【異世界】異式幽默: 第五章：語意之力

第五章：語意之力
 
工作過後，阿麵和我來到另一種畫風的樹春上村。原本以為夜晚的村子一片沉寂，卻意外發現整條街都變成熱鬧市集。當中認識到阿麵的青梅竹馬雅瑪。在市場中經營一個由木頭車搭建的裝備店。我們在市場中的酒館吃了一頓宵夜後，就離開了酒館返回裝備店了。
 
這時候發現裝備店中，雅瑪被幾個男生圍住。
 
「喂啊，你地唔好阻住我做生意啦，我唔會同你去咖。」雅瑪大叫道。
 
「喂，你地啊！」阿麵向那邊叫。
 




裝備店前站著三個像是小混混的男生，站在前面的相信是大哥，在後面的兩人則是手下。
 
「咦！係阿麵喎。你唔使返去餵豬咩？」站在前面的大哥諷刺的說。然後後面兩個手下跟著大哥在笑。
 
「咩人嚟咖？」好奇心驅使下我在阿麵耳邊問。
 
「哦冇……佢叫戚仔，以前我同雅瑪都係由細玩到大。不過自從有一件事之後，我地就反咗面。之後我地就冇再一齊玩。」阿麵解釋。
 
戚仔聽到後突然激動的大叫：「阿畢嘅事唔係因為我啊！根本係意外！根本係意外！我叫咗佢唔好咖！」
 




「嘩……佢咁激動嘅，仲以為佢好鍾意得得戚戚所以叫戚仔添。」我低聲說。
 
「唔係啊……佢姓戚，而且佢的確真係好鍾意得得戚戚。」阿麵補充。
 
這時候，戚仔留意到我，對我說：「喂隔離嗰個，你咪琴日扮洙神暗大嗰個？唔好痴埋呢個人咁多啊，因住連你都害死埋啊。」
 
我望一望阿麵，阿麵對著戚仔說：「如果唔係你當時為咗認叻想追到雅瑪，阿畢就唔會因為救你而死！」
 
戚仔變得更加憤怒，雙手握緊拳頭，仿佛下一秒就會衝過來將阿麵暴打一番。
 




「哎啊，都過咗咁耐啦，你地唔好嘈啦。」雅瑪無奈的走出來調停。
 
豈料下一秒，戚仔收起所有憤怒的情緒，露出剛才輕佻的笑容。
讓潛意識擺出防禦姿勢的我輕了一口氣，因為我都頗為肯定，我應該打不過他們幾人。
 
「既然我最愛嘅雅瑪叫到，我就唔嘈啦。」戚仔說。雅瑪頓時反了一下白眼。
 
「不過呢我就喺山邊有個寶箱搵到呢把臥月刀，我呢就想試下刀。」戚仔這時候從腰間口袋中拿出一把套在一個黑黃色刀鞘的西方短刀。
 
「大佬好嘢！」「戚哥好嘢！」這時候戚仔後面的兩名手下和應。
 
「喂戚仔，唔好亂玩刀啊。」阿麵緊張的說。
 
「點啊，頭先唔係好大聲咖咩，冇能力點樣可以保護到雅瑪？」這時候，戚仔正準備將短刀從刀鞘拔出。
 




眼見氣氛相當緊張，為免發生意外，我不禁講出了一句：「喂喂喂，阿阿阿……戚仔係咪啊？」
 
「戚哥啊！」手下這喝著我。
 
「係係，戚哥，我就唔知你地咩事啦。不過你把刀……其實係擝唔到出嚟咖！你知唔知點解啊？」我嘗試緩和氣氛地和戚仔那邊談話。
 
「點解啊？」戚仔問。
 
「因為你呢把叫臥月刀啊嘛，即係臥刀……所以，臥刀不能拔。」我說。
 
「……」
 
「……」
 
我不知道這時候說一個爛GAG是不是好機會，畢竟我也很少處理這種情況。而我唯一最擅長就是講爛GAG，希望能夠以此緩和氣氛。不過我能確信，現在氣氛一定比太空還要靜。




 
「嘻嘻……英文，although不能but。」我還要繼續補充。
 
「大佬，佢明撚化你喎。」手下站出來說。
 
戚仔點一點頭，架起刀子說：「你咁多嘢講，原本我都係諗住嚇下你地，依家我第一個隊你先。艾蒙，俾個機會你搞掂呢個小丑。」
 
談判反而失敗了，戚仔將臥月刀拋給他的手下艾蒙，似乎有點讓人小看了。我下意識再舉起防禦姿勢，雙手擋在面前，打算在艾蒙攻擊前擋下攻擊，受傷少不免但至少避開要害。
 
「大佬，擝唔到喎……」艾蒙不斷用力將短刀從刀鞘拔出，但他花盡九牛二虎之力都拔不出來。
 
另一個手下都走上前一起研究：「喂有冇搞錯咖，你影衰大佬啊。」
 
豈料兩人合力都不能把短刀拔出來，短刀瞬間成為了雷神之鎚。短刀和刀鞘並不是卡住了，若然是卡住的話，總會有移動的空間。但現在像是二位一體般。
 




「喂你地搞乜嘢啊？！」戚仔忍不住加入研究。然而三人都百思不得其解。
 
「明明頭先拎嚟嗰陣仲用得咖喎……」戚仔一面疑惑，看著我想了想：「小丑，你頭先講咗咩話？」
 
「我？」我指住自己，一時不習慣被人叫小丑。
 
「係啊！我拋把刀俾艾蒙之前啊。」戚仔說。
 
「我……講咗咩啊……」我自己都想了一想：「戚哥？唔知你地咩事？」
 
「唔係啊，你講個爛GＡＧ啊！」戚仔不耐煩的說。
 
「臥刀不能拔？」我疑惑。
 
聽到「臥刀不能拔？」，這時眾人露出驚訝的樣子，同時都有一個恍惚大悟的表情。




 
戚仔不慎把臥月刀跌在地上，慢慢和兩個手下後退。「唔通語意極者係真咖……我地都係走，阿麵你好彩。」
 
戚仔和兩個手下頭也不回地離開了，連跌在地上的臥月刀都沒有帶走。
 
「咩語意極者話？」我疑惑著。
 
我把刀拾起來檢查一下，完全沒有發現問題，短刀能從刀鞘順滑拔出。隨意揮了幾下，也沒有發現什麼異樣，就是一把刻有月亮的一把短刀。
慢著，他們幾人都無法把刀拔出來，我就可以，難道我就是傳說中的勇者？
 
「原來阿佑你係語意極者……」阿麵驚訝的搭著我肩膀說。
 
「多謝你啊，阿佑。如果唔係你，我又會俾佢煩死咖喇。」連雅瑪對我的態度都180度轉變。
 
「我想問咩係語意極者？」我問。
 
「呢樣嘢有啲難一時三刻去講，我地坐低再講。」阿麵提議。
 
我們在雅瑪的木頭車後面找來三張椅子，阿麵開始解釋：「首先你好可能係語意極者，其實我地每一個人都係語意力者，分別在於語意力值嘅高低。而語意力值高嘅人，我地會叫語意極者。」
 
「就係因為阿佑頭先講咗句『臥刀不能拔』，跟住把刀真係擝唔到出嚟。」雅瑪說。
 
「無錯，語意力點用呢，就係由你講句爛ＧＡＧ去發動，達到一個改變現實嘅能力。之所以要靠爛GＡＧ發動，就係因為佢本身語意矛盾、唔合邏輯。」阿麵解釋。
 
「哦……我醒起喇，唔怪得知琴日我講完句忙到甩碌，出面架飼料手推車真係甩咗個碌。咁但係個個都識講爛ＧＡＧ咖喎，咁呢個世界咪大亂囉。」我提出。
 
「原來琴日係因為你！」阿麵說：「呢個就係取決於語意力高低，同時亦取決於你對發動能力嘅信念。好少人係天生高語意力值，多數都係靠後天去訓練。」
 
「阿麵你好犀利，點解你會識咁多呢啲嘢……」雅瑪讚嘆說。
 
「邊邊…邊係呢，因為曾經有試過自學訓練，但係都唔係好成功咁，所以嗰陣都有睇過相關嘅資料。」阿麵解釋。
 
「總之即係如果我講個爛GAG，而個爛GAG就會改變現生發生嘅事咁？」我提問。
 
「大概就係咁……」阿麵點頭說。
 
空氣突然變得安靜了一下，信息量一下變大變多了。果然來到這個世界就是要成為特別能力者吧。
 
「啊，阿佑，你套衫我搞掂喇，你睇下啱唔啱著。」雅瑪想起她接了我的訂單。
 
我在木頭車後方不遠的地方有一個更衣室，我將身上的制服換上了這套衣服。
衣服十分貼身，裝飾和皮帶看上去也十分合適。完全就是動畫中的勇者主角。
 
「好fit啊，唔該曬雅瑪。」我道謝說。
 
「雖然你救咗我，但係你都要俾錢咖！」雅瑪說。
 
我指著阿麵：「佢俾……我冇錢……」
 
雅瑪又變回剛才不屑的樣子，「哼」的一聲將向阿麵拿了錢。我們就離開了市集。
 
今天完全是勇者的起手開局，辦領了異世界身份證，得知了自己擁有了語意力。已經在腦中幻想了千百萬種可能性。
難道，在昨晚的夢中，阿占所講的，應該多說爛GAG，就是這麼一回事嗎？
 
「＃＃訊息提示聲＃＃」
 
「Ｓｉｒ，系統感知到樹春上村有語意力發動嘅信號。」
 
「樹春上村咁遠，而且又暫時冇辦法入去嗰邊……同我派佢地幾個人去偵測下，睇下係咩料，唔可以放過任何機會。」
 
「收到！」