每消滅一隻怪獸，我條女對波就大一個cup！: 45

天上嘅雨水不知不覺已經停咗，滴落嘅水珠就只有我地嘅眼淚。

除咗梁sir之外，喺今次嘅戰鬥中，一共有二十二個升cup戰士喪失生命。

經過晴天博士嘅確認，大猩猩連同佢體內粒紫石，徹底俾剛才Z大俠嘅超級無敵衝擊波消滅咗。

我地打生打死，到頭來居然無一個人得到紫石，真係諷刺。

救護車嚟到，將我地一班受傷嘅升cup戰士，包括我同Z大俠在內，送去醫院檢查。





照咗X光，醫生發現我心口其中一對肋骨有輕微骨裂，短時間內都會腫脹、疼痛。

至於Z大俠嘅情況就比我嚴重，佢唔單止隻手甩咗骹，而且仲有輕微內出血，需要留院觀察。

醫生開咗啲止痛藥同消腫嘅藥膏俾我返去搽。

好坦白講，呢一刻我肉體上嘅傷痛，遠遠比唔上內心嘅痛。

梁sir嘅死對我打擊真係好大。





仲記得最初變身戰鬥嘅時候，我曾經豪言壯語，深信自己為咗追求巨乳，可以將置生死於度外。

但當見到屍橫遍嘢、血流成河嘅景象，當望住自己熟悉嘅人，死喺自己面前，當死亡嘅距離同自己係咁近嘅時候，我好驚。

或者係我高估咗自己，因為恐懼，我無辦法好似梁sir同其他人咁，拼上性命為巨乳戰鬥。

我唔係一個真男人。

之後連續幾晚我都發噩夢，夢見嗰班俾大猩猩殺死嘅升cup戰士，夢見死去嘅梁sir，夢見自己同大猩猩作戰時嘅慘烈場面。





每一次俾噩夢嚇到扎醒，我嘅額頭同背脊都冒出冷汗，心口嘅傷亦都會隱隱作痛。

雖然梁sir臨死之前，鼓勵我繼續為巨乳而戰，但佢嘅死卻令我對戰鬥感到恐懼。
 
 

「啲啲啲！啲啲啲！」

大約過咗一個禮拜，又有新嘅怪獸出現。

平時一聽到聲就即刻出動嘅我，呢一刻卻無動於衷。

除咗係因為有傷在身之外，更多係因為心入面嗰道揮之不去嘅陰影。

我好驚又會遇到好似大猩猩咁嘅怪獸。





而事實上，自從我失過一次聲之後，把聲去唔返以前咁大聲，亦都無辦法完全掌握到Z大俠嗰種，一邊刺激穴位一邊大嗌嘅方法。

假如再遇到好犀利嘅怪獸，我根本無辦法對付到佢地。

既然係咁，不如直接放棄算啦。

跟住又過咗幾日，出席完梁sir嘅喪禮，變身手環再次響起信號，我依然都係選擇無視。

由始至終，我都唔係一個正義戰士，就算我唔去消滅怪獸，總有其他人會去。

就係咁，我一次又一次缺席戰鬥。

直到有一日，變身手環又「啲啲啲」喺度響，我就好頹咁攤喺屋企嘅梳化，一直無理佢。





之前好反對我變身作戰嘅Yanny，終於睇唔過眼，出聲鬧我：

「朱大志，你仲想頹廢到幾時？你之前唔係嘈住話要揸到J cup巨乳架咩？你咁快就放棄？」

「我無放棄…我只係諗…你要變大波妹又未必一定要嗰粒紫石，或者可以用返以前我幫你按摩嗰種方法…可能都work…」

「你唔好自己呃自己啦！有咩方法好得過嗰粒豐胸丸？」

Yanny將我從梳化拉返起身，再叫我坐返直個人：「你同我坐好！我知梁sir嘅死對你打擊好大，但係你真係甘心就咁放棄追求巨乳嘅機會？」

「我…」

「你揸住我對波，好好感受一下！」

Yanny捉住我雙手，去撫摸佢心口嘅C奶，然後語重心長咁同我講：





「一直以嚟你做咩都係半途而廢，中學玩劍擊玩到中途放棄咗，大學學人做gym又係做做下就唔做，到出嚟做嘢你堅持要學電單車，我以為你會一直揸落去，點知一年都無你又唔玩。」

「我識你咁耐，你幾乎無一樣嘢係做得長，唯獨咁多年嚟一直念念不忘想揸到大波，而你之前為咗我變成大波妹，一路努力不懈，奮勇戰鬥，仲因為咁而重新pick up返之前放棄咗嘅興趣，我以為你唔同咗，點知依家又打回原形！」

Yanny每一句說話都擊中我心。

「我知道嗰次戰鬥，令你受咗好大打擊，但你係咪唔記得咗梁sir臨死前同你講嘅嘢？係咪唔記得咗自己想揸到J cup巨乳嘅初心？」