每消滅一隻怪獸，我條女對波就大一個cup！: 47

沿途遇上塞車，好彩我揸住電單車，可以喺啲私家車之間攝位，左穿右插。

大約用咗半個鐘左右，我就從公司嚟到石澳。

未行到去沙灘，離遠就見到一隻好巨型嘅蝎子。

我一邊快步行過去，一邊㩒掣變身。

但㩒咗幾下，變身器都無反應，跟住我望一望，發現變身手環有個位崩咗。





呢個時候我先醒起，之前喺同隻大猩猩戰鬥嘅過程中，隻變身手環跌壞咗，所以先被迫解除咗變身。

只不過佢壞又壞唔曬，崩咗都仲可以發出怪獸出現嘅警報聲。

變唔到身，我成個人棟咗喺度，唔知點算好。

現場依家大約有十個升cup戰士，佢地嚟先我一步，所以已經同隻大蝎子戰鬥緊。

至於嗰個最勁嘅男人Z大俠，就仲未出現。





我相信呢度所有人都希望佢唔好咁快嚟到。

過咗唔係好耐，晴天博士嚟到現場。

我拿拿臨衝過去問佢變身器壞咗點算好。

對方就好爽手，喺Van仔入面攞咗另一個變身手環俾我換。

佢仲同我講，自從大猩猩一戰，死咗廿二個升cup戰士之後，有唔少人都驚咗，所以就還返個變身器出嚟，退出戰鬥。





坦白講，驚其實都係人之常情。

而對於選擇繼續戰鬥嘅升cup戰士嚟講，有人退出，少咗競爭對手，又未嘗唔係一件好事。

我好快咁換上新嘅變身手環，向住沙灘行過去。

砰砰砰砰！𡁻𡁻𡁻𡁻！

一班升cup戰士同隻怪獸正喺度激戰緊，因此揚起一陣陣風沙。

我一步一步咁行入風沙之中，左手握實拳頭，反手舉於胸前，右手輕輕㩒一下變身掣。

「變！身！」

半秒後，黑色嘅手環閃出耀眼嘅光芒，隨即無數細小嘅白色粒子包圍住我嘅全身，並以極快嘅速度排列組合，形成一套堅硬嘅鋼鐵盔甲。





當變身嘅光芒褪去，呢一刻嘅我就再一次變身成為升cup戰士。

我嘅戰鬥只有一個目標，就係為巨乳而戰！

然而，眼前呢隻大蝎子就令我諗起之前南生圍嗰隻大青蟹。

同樣都係爬行類，同樣手上都有一對大鉗。

唔同嘅係，蝎子有八隻腳，可以行前行後、行左行右，另外喺佢背後仲有一條帶毒刺嘅尾。

假如俾佢針一下，應該隨時會毒發身亡。

「啊啊啊啊啊啊啊啊啊啊啊啊啊啊啊啊啊啊——」





在場嘅升cup戰士一邊大喊，一邊攻擊。

大家都學精咗，識得用喇叭輔助，所以基本上輕輕鬆鬆，就可以突破到升cup戰衣嘅第一形態，變成銀色戰士。

我亦都一樣，透過擴音喇叭大嗌，戰鬥力一下子提升到2000%，身上嘅盔甲就從黑色蛻變成銀白色。

但係咁樣似乎仲未夠。

雖然隻蝎子未去到大猩猩嗰種S級怪獸嘅程度，但都起碼有A級。