黑神話﹕Ocamp新鮮人(NTR向): (1) 序章-報名
四年前。
「喂係喎你會唔會玩Ocamp呀？」一個着黑色鬆身Tee嘅肥妹仔問。
「應該唔會啦，男朋友唔想我去……」隔離着住白色連身裙、黑長直髮加上戴大幼框韓風眼鏡嘅女仔面帶苦笑咁答。
兩人搭扶手電梯步入Main Campus，今日係新生Register Day，所以Campus入面人來人往，啱啱成為大學Freshman嘅兩女對身邊一切都覺得好新奇，所有嘢同中學都好唔同，就如同踏入咗新大陸一樣。
「你咁講得即係其實你係想去啦！」肥妹仔直擊朋友回應嘅漏洞。
「咁……個個人都想去㗎啦……聽人講如果唔去Ocamp，開學就會冇Friend，Group Project都冇人肯同你一組……」白裙女越講就越泄氣。
「我個Friend都係咁講呀！佢話萬事起頭難，如果Ocamp識到人嘅話就起碼有人陪住一齊開學先，做咩都冇咁驚呀嘛！」
「我都知……」
佢地順利咁各自搞完入學手續，先發現原來周圍都掛滿各式各樣嘅Banner，又有唔同Faculty嘅宣傳Banner，又有學校週年校慶嘅Banner，對兩女嚟講就好似進入咗Harry Potter嘅世界咁。
「咁你條仔有冇講點解唔想你去？驚你比組爸食咗？笑死！」
「佢又冇講得咁白嘅……咪都係話佢睇連登嗰啲Post，講到Ocamp係淫亂Party，入到去就係瘋狂濫交咁……又話Ocamp係比啲好Outgoing嘅人圍威喂唔啱我呢啲內向女仔喎……」
「有冇咁誇張呀？你唔想嘅話唔通真係喺Camp入面強姦你咩？佢係咪睇得Av太多咋？」肥妹仔笑到見牙唔見眼。
「唉唔知呀……你咁問即係你會去？」
「緊係去啦！人一世物一世咩都要試下，同埋宜家唔報唔通過幾年變咗老餅先報咩！」
「咁你會報邊個？我聽講都有分好多款……」
「吓我大中細O都想報喎，嗱大O就會乜人都有，用嚟識Hi Bye Friend或者溝仔；中O就你個Faculty啲人，用嚟Build Connection同Electives Buddy；細O就得你嗰科嘅人，呢幾年都係同佢地一齊上堂，最Friend嘅應該都係呢度識㗎啦~」
「哇你都做晒Research喎~咁如果比我會想報細O就夠啦~」白裙女都聽得好興奮。
「你又話唔去~講咩呀~」
「唓！講吓姐……」
「咦同學玩唔玩Ocamp呀？」
「喂同學讀咩科呀？」
「Hello有冇興趣玩Ocamp呀？」
白裙女陪住肥妹仔行晒咁多個booth去報名，後者差唔多報晒見到嘅Ocamp咁濟。
「乜原來Ocamp咁貴㗎……個個都成千蚊你仲要報成4、5個，你幾時變咗小富婆我唔知㗎~」白裙女撓住朋友隻手細細聲講。
「返Part time草草埋埋就係咁用㗎啦~邊似你個個星期同仔仔又去呢度去嗰度玩，又食好嘢……」
「唓又Gut我！你玩咁多Ocamp實好快出Pool啦嘻嘻 ~」
「同學讀咩科㗎？同學玩唔玩Ocamp呀？」突然，一個身穿黑色Crew Tee嘅銀灰色短髮靚女從後面追上嚟拍一拍白裙女仔嘅膊頭。
「哦我讀Marketing……不過唔洗啦……我唔玩Ocamp……你問我個Friend啦佢可能想玩！」白裙女勉強擠出微笑，又望過去肥妹仔度。
「咦我地就係Marketing系莊喎？咁啱嘅？」黑衫女仔兩眼發光，好似揾到寶藏一樣，仲指一指佢身後遠處寫住「市場營銷學」嘅迎新攤位。
「咦咁有緣份？我就唔報得啦！你要去啦！」肥妹仔推一推姐妹嘅膊頭，表現得仲興奮過個Helper。
「咩呀我咪話咗佢唔鐘意囉……」白裙女細細聲同肥妹講。
「係呀！如果同學係比較怕醜嘅話細O就啱晒啦，我講返我嘅經驗啦，我本身都係比較內向嘅，但係我Year 2都仲係同緊細O識嘅朋友仔一齊上堂……」黑衫女繼續滔滔不絕。
「你唔好咁硬頸啦，你自己想去咪去囉，讀U就係要開始自己為自己做決定㗎啦~」
「唔係咁簡單㗎……佢真係會嬲㗎……」
兩人竊竊私語，黑衫女都隱約聽到內容，於是佢轉為認真嘅神情講︰「同學你係因為擔心個Camp嘅尺度所以猶豫緊？如果係咁嘅話我可以同你講我地絕對唔係你喺連登見到嘅淫Camp呀嗰啲，我自己都玩過個Pre-Camp，我地成個Schedule都冇淫Game呀嗰啲你可以放心~」
「Errr……」白裙女好明顯意志開始動搖，但係仲未落到決定。
「人地都講到明唔係淫Camp啦，你仲驚咩喎~」肥妹仔又加多把口。
「同埋同學呀，我細細聲同你講呀，我地個Booth就收㗎啦，過埋就冇得再報，老實講我都係盡量招得幾多人就幾多人，Camp site就Book咗，收少一個人我地就蝕多一個人錢……嗱……最多見你同我一樣咁靚女，我試下幫你R個Discount呀，原本我地每人$1100，宜家收你$500就ok……」黑衫女越講就越可憐咁嘅樣，個身都越摀越低。
「喂半價有多喎癡線！係我咪當去個旅行仔囉！仲有咩好諗呀！」肥妹仔繼續助攻，黑衫女就用水汪汪嘅大眼哀求。
「咁……」白裙女欲言又止，始終講唔出個答案。
「唉扭扭擰擰咁，我幫你比埋錢啦~行啦！」肥妹仔一下幫佢應承咗，仲扯住白裙女開始行。
「太好啦~我都想有你呢啲朋友呀~」黑衫女露出如獲至寶嘅神情，好似中咗六合彩咁。
去到個Booth度，黑衫女同入面嘅一個西蘭花頭嘅高大男仔密密酙咗幾句，就同返白裙女講︰「OK我同佢講咗收你$500就得，你填返張Form同影張相就搞掂啦~」
「咦原來要影相㗎？」
「哦我地會有本場刊咁嘅嘢，到時全部Join嘅仔女都會Print喺上面㗎~如果唔想即場影都可以私底下Send相比我地嘅~」
「哦……即場影得啦……你幫我睇下我Pat陰……」
白裙女望住佢個Friend想聽佢意見，言談間都Feel到佢開始興奮。
就係咁，白裙女好快就搞掂晒嘅手續，攞住張Ocamp leaflet凖備開開心心咁離開。
「Ok㗎啦~呀唔記得介紹自己~我叫Karina呀，我都會係其中一組嘅組媽，同學你叫咩名呀~」
「哦我係Karen！」肥妹仔爭住答。
「唔好意思我係問緊……你！」Karina尷尬咁望一眼肥妹仔，再望實白裙女。
「我叫Loraine！柯諾瑩！」白裙女先笑住咁答。
「Ok！英文名就得啦Loraine！到時O Night見啦！希望你入到我嗰組啦！Byebye~」
「Byebye Karina！」
......
......
......
見兩女遠去之後，Booth入面西蘭花頭嘅靚仔行出嚟企Karina嘅身後︰「唔係講笑，條女真係幾正~雖然唔係好高，但係個樣好靚、身材好似都唔差，應該係成日見過最高質~不枉我自己貼錢都要招佢入Camp~」
「係啦係啦~完全係你杯茶呀嘛~不過好似聽到人地有男朋友啦喎~」
「咁大鑊？不過男朋友姐，入完U就好快散啦，Ka姐你最有經驗啦~」
「屌你啦仆街！你呢啲咸濕佬呀，嗰幾日千祈唔好比我聽到你性騷亂啲組女添呀，擺你上連登呀！咩X大Ocamp獸父狗公，見到實笑死我~」
「癡線~我呢啲紳士嚟㗎嘛~」