每消滅一隻怪獸，我條女對波就大一個cup！: 23

梁sir用盡力氣攻擊，卻完全傷唔到敵人半分。

咁嘅情況之下，若然要打敗隻大青蟹，睇嚟需要更強大嘅戰鬥力。

梁sir好快意識到呢一點，於是佢暫時停止攻擊，先行埋一邊抖一抖，順便啪幾粒喉糖，潤下個喉嚨。

其他升cup戰士就唔理咁多，大家各施各法，大叫大嗌，務求喺短時間之內突破更高嘅戰鬥力，打敗怪物。

而講到大嗌，最近我有特登上網研究點樣可以嗌得大聲啲。





結果發現原來要嗌得夠響，齋用喉嚨係唔夠，仲要識得用丹田。

「啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊！！！」

我學以致用，即場用丹田運氣，谷恆把聲嗌出嚟。

「啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊！！！」

感覺上呢樣嗌法，好似真係特別響，實際上亦都從升cup戰衣嘅戰鬥力反映到出嚟。





「Max Power：500%！」

「Max Power：550%！」

「Max Power：600%！」

「Max Power：650%！」

升cup戰衣嘅戰鬥力就好似牛市嘅股票指數，不斷突破新高，從之前嘅600%，一路飆升，直達去到800%。





呢一刻嘅我，全身感受到一股前所未有嘅力量。

本來我覺得仲未夠，諗住將戰鬥力增加到1000%，只不過把聲似乎已經到咗頂，再嗌落去，分貝力都係無進一步提升。

因此我就以一個800% Power嘅戰鬥姿態，衝過去攻擊隻大青蟹。

呢一刻手上揸住嘅合金劍，閃耀住比之前更奪目嘅光芒。

我高高跳起，對住隻蟹嘅頭頂，毫不留情一劍劈落去。

點不知，隻蟹擘開蟹鉗，單手一夾，用力夾住咗我把劍。

下一秒，成把劍哐一聲徹底粉碎。

之後隻蟹乘勝追擊，舉起另外一隻蟹鉗，好似拳擊手揮拳咁，一嘢盅埋嚟我個心口。





呢一下嘅重擊，打到我成個人飛起。

我不由自控咁喺空中轉個幾圈，然後背脊落地，狠狠咁撻落去一片草叢之中。

我個心口同背脊都好痛，喺地下典咗一陣先至企返起身，同時心諗：弊！唔通800%戰鬥力都唔足以對付隻蟹？

無可能！我唔信！

我咬實牙關，快步衝到隻嘢面前，左右開弓，從近距離發射出強勁嘅離子炮衝擊波。