每消滅一隻怪獸，我條女對波就大一個cup！: 15

第二朝瞓醒，喉嚨仲係有啲痛。

起身行出客廳，打算斟杯水飲下，點知我見到茶几上面有個暖水壺，同埋有一包喉糖。

Yanny真係好貼心，佢驚我喉嚨唔舒服，返工前唔單止沖定一壺蜂蜜檸檬水喺度，兼且仲特登落街買埋喉糖俾我。

我刷完牙洗完面，飲一杯檸檬水，再啪粒喉糖，喉嚨總算舒服返少少。

望一望時間，依家係朝早九點半，Yanny去咗返工，得返我一個人喺屋企。





大家唔好誤會，我唔係無工返咬老軟，我只係在家工作。

我間公司係做digital marketing，平時俾我地啲員工一個禮拜三日work from home。

通常我就九點半起身，食個早餐，跟住打開部電腦check下email，如果無乜特別嘢就跟下啲project嘅進度，唔係好趕嘅話，咁我就會偷懶做自己嘢。

平時我多數會拎部Switch出嚟打下機，又或者開Netflix追下新番，不過今日我打算去屋苑會所個gym房舉下鐵操下嘢。

因為梁sir講過，升cup戰衣最基礎嘅力量，係嚟自變身者自身嘅體力、耐力同肌力。





咁即係話如果我操得fit啲，咁力量都會相對提升。

計落我都有幾年時間無操過嘢，讀大學嗰陣有段時間我好鍾意去gym房練嘢。

舉啞鈴、推胸、練背，樣樣嘢我都有玩下，仲操到自己幾大隻。

只係後來練練下覺得無乜癮，好快就無再繼續操落去，到出嚟做嘢之後就更加連運動都做少咗。

我嚟到gym room，先上跑步機跑返五公里，練返下啲體能同耐力，





坦白講，咁耐無做運動，家陣再做返，一定係唔容易適應同埋好辛苦。

我跑咗一陣已經就身水身汗，喘氣喘到好似缺氧咁款。

但係為咗增強力量，打敗更多怪獸，令Yanny對波變得更大，就算幾辛苦都好，我都會頂硬上。

「呼啊~呼啊~」

跑完步，我就拎起啞鈴舉重，練手臂嘅肌肉。

舉舉下，忽然間，手腕上嘅變身手環發出「啲啲啲」嘅聲音，同時投射出一個3D畫面，呈現出乎一個地圖，標示有怪獸出現。

而地圖嘅坐標係「黃金海岸」。

我二話不說，即刻衝出gym房，出街截的士。





我住嘅地方喺深井，呢度去黃金海岸，快嘅話，20分鐘內應該可以得去到。

喺街邊企咗一陣，好快我就截到的士。

上到車，我先send個message通知Yanny我準備去黃金海岸打怪獸，跟手再啪幾粒喉糖，潤一潤喉嚨，為陣間嘅作戰做好準備。

今次如果再成功打敗多隻怪獸，咁Yanny就會由B cup變C cup，淨係幻想下個畫面都已經扯扯地！

一路上個司機都算揸得快，我以為好快就到，殊不知架的士行到中途，喺青山公路突然遇上大塞車。

「司機大哥，前面咩事搞到塞車呀？」

「塞到咁樣，我諗前面九成係有人炒咗車。」





「唔係呀嘛！我趕時間喎！」

「咁都無計架，唔通你叫我飛過去咩！」

今次仆街啦！條車龍咁長，都唔知要塞到幾時！

以前睇幪面超人，次次當啲怪獸一出現，幪面超人都會好快咁趕到去現場，效率快到好似識得瞬間轉移咁。

事實證明日本嘅交通係好過香港，最起碼唔會成日塞車。

時間過咗十分鐘，架的士幾乎係完全無郁過。

成條路塞死曬，係得啲電單車可以喺啲嚹位度左穿右插，攝下攝下咁向前行。

我終於明白點解幪面超人係揸電單車，原來就係為咗塞車嗰陣都仲可以行到。





望住時間一分一秒咁流逝，我好心急，好想去打怪獸。

最後我實在等唔切，喺情急之下，我直接推開車門，決定用雙腳跑過去。