每消滅一隻怪獸，我條女對波就大一個cup！: 24

BOOM！！！

聽聲以為搞掂，但事實係800%嘅戰鬥力，對於隻大青蟹嚟講，依然都係不痛不癢。

「啊啊啊啊啊啊啊啊啊啊啊啊啊啊——」

梁sir抖咗一陣，儲夠氣就再次出擊。

可惜無論係佢定係我，定抑或係在場其他嘅升cup戰士，就算我地用盡曬全力，使出所有渾身解數，卻始終無法打得低隻大青蟹。





我地幾十個人全部束手無策，個個嗌到把聲沙曬，體力亦都下降咗唔少。

至於隻怪物剛才一路只係防守，呢個時候突然開始反擊。

佢擘大兩隻蟹鉗，好似夾公仔，一左一右，動作迅速咁夾走兩個衝過去攻擊佢嘅升cup戰士。

咔啦咔啦……當隻蟹一施加壓力，蟹鉗上面嘅齒口位，就刺穿兩位升cup戰士身上嘅裝甲，發出一陣陣破裂聲。

雖則我地大家係競爭對手，但都唔想見到有人受傷甚至戰死，問題係，我地在場根本無一個人有能力對抗到隻怪物。





「救命啊！救命啊！」嗰兩個升cup戰士非常痛苦咁喺度求救。

我唔想見死不救，於是嘗試再用丹田運氣，希望能夠將戰鬥力提升到1000%。

「啊啊啊啊啊啊啊啊啊啊啊啊啊啊…」

殊不知喺同一時候，一把鏗鏘有力嘅聲音響徹成個南生圍。

「哼啊！！！！！！！！！！」





呢把聲係從好遠嘅地方傳過嚟，但佢嘅音量卻大到就連我地身邊嘅樹葉同野草都為之一震。

跟住過咗一秒，喺草地遠處嘅水平線上，出現咗一點金芒嘅亮光。

好快，一點光變成一團光。

之後佢越嚟越接近，原來呢一團並唔係光，而係一道超級強勁嘅衝擊波。

啱先我用800%戰鬥力射出嘅衝擊波，直徑大約只係一個籃球咁大，而當刻喺我地眼前所見到呢一道超強衝擊波，直徑係足足有一個瑜伽球咁大！

而且呢道衝擊波就猶如一支飛彈，貫穿成個南生圍，瞄準住隻蟹射過去。

BOOOOOOOOOOOOOOOM
！！！！！！！！！！！！！





衝擊波展示強大嘅破壞力，直接從後面射穿咗大青蟹背脊個蟹殼，再隊穿埋佢個心口。

之後力量並無消散，繼續一路貫穿，直線衝擊。

為免遭殃，我地成班升cup戰士拿拿臨向左右兩邊快速散開。

嗰股強大嘅力量係勁到你行慢一步，hi一hi都會出事。

最後嗰道衝擊波，射到去好遠一座山，直接炸到成個山腰爆開，要咁樣先至釋放曬所有嘅破壞力。

除此之外，南生圍一大片草地亦留低咗一條長達幾百米既凹痕。

一隻堅硬無比嘅大青蟹，估唔到喺一瞬間之內就變成一隻死蟹。

佢攤喺池塘上面，口吐白泡，兩隻蟹鉗鬆開咗，嗰兩個被夾住嘅升cup戰士亦因此而得救。





見到怪獸死咗，呢個時候，有幾個升cup戰士想衝埋去搶粒紫石。

我認得佢地就係上次偷襲我嗰幾條友。呢班人果然係鍾意做埋啲偷偷摸摸嘅嘢。

只但係，當佢地見到前面有個人行緊埋嚟，跟住立即就停低腳步，無一個人再敢行前。

喺一片青綠嘅草地上，有一個虎背熊腰嘅男人，拖住身材高挑嘅一個女人，慢慢咁行過嚟。

嗰個男人全身散發住一股強大嘅能量氣場，佢身上嘅升cup戰衣更閃爍住金黃色嘅光芒。

係，呢個人就係Z大俠。