每消滅一隻怪獸，我條女對波就大一個cup！: 54

一個Z大俠已經好犀利，家陣仲要佢女朋友都變到咁勁，根本一出手就天下無敵。

佢地氣勢如虹，無人可擋，消滅完隻巨型蠻牛，隨即幾日之後又再下一城，再打敗多一隻怪獸。

眨眼間，怪獸嘅數量就剩返最後一隻。

事實上，喺經歷完大猩猩一戰之後，Z大俠只係miss咗兩粒紫石。

一粒係佢同大猩猩大戰完，身體未恢復，因此被迫短暫休戰，另一粒就係我第一次變成黃金戰士，成功打敗蝎子嗰一次。





其餘嘅紫石全部都係由Z大俠獨得，所以佢女朋友早就唔再係Q cup，而係升咗六個cup，變成W女郎。

W cup 係一個比大西瓜更大嘅級數，呢種身形根本只係應該存在於漫畫世界入面。

雖然就算Z大俠消滅埋最後一隻怪獸，佢條女嘅cup數都係得X，但我相信條友一定會全力以赴攞埋最後一粒紫石，然後再諗辦法大多兩個cup，完成Z cup夢想。

眼見Z大俠距離自己嘅夢想越嚟越接近，相反我同Yanny仲有其他升cup戰士就好似變咗陪襯咁，眼白白睇住人一級一級咁升lv。

我攞到三粒紫石都算好，有好多升cup戰士咁努力戰鬥，卻幾乎連一粒紫石都拎唔到。





其實隨住紫石數量一直不斷減少，唔少升cup戰士都覺得心灰意冷。

大家都覺得Z大俠太過屈機，幾乎一個人壟斷曬所有紫石，於是一直感到深深不忿。

呢種一路累積落嚟嘅怨氣，早就令大家對Z大俠心存怨念。

家下得返一隻怪獸，戰鬥可以話接近尾聲，有十幾廿個升cup戰士決定把心一橫，決定聯合起嚟對付Z大俠。

佢地嘅諗法就係「我得唔到嘅嘢，你都唔使旨意得到」。





反正都係最後一次，反正都攞唔到紫石，既然係咁，咁不如索性就將對Z大俠嘅妒忌同不滿，一次過發洩出嚟。

佢地當中都有人向我招手，問我有無興趣加入「反Z聯合軍」。

問題係Z大俠之前都算幫過我，而且佢為人正直，我無理由調轉槍頭對付佢。

再加上我嘅目標一直都係打敗怪獸，得到紫石，從無諗過傷害其他人。

雖然依家只係得返一粒紫石，距離我嘅J cup夢想已經遙不可及，但就算係咁，我都要爭取Yanny變成E cup，至少要令佢達到巨乳嘅合格線。

對我嚟講，依家要做嘅係專心一意，將自己調整到最佳狀態，並諗辦法對付最後一隻怪獸。

所以我無興趣加入「反Z聯合軍」。

而根據晴天博士嘅實驗室record，最後剩低嘅怪獸應該係一隻大黑熊。





我估計，隻大黑熊應該同之前隻大猩猩一樣咁難對付。

以我目前可以達到嘅3000%戰鬥力，感覺未必應付到，可能需要更高嘅戰鬥力，又或者要Yanny都變成黃金戰士，一齊合力戰鬥先得。

其實呢段期間，Yanny為咗增強戰鬥力都好努力練習大嗌，只係好可惜，佢依然未能突破去到更高嘅分貝。

除咗加緊練習之外，我地兩個亦都趁得閒上youtube睇下啲紀錄片，預先了解一下黑熊嘅習性。

齋睇片其實都知就咁一隻普通黑熊，都相當具攻擊性，完全想象唔到一隻巨型大黑熊會係幾咁可怕。

我地睇下睇下，突然間大家嘅變身手環同時響起。

「啲啲啲！啲啲啲！」





呢個時候，最後一隻怪物出現！

地點喺中環皇后像廣場。

我地冚埋部notebook，拿拿臨出發。

但估唔到，去到現場我地見到嘅唔係大黑熊，而係一隻非常核突嘅超大蜈蚣？！

點解會咁嘅？乜大黑熊唔係最後一隻怪物咩？