每消滅一隻怪獸，我條女對波就大一個cup！: 22

池塘入面有隻青蟹出現照計係好正常，問題係眼前呢隻蟹嘅體型，大到霸曬成個池塘。

佢嗰兩隻大蟹鉗又厚又結實，望落好似兩把巨大嘅較剪，感覺都幾得人驚。

但既然都一場嚟到，無理由空手而回。

我左手握拳，右手㩒一下變身掣，隨即戰甲披身，化身成為升cup戰士。

除咗我之外，在場其他人包括梁sir亦都紛紛變身戰鬥。





同之前一樣，一開始我唔急於進攻，先觀察一下對手。

相反，其他人就急不及待展開攻擊。

尤其係梁sir，對上兩次佢都嚟遲一步，錯失咗作戰嘅機會，今次難得及時嚟到，佢就梗係要將積壓多時嘅慾望同戰意，統統發洩出嚟。

「啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊！！！」

梁sir咆哮大嗌，一下子推高升cup戰衣嘅戰鬥力。





佢手上嘅合金劍散發出耀眼嘅光芒，估計佢嘅戰鬥力已經突破500%，甚至達到600%。

「啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊！！！我要揸E奶！！！怪獸你受死啦！！！」


梁sir飛身一躍，雙手揸住光芒四射嘅合金劍，跳起攻擊敵人。

鏘——

隻大青蟹避都唔避，直接用佢嘅巨鉗擋開。





梁sir把劍當堂斷開兩截，同時間佢成個人喺半空中彈開，咚一聲跌落池塘入面。

真係估唔到隻蟹身上嘅外殼竟然咁硬淨？！

一把鋒利嘅合金劍配上600%嘅戰鬥力劈落去，居然係把劍裂咗，隻大蟹鉗反而卻絲毫無損。

「啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊！！！」

梁sir喺魚塘中好快咁企返起身，雖然佢全身濕曬，但無被淋熄意志。佢一邊大嗌，一邊向前伸直雙手，對住隻蟹發射出離子炮。

Boom！！！

喺600%戰鬥力嘅加持下，離子炮射出嘅唔再係一撮光束，而係一股衝擊波。





從左右手射出嘅藍色衝擊波，猶如兩支穿雲破霧嘅長矛，向住怪獸直射過去。

隻大青蟹動作迅速咁交叉兩隻蟹鉗，形成防禦盾牌，抵擋猛烈嘅炮擊。

Boom！Boom！Boom！Boom！Boom！Boom！Boom！

梁sir對住敵人瘋狂猛轟：「啊啊啊啊啊啊啊啊啊啊啊！你隻臭蟹快啲去死啦！」

但好可惜，唔單止係合金劍，就連離子炮咁猛嘅火力，都一樣打唔穿隻蟹堅硬嘅外殼。