每消滅一隻怪獸，我條女對波就大一個cup！: 53

我同Yanny即刻出發。

倒數第四隻怪獸，出現喺獅子山山頂。

所以要打怪獸，首先要行上山頂。

琴日同隻蝎子激戰完，返到屋企又同Yanny床上激戰，本身體力都未完全恢復，家陣仲要行山，都真係幾攞命。

但為咗揸到更大嘅cup數，無論點我都要繼續堅持落去。





我同Yanny身水身汗，幾經辛苦，卒之行到山頂。

隻怪獸係一隻巨型孔雀，獨自企喺山頂一舊巨石上面。

佢除咗識得孔雀開屏之外，睇落唔算勁，趁其他人仲上緊山，我同Yanny聯手，應該可以速戰速決。

稍微抖順條氣，我地兩個就準備變身。

殊不知，突然之間有一架直升機駛近至山邊，颳起一陣強風。





伏伏伏伏伏伏伏伏伏伏伏！

身穿金色戰衣嘅Z大俠，拉開機艙門，然後揸住鋒利無比嘅合金劍，飛身一跳。

哼啊一聲，揮劍一斬，金色嘅劍光隨即喺孔雀條頸度，劃出一道精準嘅弧線。

一灘鮮血連隨飛濺，鮮艷嘅羽毛亦都飛散滿地。

只係短短一瞬間，本來企喺巨石上面嘅孔雀冧低咗，取而代之企喺度嘅係Z大俠。





一出場，佢就又以不費吹灰之力，將怪獸秒殺。

今次佢仲要出動埋直升機，條友咁落力咁揼本，真係點唔夠佢嚟？

結果我同Yanny用咗成個幾鐘，身水身汗行上嚟山頂，最後連變身都未變唔切，就眼白白睇住Z大俠，輕輕鬆鬆一招KO隻怪獸。

最慘唔係攞唔到粒紫石，而係空手而回之餘，仲要辛辛苦苦行返落山。

只可以講，Z大俠呢條友真係貫徹始終。

佢話過要Z cup，就真係為咗呢個目標而出盡全力，用盡辦法消滅怪獸。

家陣怪獸嘅數量就只係剩返三隻，而且Z大俠依然係銳不可擋，假如想喺佢手上搶走紫石，應該都唔容易，但又唔係完全無機會，

原因係最近兩次都淨係見到Z大俠自己一個現身作戰。佢嘅豪乳女朋友好似都無出現，好有可能係因為之前同大猩猩戰鬥嘅時候受咗傷，依家休養緊。





反觀之下，我依家有Yanny一齊並肩作戰，正所謂多一個人多一分力量，我就唔信我地兩個人合力會輸俾一個Z大俠。

啊啊啊啊啊啊啊啊啊啊啊啊啊啊啊啊啊啊啊啊啊啊啊啊——

返到屋企，我唔理隔籬屋投訴，加強練習頭胸鼻三點共鳴同埋腹式呼吸，仲拉埋Yanny一齊練。

除此之外，為咗保存體力，我地仲暫時禁慾，停止扑嘢。

所以到倒數第三隻怪獸出現嘅時候，我地兩個可以話係以最fit嘅狀態上陣。

而呢次嘅敵人只係一隻巨型蠻牛。

佢橫衝直撞，一嘢撞冧咗金紫荊廣場嘅金紫荊雕像。但因為佢太用力，所以搞到自己一隻角崩咗。





對付一隻咁嘅蠻牛，應該容易過之前嗰隻有毒蝎子。

我同Yanny自信滿滿，以為今次一定可以打敗怪獸攞到紫石，點不知就喺呢個時候，喺對面馬路，傳嚟兩把有如雷動嘅聲音，同時出現咗兩道金光。

一道光喺從Z大俠身上發出，另一道就出自佢嘅豪乳級女朋友Q女郎。

佢地兩個身穿戰甲，手拖住手，一齊出場上陣。

我以為對上兩次戰鬥，Q女郎無出現係因為佢要養傷，結果我只係估啱咗一半。

事實上，佢除咗養傷咗之外，原來仲有閉關修煉。

哼啊！！！！！！！

呢一刻嘅佢同Z大俠一樣，打通經脈穴道，化身成超強嘅黃金戰士。





相反，我同Yanny之間暫時就只有我一個人變到黃金形態。

Yanny仲未掌握到我用嘅大嗌技巧，因此戰鬥力頂盡只可以去到1800%，連2000%都未到。

只但係要消滅面前呢隻蠻牛，又未必要到咁高嘅戰鬥力。

趁Z大俠同Q女郎仲過緊馬路，我同Yanny用最快嘅速度，出手搶攻。

點不知下一秒......

哼啊啊啊啊啊啊啊啊啊！！！！！！！！！！
哼啊啊啊啊啊啊啊啊啊！！！！！！！！！！

Z大俠同Q女郎雙劍合璧，同時大嗌出驚天動地嘅聲音。





佢地企喺馬路中間，兩個人四隻手一齊射出金光璀璨嘅強力衝擊波。

BOOOOOOOOOOOM！！！！！！！！！！

剎那之間，隻巨型蠻牛連同佢身邊倒下嘅金紫荊雕像，一齊俾衝擊波射中，然後全身爆開，粉身碎骨。

隻牛嗰啲內臟飛曬出嚟，仲彈落我同Yanny塊面度。

老實講，Z大俠出場秒殺嘅劇本，已經重重複複出現咗好多次，真係你唔悶我都悶。

我同Yanny仲有在場嘅升cup戰士，望住Z大俠同佢女朋友拎走粒紫石，心入面只有一聲無奈同驚歎。