每消滅一隻怪獸，我條女對波就大一個cup！: 13

Yanny望住自己個胸由A cup慢慢咁漲大到B cup，同樣係覺得好不可思議。

而我呢刻嘅心情就仿似喺一片荒蕪乾旱嘅沙漠中，突然見到一朵盛開嘅桃花，實在令人心曠神怡、春心蕩漾。

如果唔係隔籬有個晴天博士棟喺度，我諗我已經忍唔住揸咗落去。

Yanny拉開衫領，耷低頭𥄫一𥄫個心口，再隔住件衫摸一摸兩邊變大嘅乳房，經過幾次反覆確認，佢知道依家並唔係發夢，佢對波係實實在在咁大咗一個cup。

「好啦，獎勵就俾咗，之後再有怪物出現，我會透過變身手環通知所有升cup戰士，到時你自己留意下啦。」





晴天博士同我講完呢句說話，跟住就返上車，準備離開。

「喂！你係咪晴天博士！你咪走呀！我地個巴士站爛成咁，你快啲賠錢！」

呢個時候，有一班應該係機場派嚟嘅人，嬲爆爆咁衝過嚟搵晴天博士，仲大叫佢賠錢。

晴天博士諗都唔諗，第一時間踩恆油，拿拿聲揸車走人。

條友啱先都話間藥廠已經賠錢賠到破產，所以仲邊有錢賠，梗係快快脆鬆人。





家陣晴天博士走咗，機場嗰班人又追咗上去，喺我地隔籬左右都無人。

於是我就心思思，忍唔住想揸下Yanny對B cup 波，想feel下個手感。

只係呢個時候，耳邊忽然間聽到附近有一對男女喺度嘈交，仲嘈得幾大聲。

望過去，個男人仲好似係梁sir。

我唔知佢同緊咩人嗌交，淨係離遠見到佢身上紮住紗布同繃帶，所以諗住行過去，關心下佢嘅傷勢。





「…上次你又話好彩，今次又話係好彩，咁下次呢？唔通你次次都會咁好彩？如果下次你唔好彩嘅話，咁點算啊？」

「你放心喎，依家我只係需要再打敗多一隻怪物，咁你就可以變E cup，到時我就會收手架啦。」

「其實D同E都唔係差好遠啫，再大啲你隻手都揸唔曬架啦！」

「我就係要一隻手揸唔曬，我就係想要E奶！」

「唉！講極你都唔聽，我真係無你咁好氣！」

本來我見到佢地嗌緊交，都覺得有啲唔好意思行過去。

只不過梁sir睄到我，好有禮貌咁笑笑口，主動揮手同我打招呼：「喂！朱仔！」

既然佢都yap我過去，咁我都無謂怕尷尬，行過去同佢say hi。





「你個衰仔頭先好嘢喎，飛天一拳打爆咗隻怪獸個頭。」

「都係咁啱撞彩啫，係啦梁sir，你無嘢呀嘛？傷得重唔重？」

「無事，皮外傷嚟啫。今晚瞓返覺好嘅，聽日就好返架啦。」

「你無事就好啦。」

「嚟同你介紹，呢個係我未婚妻Judy，你隔籬呢位係？」梁sir主動向我介紹佢身邊嘅女伴。

「佢係我女朋友Yanny。」

「你叫佢阿sir，即係你係佢學生？」Judy問我。





「係呀，梁sir以前幫我補過習。」

「咁你細個嗰陣一定係俾佢教壞咗，無端端為咗心口嗰幾忽肉走去打怪獸，你同你阿sir一樣都係嫌命長…」

「Judy，你唔好喺人地面前講啲咁嘅嘢啦。」梁sir閘住佢。

「我都係講事實，唔啱聽咁我咪唔講囉！」Judy嬲爆爆咁轉身走人。

梁sir好唔好意思咁同我say sorry，連bye bye都嚟唔切講，就拿拿臨追上去氹佢未婚妻。

睇嚟Judy應該唔係好鍾意梁sir成日搵命搏，同怪獸戰鬥。