每消滅一隻怪獸，我條女對波就大一個cup！: 65

Yanny嘅身體倍大再倍大，最後變成一個同隻怪獸一樣咁高嘅女巨人。

我完全o曬嘴，心入面浮現無數個感歎號（!!!!!!!!!!!!!!!!!!!!!!），就連Yanny本人都嚇咗一跳！

究竟發生咩事？點解Yanny會好似鹹蛋超人咁變到咁巨型？

而變成女巨人之後，佢身上依然著住嗰件金色嘅升cup戰衣，而且亦都無忘記要對付眼前嘅敵人。

「你隻核突怪竟然搞到我條仔斷腳！你真係未死過啊！」





Yanny身體變大咗，連隨把聲都放大咗好多倍。佢只係講嘢尾音大聲少少，就已經可以令金色戰衣變成彩虹戰衣。

至於隻融合獸頭先仲好得戚咁喺度狼叫，但家下見到Yanny變成巨人，嚇到即刻收咗聲，身體仲不自覺咁縮後。

Yanny見到隻嘢好似想退走，於是拿拿臨衝過去捉住佢。

咚！咚！咚！

巨大化嘅Yanny每行一步路，地下都會震一下，並且留低一個巨大嘅腳印。





雖然佢嘅身體變大咗，但速度並無變慢。

Yanny一手捉住對方其中一隻熊掌，用力捏住再反手一拗。

咔啦一聲，隻怪獸隻手掌好似紙板咁當堂斷開咗，即刻就見骨兼爆血。

「Ahhhhh…」怪獸好痛苦咁慘叫一聲，然後唔忿氣，出手還擊。

佢用另一隻手出掌攻擊，結果一嘢批中Yanny個心口。





好彩Yanny有件戰鬥甲保護住，所以無受到太大傷害。

「頂你個肺！你竟然夠膽批我個波！我真係當我流架？」

Yanny怒氣攻心，一下撲前，雙手捉住對方另一隻手，然後又係大大力一拗。

今次隻嘢嘅手掌連手臂，成隻俾Yanny拗斷咗。

紅色嘅鮮血瞬間從傷口中大量噴發，仲好似落大雨咁，分散喺半空滴落地下，染紅附近一帶地方。

呢刻嘅Yanny除咗巨大化之外，仲有彩虹戰衣加持，因此力量非同凡響，勁到連武器都唔使用，直接赤手空拳就已經廢咗敵人左右兩隻手。

隻怪獸一邊痛苦大嗌，一邊驚到掉頭走。

好在Yanny反應快，第一時間捉住對方身後嗰條大蟒蛇。





佢用力扯住條蛇，將隻怪獸扯返返嚟，然後再用手夾生擰斷條大蟒蛇，救出被困嘅Z大俠。

唔知係咪因為逃走失敗，隻融合獸忽然轉身露出兇狠嘅狼相，決定瞓身一搏，向住Yanny飛擒大咬。

佢滿口狼牙猶如刀一樣鋒利，但Yanny似乎估到敵人會突然反撲。於是佢快速退後。

當怪獸擘大口撲埋去嘅時候，Yanny就舉直右手，塞個拳頭入去對方個口度。同時間，前臂嘅裝甲彈出一支巨型嘅離子炮。

「哼！怪獸你去死啦！啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊啊——」

Yanny發出地動山搖嘅聲音，升cup戰衣嘅戰鬥力急速飆升，閃耀出無比刺眼嘅強光。

我相信呢一刻佢嘅戰鬥力已經超越咗10000%，即係100倍超級力量！





BOOOOOOOOOOOOOOOM
！！！！！！！！！！！！！！

一招毀天滅地嘅衝擊波喺怪獸口中發射！

只係喺短短一秒間，成個狼頭直接爆開咗。

迅猛強勁嘅衝擊波穿過怪獸嘅身體，再掠過中環一盅高樓大廈嘅樓頂，一路射到去好遠好遠嘅一座山後面。

BOOOOOOOOOOOOOOOM
！！！！！！！！！！！！！！

又一下猛烈嘅爆炸聲，成座山爆開，一瞬間夷為平地。

喺座山爆開嗰下，成個香港島甚至出現咗一下劇烈嘅地震。





由此可見，Yanny啱先嗰招衝擊波嘅威力係幾咁可怕。

無咗條尾、無咗對手、無咗個頭，隻融合獸可以話死無全屍，徹底被K.O.。

只不過與此同時，Yanny使出全力一擊後，突然之間全身無力，不支倒地。

跟住再多幾秒，佢仲失去意識，成個人摞低咗。

最後佢一副巨大嘅身體橫跨成個中環海濱，完全失去知覺咁攤咗喺度。

弊啦！佢唔會有咩事呀嘛？