「Max Power：150%！」

「Max Power：200%！」





「Max Power：250%！」

「Max Power：300%！」

「Max Power：350%！」

「Max Power：400%！」

隨住力量上升，我身上嘅黑色鋼鐵戰衣散發出強大嘅氣場，關節之間嘅機械紋路快速流動住紅色嘅能量脈搏，並且不斷冒出一股股白色嘅熱氣。





啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊！！！！！！！！！！

我聲嘶力竭，用接近咆哮嘅方式大嗌，令到戰鬥力一口氣突破500%。

嗰隻巨型螳螂立即感受到威脅，佢動作迅速咁擰轉面，舉起巨大嘅手刀，從上而下向住我一刀劈落嚟。

喺我身邊受咗傷嘅梁sir為免受到波及，拿拿臨退後，行埋一邊暫避。

而我就寸步不移，挺起胸膛，直接用拳頭迎擊。





鏘！！！

我嘅拳頭同螳螂嘅刀鋒激烈碰撞，火花四射。

500%嘅戰鬥力令我擊出十萬噸重拳，直接將對方嘅手刀連同成隻手臂徹底粉碎。

呢一拳嘅威力連我自己都有啲估唔到。

但我更估唔到嘅係，其他升cup戰士見到隻螳螂斷咗一隻手，個個好似餓狗搶屎咁，爭住衝過去想搶「尾刀」。

如果梁sir唔係傷咗，我諗佢可能都會搶埋一份。

雖然佢地咁嘅舉動係有啲唔講武德，但亦都正正係因為咁，所以先反映出大家追求巨乳，不顧一切嘅決心。

可惜嘅係，佢地從開始到依家不停係咁嗌，一早就嗌到聲沙兼無力。





而且隻怪獸就算無咗一隻手都好，攻擊力依然好強。

佢直刀橫切，單手一招橫掃千軍，打冧曬想埋佢身嘅升cup戰士，跟住再使出全力攻擊我。

面對住來勢洶洶嘅敵人，呢個時候我留意到佢嘅額頭，隱約閃爍住紫色嘅光芒。

睇嚟粒紫石就喺嗰個位置。

「啊啊啊啊啊啊啊啊啊啊啊——」

為咗一口氣打低敵人，我再次大聲呼嗌，然而隻怪獸動作好快，眨下眼就已經殺到埋身。

佢鋒利嘅獨臂長刀猶如一道閃電，以迅雷之勢從高處劈落嚟。





今次我無同佢硬碰硬，而係快速側身避開。

巨大嘅刀刃打唔中我，只係打中我旁邊嘅石屎地。

地下「砰」一聲爆開，激起一堆泥石同沙塵。

佢呢下攻擊係就係好勁，但亦都因為佢用力過猛，所以搞到把手刀插咗入去地下，一時之間掹唔返出嚟。

我就趁呢個機會，雙腳踎低，谷盡全身嘅力氣，向上跳起。

一般人跳得最高頂盡都係跳到兩米，但我喺升cup戰衣加上500%戰鬥力嘅加持下，展現出驚人嘅彈跳力，好似一支火箭咁，直飛上天。

本來我諗住跳到同隻螳螂額頭平排嘅位置，然後一拳盅埋去，點不知跳起嘅高度遠遠超出咗我嘅預期。

我跳到過曬籠，一下子飛到差唔多成二十層樓咁高。





平時我連過山車都唔敢玩，家下跳到咁高，嚇到我忍唔住瘋狂尖叫，令分貝力再度飆升。

「嘩嘩嘩嘩嘩嘩嘩嘩嘩嘩嘩嘩啊啊啊啊啊啊啊啊啊啊啊啊啊啊嘩啊啊啊啊嘩啊啊啊啊啊啊啊啊嘩啊啊啊啊啊啊啊啊啊啊啊啊啊——」

「Max Power：600%！」

升cup戰衣嘅戰鬥力從500%直接突破到600%。

升到最高點之後，我又以幾乎同樣嘅速度高速向下墜，感覺仲刺激過玩跳樓機。

呢刻嘅我驚到心跳加速，失聲尖叫，但係驚還驚，我無忘記自己正身處喺戰鬥之中。

而且目標就在眼前，我緊緊握實拳頭，從高空向住螳螂嘅頭頂，急速俯衝落去。





同時間，對方卡喺地下嘅手刀已經掹返出嚟。

佢好快咁擰轉身想阻擋我嘅攻擊，好可惜都係慢咗一步。

當佢擰轉身嗰下，我已經去到佢頭頂，並且已經伸出拳頭，使出全力一擊。

急速下墜嘅衝力，加上600%嘅戰鬥力，我一拳就打穿咗對方倒三角形嘅頭頂。

嘭！！！

佢個頭當堂就好似爆仗咁成個爆開，一堆腦漿、汁液飛曬出嚟。

原本喺額頭裡面嗰粒奪目嘅紫石隨即暴露於空中。

之後隨住身體繼續急速向下墮，我順勢伸手捉住粒紫石，最後雙腳著陸，安全降落返到地面。

至於體形龐大嘅怪獸就爆頭倒地，氣絕身亡。

激烈嘅戰鬥亦都終於告一段落。