黑神話﹕Ocamp新鮮人(NTR向): (2) 序章 - O Night

O Night當晚，隱暪住男朋友嘅Loraine按照WhatsApp Group嘅Message指示，揀咗件屋企唯一一件嘅普通紅色印字Tee同白色短褲應約。去到集合地點，大部份Camp mate都已經到齊，反而係組爸媽有人遲到。Loraine一下就認到着住紅色Camp Tee加牛仔熱褲嘅Karina。
 
「喂Hello~我記得嘅！你係……Loraine？」灰色短捲髮嘅Karina熱情咁行過嚟打招呼。
 
「係呀係呀~你咁都得！你係Karina！」
 
「全中！叻女！不枉我死Lur爛Lur都要拉你入嚟紅組！」Karina自豪咁話。
 
「哦~多謝你呀~我本身都驚我會太怕生……」比較內向嘅Loraine見到唯一算係識嘅人即刻冇咁緊張。
 


......
......
......
 
上到Party Room，Loraine終於見到晒聽講係成個Camp都會見到嘅人，有綠、藍、黃House嘅人，同埋當然唔少得佢自己身處嘅紅House啦，有別於其他組都係組爸組媽各兩個，紅組係有三個組媽﹕本身識嘅Karina、金色長髮嘅Angela同埋身材高挑嘅Jeannie。組爸就係喺Booth見過嘅捲毛頭靚仔Andrew。
 
而Loraine仔細打量咗紅組Omates一次，當中組仔方面就高矮肥瘦/大隻/毒L樣樣齊，但係就冇個稱得上靚仔；反而組女方面平均樣貌都唔差，加埋三位組媽都算係各有特色嘅靚女，可以話紅組嘅女性整體顏值輾壓其他組都不為過。
 
因為成晚O Night都係為咗令大家喺入Camp前熟悉吓大家先，等大家入O Camp一開始就可以全情投入。而雖然間Party Room都幾大，但係要擺晒四組人都有少少逼，所以四組人各自喺一個角落坐低圍圈玩遊戲。Loraine兩邊分別係組爸Andrew同大眼組女Coco，正對面就係熟悉嘅Karina。高大嘅Andrew就算坐低都高Loraine半個頭，而有個魁梧嘅身型加少少Fuckboy樣嘅男仔咁近坐喺隔離，即使Andrew完全冇任何越軌嘅動作，Loraine都有心跳加速嘅感覺，好彩有Karina喺對面向佢微笑，佢先冇咁緊張。



啱啱坐低冇耐，Andrew就悄悄企返起身，由隔離嘅梳化攞咗個Cushion行到坐喺斜對面嘅黑色短裙組女Elka度細細聲講咗句嘢，Elka即刻面都紅晒怕怕醜醜咁講咗聲「唔該」。
 
「Sorry呀我坐隔離都唔記得提你……」坐喺隔離嘅Karina用手指比咗個Like比Andrew之後就一臉內疚咁望住Elka。
 
「Oh Fuck！係喎唔記得咗你着咗裙嚟！喺樓下嗰陣已經想提你我地會坐低玩遊戲，但係上到嚟就唔記得講哈哈~」金髮組媽Angela粗獷咁拍一拍佢白晳嘅大脾嗌出嚟。
 
「哇Andrew爸爸好細心呀~我呢我呢我又要Cushion~」盤腿坐緊嘅黑肉組媽Jeannie即刻左右腳踢一踢出嚟撒嬌一下，引到全場組仔都眼甘甘望住佢對大長腿。
 
「你收皮~媽媽凍就自己着衫啦~」Andrew笑住咁返返埋原本個位坐低，Jeannie就順勢扁扁嘴，引到大家都笑晒口。組爸本來外型已經算幾唔錯，啱啱Gentlemen又有少少Mean加幽默嘅表現已經令到佢喺啲組女面前留低好好嘅印象，包括本身除咗男朋友之外冇乜點接觸男仔嘅Loraine。
 


跟住全晚活動都不外乎係啲破冰遊戲心臟病、開心返埋嚟同拍7嗰啲，喺開頭大家都唔熟，少少拘謹嘅情況下Loraine都玩得幾開心，令佢進一步說服自己暪住男朋友參加O Camp嘅選擇係啱嘅。