每消滅一隻怪獸，我條女對波就大一個cup！: 10

激烈嘅戰鬥過後，機場巴士站以及附近一帶滿目瘡痍，周圍都係一堆頹垣敗瓦。

救護車好快就到達現場，救護人員第一時間幫受傷嘅市民同升cup戰士處理傷口。

而啱先匿喺角落頭一路睇住我戰鬥，一路擔驚受怕嘅Yanny，就即刻衝埋嚟攬住我。

「朱大志你嚇死我啦！你係咪傻咗呀，無啦啦衝出去打怪獸，你知唔知頭先幾危險？」

「無事啦…我已經…咳…已經打贏咗隻怪獸。」啱先我嗌到拆天，搞到依家把聲變得又拆又沙。





「你快啲除低件盔甲，俾我睇下有無受傷？」

「我都想除低件甲，但我唔知點樣先可以解除變身。」

我望一望隔籬左右，然後問Yanny：「係呢，你有無見到啱先同我一齊嗰個爆炸頭阿伯？」

「我無留意喎，查實個阿伯係咩人嚟架？係咪就係佢唆擺你去同隻怪獸戰鬥？」

「咁又唔可以話係佢唆擺嘅，事實係我自己自願去戰鬥。」





我擘大手掌，展示手上粒紫石，同對方解釋：「嗰隻怪獸體內有一粒咁嘅嘢，呢粒嘢含有一種可以令人個胸變大嘅礦物元素，我之所以會去戰鬥，就係為咗呢粒石。只要有咗呢粒石，咁你個胸就會變大一個cup。」

「你就係因為咁，所以拎自己條命嚟較飛，咁樣會唔會太兒戲？」

「一啲都唔兒戲！對一個男人嚟講，追求巨乳係一件好嚴肅同好認真嘅事！」我用非常莊重嘅口吻回應對方。

Yanny望住我呢個咁認真嘅樣，一時間都唔知講咩好。

「呠呠！」





呢個時候，晴天博士揸住一架白色貨van，駛埋嚟我地身邊。

架貨van嘅車身印住「森立製藥」四個大字。

晴天博士行落車，見到我，第一句說話係：「恭喜曬！恭喜你成功擊敗隻怪獸，獲得紫石！」

「你嚟得啱啦，我正想搵你，你快啲教下我點樣解除變身？」

「好簡單啫，你擰下個變身手環就得架啦。」

我按照對方嘅說話，扭一扭手腕上嘅變身手環，果然唔使半秒就解除咗變身。

身上嘅裝甲褪去，Yanny好緊張咁望過嚟，睇下我有無邊度受傷。

晴天博士則行埋嚟攞走我手上粒紫石，然後拉開架貨van嘅車門。





喺車入面，原來擺放咗一部精密嘅科學儀器。驟眼望落去，佢嘅外形好似一部多合一功能打印機。

唔同嘅係，機器嘅頂部有好多粒掣，除此之外，喺中間位置有一個透明嘅凹槽。

晴天博士隨即好熟練咁操作部機器。

佢㩒咗幾下啲掣，打開底盤一個暗格，放咗粒紫石入去，跟住佢又打開另一邊嘅暗格，倒咗一啲粉狀嘅物質落去。

我完全睇唔明佢喺度做乜，淨係見到佢喺啲掣上面左㩒右㩒。

大約搞咗一分鐘左右，部機器發出「嘟嘟嘟」三下聲響，然後有一粒粉紅色藥丸，跌落中間透明嘅凹槽上。