每消滅一隻怪獸，我條女對波就大一個cup！: 48

近戰我用合金劍斬佢，遠戰射出離子炮，但係隻蝎子身上嘅硬殼完全不下於獨角仙，2000%嘅攻擊力只能傷到佢嘅表皮。

而喺我地攻擊嘅同時，對方亦都不斷作出反擊。

佢唔單止會揮動手上兩隻大鉗，而且佢嗰條帶毒刺嘅尾仲會不停向前發過嚟。

我地十幾個升cup戰士散到好開，同時一直留意住蝎子嗰條尾。

有幾個人為咗避開對方嘅毒刺攻擊，甚至跳到海入面去避。





我覺得咁樣嘅戰鬥實在太被動，要打敗隻怪獸，一定提升到更高嘅戰鬥力。

過去一個禮拜，我不停練習「共鳴點」發聲同「腹式呼吸」，呢個時候或者可以派上用場。

我稍微退後，離遠少少隻怪物，然後調整呼吸，好似平時練習咁，搵出胸腔、鼻腔同頭腔嘅共鳴點，再大聲嗌出嚟。

「啊啊啊啊啊啊啊啊啊啊啊啊啊啊啊啊啊啊啊啊啊！！！」

咦？點解無大聲到嘅？練習嗰陣明明得架？！





我擘大個口再試一次，呢次用埋腹式呼吸：「啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊！！！」

今次嗌出嘅聲量好過上一次，但都仲係未夠大聲。

我喺屋企練習嗰陣，揸住個分貝儀，試過幾次可以嗌到110分貝以上。

點解依家好似唔得嘅？

而就喺我煩惱緊點樣嗌得再大聲啲嘅時候，隻蝎子不知不覺咁行到嚟面前，不過我無第一時間擦察覺到。





「朱大志！小心呀！」

突然間有人大叫我小心，跟住我先抬起頭，見到隻蝎子條尾從上而下向住我隊埋嚟。

下一秒，我即刻退後，與此同時有個人喺後面用力拉咗我一下。

差之毫釐，蝎子條尾嗰條毒刺，啱啱好就喺我面前掠過，結果打唔中我，只係插咗入沙堆入面。

避過一劫嘅我擰轉面，望一望及時拉走我嘅嗰個人，發現佢竟然係Yanny！

我嚇咗一跳，非常之驚訝：「點點…點解你變咗身嘅？！」

「我咪同你講過囉，只要你肯振作，咁以後無論發生咩事，我都會陪住你一齊面對呀嘛！」

我真係估唔到Yanny竟然會變身成為升cup戰士，同我一齊戰鬥。





「只但係好危險架喎。」

「放心，之前我一直旁觀睇住你地點樣戰鬥，再加上呢段時間我都有同你一齊做gym一齊操，所以我應該應付到，唔會變成你嘅負累。」