每消滅一隻怪獸，我條女對波就大一個cup！: 66

我拖住隻斷咗嘅腳，忍受住全身劇烈嘅痛楚，從地陷個坑入面慢慢爬返上地面，然後再趌下趌下，行到Yanny耳邊。

佢成個人同個頭都變得好大，因此耳仔（仲有對波）都變到一樣咁大。

我向住佢嘅耳窿大嗌：「Yanny！你醒下啦！」

「…...」

「Yanny！」





「…...」

我嗌咗幾聲，對方都係無反應。

過咗一陣，晴天博士行埋嚟我身邊。

我第一時間捉住佢問：「究竟發生咩事！點解我女朋友無端端會變咗女巨人？仲有點解佢依家會不省人事？」

「你冷靜啲，唔好咁緊張，等我用儀器check下咩事先。」





晴天博士拎出一部外形好似projector咁款嘅儀器，快速掃描咗Yanny全身，獲取咗一堆身體數據。

佢再將呢堆數據輸入電腦分析，大約過咗五分鐘，得出結果：

「你都知你女朋友為咗變成大波，體內吸收咗唔少紫石元素，而呢種元素嘅特質就係令身體生長變大，至於你女朋友啱先喺戰鬥嗰陣，因為情緒一時過於憤怒同激動，結果令體內嘅腎上腺素急升，而且同紫石元素出現咗協同效應，於是就導致到佢嘅身體產生巨大化。」

「咁…咁佢幾時先會變返正常？」我追問對方。

「啱啱先經歷完咁激烈嘅戰鬥，過多陣等佢身體calm down返就會變返原狀架啦。」





「但係佢依家無咗意識，會唔會有咩事？」

「我check佢呼吸、脈搏都正常，有可能頭先喺戰鬥嘅時候chur得太盡，所以先攰得滯暈低咗啫，應該無乜事嘅。」

「真係？」

「你放心啦，你女朋友一定會縮返細同醒返嘅。」晴天博士拍一拍我膊頭，向我保證Yanny好快會無事。

與此同時，有幾個救護人員嚟到幫我檢查同急救傷口。

佢地話我左腳骨折，傷勢頗為嚴重，最好立即入院接受治療。

雖然隻腳斷咗仲好痛，只但係我要留喺度等Yanny身體變返細，仲要等佢醒返，所以唔肯去上救護車。

就係咁，我忍住痛，一路喺度等。





等咗接近二十分鐘，終於見到Yanny嘅身體開始縮返細。

佢先由巨人咁大，縮到好似一部巴士嘅大細，之後再慢慢縮細，最後變返做原本嘅身形。

見到佢打回原形，我總算鬆咗一口氣。只不過佢依然都仲係昏迷不醒。

救護員甚至仲check到佢嘅呼吸突然變得好薄弱，話唔定隨時有生命危險。

我嚇咗一跳，即刻質問隔籬晴天博士：「喂！你條友又話Yanny會無事嘅，依家點解會咁架？」