黑神話﹕Ocamp新鮮人(NTR向): (3) 格格不入
第一日入Camp前首先喺Campus集合，然後各個House分開進行City Hunt，到下晝黃昏再集合去統計時間同揾到幾多嘢去決定分數。
Loraine今日都戴上Con，盡力打扮成一個冇咁頽嘅女仔。
「今日好L熱呀~不如我地去唱K算啦~」頂住飄逸金髮嘅Angela今日着褶起咗嘅紅底黑字Camp Tee，露出小蠻腰，佢揸住Tee嘅下擺一路揚一路半講笑咁話，衫下嘅黑色Bra-Top若隱若現。
「讚成！其實我地Pre-camp都玩過，勁悶，又要出尖沙咀旺角、轉頭又要去唔知邊度勁遠，勁煩囉！」望落男仔頭又好動嘅Karina竟然都會嫌麻煩。
「唉都估到你地~Pre-camp嗰陣我已經睇死你地正Camp一定唔會去City Hunt。但係我就反對嘅！2﹕1！睇你啦爸爸~」睇落似Sporty嘅Jeannie今日着咗條幾短嘅黑色運動褲。
「嗱！我就覺得今日真係有啲曬嘅，而我收到風，贏嘅獎品都係啲冇用嘅道具嚟~」簡單一件Camp Tee加條五分短褲已經盡顯身高同鋼條型線條嘅Andrew終於開口。
「吓真係㗎？見佢地早幾日偷偷摸摸買獎品仲講到好有用咁！唓！」Karina露出不屑嘅表情。
Angela好似聽得出Andrew嘅取態﹕「你咁即係贊成啦？Yeah~~」
「我投反對。」Andrew出人意料咁講。
「話晒都係啲仔女嘅經歷嚟，我地就話玩過姐，但係佢地......我想比佢地自己揀。」
除咗Angela有啲語塞之外，其餘二人連同各位組仔女都有醍醐灌頂嘅感覺。
「好型呀Andrew爸爸~」Jeannie更加係拍晒手掌。
最後投票結果係大比數同意唔玩City Hunt，因為男仔意見不一，而大多數女仔都怕曬。
「Yeah~~咁不如我地去飲個早茶先啦~我好想同你地飲茶呀~」Angela興奮咁彈下彈下，細碼紅色Camp Tee入面嘅雙乳浪下浪下，睇到各組仔都視線飄嚟飄去。
最後紅House眾人着上今年嘅紅底白字Camp Tee去飲早茶同唱K直落，令人意外嘅係Andrew把聲唱軒公嘅歌特別有Feel，佢同Karina合唱《一事無成》搞到全場都笑不攏嘴，本身歌喉麻麻嘅Loraine就靜靜坐喺一邊聽人唱歌同食嘢。
......
......
......
到正式入到Camp site，MC宣佈紅House就係包尾嘅一Team，但係大家都毫不意外，而除咗分數之外嘅所謂獎品原來就係第二日水Game用嘅道具水槍。
第一日Camp唯一特別嘅就係喺夜晚玩咗幾個大圍嘅破冰遊戲之後有個Disco Night環節。
首先由各House嘅爸媽各派出代表出嚟Dance Battle，由Mc同DJ Helper揀選唔同嘅曲風，再由佢地即興發揮。
「Wowww~Kelvin好型呀~」綠House嘅House captain跟隨重Beat音樂，跳出一段精彩嘅Popping舞步，觀眾席嘅組仔女大聲幫佢打氣。
「哇呢個House cap搏晒老命好想贏呀！」身材矮小嘅MC揸住個咪不停炒熱氣氛。
黃House嘅肥仔組爸緊接出嚟跳咗段滑稽、似舞非舞嘅扭動，惹嚟全場嘅大笑。
「Kenji爸爸為咗分數都豁咗出去，話時話你呢招練咗幾耐？」MC一路笑住拍佢膊頭一邊問。
呢個時候Loraine見到坐喺前排嘅Angela同Jeannie密密酙，前者好似安撫緊後者咁。
「喂喂喂~女呢？我要女女呀！比啲媽咪嚟啦！」MC轉向仲未出場嘅藍House同紅House。
說罷，藍House就派咗佢地最靚嘅組媽靄怡出嚟，不負眾望，佢即刻一段K-pop舞步人令全場歡呼。
「哇~我就係要呢啲！大家話靄怡正唔正呀~」
「Wow~」
「最後紅House紅House！快啲快啲！我最期待呀！個個組媽都咁靚！」
「喂你即係話其他House啲組媽唔靚啦？哦~」黃組嘅細細粒可愛Hailey組媽即刻大嗌。
「嗱嗱嗱我冇咁講呀唔建議屈MC呀！」
呢個時候，Angela推Jeannie出去嘅同時大聲歡呼﹕「Wow~Jeannieeeeee~」全場嘅目光即刻聚焦喺高挑嘅Jeannie身上。
Jeannie向後啤咗一啤Angela，然後就順勢一邊跟住DJ啱啱轉嘅Jazz Music一邊婀娜行近MC。
「哇哇哇~你唔好行咁近先！對住我跳唔會加分㗎！」MC雖然口裏說不，但係身體都硬晒駄。
Jeannie好似Idol上身咁露出嫵媚嘅表情，對住郁都唔敢郁嘅MC嚟咗一段貼身辣舞。除咗音樂之外，好似時間靜止咗咁，大家都屏息觀望呢場好戲。
「Wow好正呀Jeannie~繼續唔好比佢走！」坐喺後排嘅Karina破空一大叫。然後其他人都開始鼓動起嚟，歡呼聲不絕。
Jeannie蹲下，雙手隔空好似摸住MC濃密腳毛嘅小腿由慢慢貼住由下而上咁摸上去，隨住貼住MC嘅身驅仰身，高挑嘅佢幾乎同MC一樣高，Jeannie嘅雪乳都幾乎要貼到男人嘅胸膛上，佢昂高頭，口吐芳香嘅嘴唇直面MC嘅鼻樑，然後口upup唔知講咗啲咩。
「DJDJ我頂唔住啦！」MC褪後一步攞返起枝咪向DJ台求救。
DJ聽到，即刻轉播BIGBANG嘅《BANG BANG BANG》，聽到歌曲Cue嘅各House cap同組爸媽都即刻起身Ready。
「喂嚟啦！跳啦！Wow！」MC抽身出嚟開始跟住音樂跳。
Angela已經拉住前排嘅仔女起身行入中央舞池彈下彈下，同時Karina同Andrew都喺後排揚啲仔女出去。
「BANG! BANG! BANG! 빵야 빵야 빵야」
入到第二次副歌，就算唔計中央舞池嘅人，幾乎場邊嘅人都已經忍唔住跳起上嚟。淨係講紅House嘅話，大眼靚女Coco、長腿Emilia、鄰家女孩Feel嘅思晴，更加唔洗講原來好跳得嘅Karina同Angela都喺靠近中間嘅位置Un得好High。基本上得返唔習慣喺咁Hyper嘅場景嘅Loraine尷尷尬尬咁喺角落頭搖吓搖吓，望住熱鬧嘅新朋友一個一個行入舞池，自己就格格不入咁一人之境，佢雖然都有心跳加速嘅感覺，但係唔知點解佢，就係唔係咁想Join埋一齊。
然後突然群眾一聲歡呼，原來係Green House Captain Kelvin一下除咗佢件綠色Camp Tee，露出佢肩闊、結實胸肌加埋明顯腹肌嘅性感身材。
「WoW~咁大隻啲女女比你溝晒啦~仲有冇人要除！」MC一邊跳都不忘繼續炒熱氣氛。
「喂屌！等陣唔關我事......喂！」原來混亂之間Kelvin已經行埋去夾硬除咗MC件衫，全場即刻起哄。
「喂唔可以得我除！除啦除啦~WoW~」MC喺被除之後即刻周圍揾下一個受害者，佢一下就捉住咗Andrew，Kelvin夾手夾腳除咗佢件衫，令佢收收埋埋嘅鋼條型身材即刻露晒出嚟。
「喂Andrew你幾時操到咁大隻㗎我頂呀！」MC大嗌。
基本上全個Red House嘅組女都睇到流晒口水，包括Loraine都睇到呆一呆。然而下一秒局勢就開始失控咁，全場嘅仔仔都開始捉住隔離嗰個除衫，大部份嘅男仔無論身材好唔好、排骨毒撚定係大肥仔都除晒衫跳，好似呢一個Moment所有形象乜嘢都唔重要，最重要係融入呢個Disco，融入呢個大學生活嘅Vibe。
喺一連串K-Pop炸場嘅音樂底下，大家已經冇分係邊個House或者係組爸媽定組仔女，半祼嘅男仔就放肆跳舞，當然都有唔少趁呢個機會癡埋啲女仔度跳，雖然未癲到有女仔除衫，但係大部份女仔都樂於同仔仔貼身接觸，當中最受男仔歡迎嘅當然係啲樣靚身材正嘅女仔，例如大波金髮嘅Angela同埋仙氣女神靄怡長期都有四、五個組仔埋身，有跳舞根底嘅佢地完美把握到貼身辣舞嘅同時又唔會真係接觸到男仔嘅挑逗藝術，引到啲組仔越跳越企唔直個人。而Loraine雖然都有幾個自己House/ 隔離House嘅大隻仔仔埋嚟撩佢，但係佢都係怕怕醜醜咁笑住拒絕。
「Black Mamba // Ma Ma Ma Mamba // Woo oh-oh //」
躁動嘅音樂中，全場嘅氣氛沸騰到頂點，喺全世界接近瘋狂嘅時候，Loraine Feel到好似有人拍一拍佢背脊，拍一下唔夠，拍夠兩下先令Loraine擰轉面。
原來係半祼嘅Andrew企正喺佢後面，Loraine一轉面就成塊面胋喺佢結實嘅胸肌度。
「你唔鐘意咁嘈？」起碼有米八嘅Andrew居高臨下、但係又好温柔咁講。
Loraine原本已經燥動嘅心跳又急升起嚟，佢塊面都漲紅晒唔知點反應，呆咗幾秒先吞吞吐吐咁講﹕「我......係呀......同埋好似太多人......有啲焗......」
Andrew雙手搭喺Loraine嘅雙肩﹕「唔緊要呀~唔啱玩可以出去行個圈先返嚟，最緊要你舒服。」
「但係好似唔係幾好咁......」
「咁我陪你出去。」
「Huh？你組爸嚟喎點可以行開......」
「我都唔鐘意呢度。唔好比佢地知就得。嚟！快啲出去！」Andrew喺Loraine耳邊說罷，就改為單手攬住佢靜悄悄咁由Hall嘅昏暗角落頭穿越擁擠嘅人群行向門口。而喺另一個角落比唔同組仔圍緊嘅Jeannie咁啱望住佢地行出去。
兩人行出去一閂埋門，入面嘅嘈雜人聲、音樂通通消失，月影下得返二人並肩緩緩向前行。
「唔好擰返轉頭啦，佢地有人會喺後面飲酒食煙，睇你都唔啱㗎啦~」Andrew挺住結實嘅胸肌，有意無意咁電住Loraine嚟講。
「嗯......你呢？」Loraine完全唔敢望住半祼嘅組爸。
「我都唔食煙，酒就......睇情況啦。」
「咁你件衫呢？」
「比唔知邊個除完之後就比佢地順手掉埋一邊唔見咗啦哈哈~」
「哦......」本身已經不善言辭嘅Loraine只可以漲紅住面咁答。
兩人靜靜地行過一條林蔭小道，行到遠離咗Disco嘅位置，眼前係一幢幢兩層嘅白色房子，有少少路癡嘅Loraine已經認唔到係邊個House嘅屋。
「出返嚟係咪好好多？」Andrew首先打破沉默，不經意咁講。
「係......其實......係唔係大學就係咁？U Life就係咁？」
「你......好驚？」
Loraine點一點頭﹕「如果之後4年都係咁就......好大壓力......」
「I see......我可以話比你聽......大部份人都係咁，就算本身個人唔Yo，都要扮到好Yo，我都係咁。」
「......」Loraine少少失望咁耷低頭，失落咁靠落玄關側邊嘅牆度。
「之但係，個個都係咁唔代表你都要係咁......」Andrew輕輕扶住Loraine嘅膊頭，微微烏低身同佢保持視線水平，眼神堅定咁講。
「咁我咪會變咗奇怪人囉......」Loraine望住Andrew對眼，水汪汪嘅大眼睛開始有少少想喊嘅感覺。
「唔會呀......有我陪住你呀嘛！」
Loraine眼定定咁望住佢，佢覺得Andrew係真心嘅，連男朋友都冇同佢講過咁Warm嘅嘢。佢呢刻發自內心咁攬住咗眼前嘅半祼組爸，將成個頭俟喺佢嘅膊頭。
Andrew強而有力嘅臂膀都攬返實佢，兩人就咁攬咗十幾秒。
「Sorry......失禮晒添......」眼泛淚光嘅Loraine突然意識到咁做好似唔係好啱，於是率先鬆開手，但係兩人仍然係幾乎面貼面，互相吐出嘅熾熱氣息都被對方全然接收，曖昧嘅氣氛下，Andrew再次搭實Loraine嘅膊頭，講出震撼嘅一句。
「你......可唔可以做我女朋友呀？」