每消滅一隻怪獸，我條女對波就大一個cup！: 16

啱先無幾耐先喺gym房操完，家陣又咁樣跑法，都真係幾攞命。

但如果我唔盡快趕到現場，咁隻怪獸隨時會俾其他升cup戰士KO，到時我就攞唔到粒紫石。

「呼啊~呼啊~」

我跑到索曬氣，體力開始跟唔上，慢慢越跑越慢，最後跑下停下，用咗差唔多半個鐘先到達黃金海岸。

嚟到見到周圍都係戰鬥嘅痕跡，附近一帶嘅建築都有唔同程度嘅受損。





再行前少少，我見到市集大街嘅地下，有一隻巨型大烏龜瞓咗喺度。

隻龜個頭爆開咗，背脊後面嗰一個非常堅硬嘅龜殼亦都裂開咗，睇佢個樣都死得幾慘烈。

「你嚟遲咗喎，隻怪獸已經俾人隊冧咗。」晴天博士同我講。

「呢層唔使你講我自己都有眼睇，不過係邊個打敗咗隻烏龜？」

晴天博士望一望隔籬左右：「咦？頭先仲喺度架，咁快就走咗啦。」





我淨係見到周圍得一班流血受傷嘅升cup戰士，正喺度接受救護員嘅救治，睇唔到有邊個人揸住紫石。

當我再望遠啲，就留意到大約喺一百米外，有一對正徒步離開嘅男女。

個男人身材非常高大，比一般人高成個頭，起碼有185cm以上。

除此之外，佢個膊頭好橫，手臂勁粗勁大隻，一睇就知呢個人成身都係肌肉。

至於喺佢身邊嘅長髮女人，身高去到佢個膊頭，至少有175cm高，同樣都係擁有健美嘅身材。





雖然同佢地隔咗咁遠，而且淨係見到佢地兩個嘅背脊，但唔知點解，我喺佢地身上感受到一股非常強大嘅氣場。

唔知嗰兩人係咩人嚟嘅呢？

「唉頂！嚟遲咗！」梁sir呢個時候氣喘踹咁趕到。

「梁sir，乜你唔係有傷在身咩？仲以為你唔嚟添。」

「都話咗係皮外傷，你個衰仔唔係以為我傷咗，你就少咗個對手下話？」

「咁又唔係，反正無論有幾多個對手都好，我都一樣係會全力作戰。」

「本來我唔應該咁遲，但係你都知琴日我同我未婚妻嗌咗交架啦，咁今日我咪一大早去花店買扎花，親手送去佢嘅公司氹返佢，結果我喺港島嗰邊送完花先趕過嚟，所以先搞到咁遲。」

「哦~原來係咁~」