【異世界】異式幽默: 第六章：語意力研究

第六章：語意力研究
 
我和阿麵到回到裝備店，遇上雅瑪被戚仔騷擾。原來戚仔也是他們的青梅竹馬，因事情而反目。戚仔其後惱羞成怒，打算以拾來的臥月刀傷害我和阿麵，機玄巧合之下發現透過爛GAG發動的語意力。
 
「臥刀不能拔！」
 
「臥刀不能拔！」
 
「臥刀不能拔！」
 




在另一天的早上，我吃過早餐後就在練習自己的語意力。原來能力都不是每次都能發動，阿麵解釋過語意力需要足夠的專注才能達到效果。
情況就有點像星球大戰中使用原力去移動物件的原理有點類似。
 
今天的工作也是同早兩天一樣，不同的是，今天總是心不在焉，不斷在構思有什麼爛GＡＧ可有實際作用。
但與黃子華棟篤笑曾經說過的話一樣，笑話一定要伴隨著事物而誕生。刻意去想一個笑話，反而什麼都說不出來。
 
「阿佑，你仲諗緊語意力嘅嘢啊？」阿麵在我們休息時問。
 
「係啊，我諗緊有咩爛GＡＧ可以用，到時就可以拎出嚟旁身。但係突登去諗又諗唔到喎。」我說。
 




阿麵想了想：「都幾難諗，我唔係好識諗呢啲。不過我覺得都唔使一定間硬諗，你咪有本簿嘅，當你遇到適當嘅時候記低佢咪得囉！」
 
「有道理！」我說。
 
於是我打開記事本，寫下記下「爛GＡＧ」「臥刀不能拔」幾個字眼。
 
「不過其實有冇邊個識語意力嘅前輩可以問到？如果有個人幫手又唔同講法。」我提出。
 
「以我所知，我地條村冇人識用語意力……」阿麵遲疑了一下。「我地雖然都知道語意力者係點樣嘅一回事，但係多數人都當係傳說或者神話。」
 




「但係都有去過其他地方咖嘛，或者其他地方有？」我提出。
 
「至少到今日都冇聽過人講，其實我地好多人都冇離開過呢條村，就算有都只係去隔離附近嘅村。始終呢度太偏僻，第二條村都講緊係一個好遠嘅位置。」阿麵解釋。
 
「咁樣啊…」我想了想，向阿麵提出了邀請：「有冇興趣一齊去研究下語意力嘅事？可能去皇城？大城市？」
 
阿麵苦笑的指一指自己豬舍的位置，說：「邊行得開啊，老豆已經決定將豬欄第時交俾我打理咖喇，應該冇機會周圍去。」
 
這時候空氣變得安靜了，阿麵似乎要一輩子在豬舍工作。但我呢？既然得到了能力，沒可能永遠留在這村子吧。我一定要去看看外面的世界，甚至過更好的生活，賺更多的錢。
 
「啊……都唔係冇機會知嘅。」阿麵突然想起一些事。「每個月都會有商隊經過我地村咖，佢地始終喺出面嚟，或者佢地可能知啲嘢都唔出奇喎。」
 
突然收到這個消息，似乎又有了一點眉目：「可能真係知喎，咁佢地會幾時嚟咖？」
 
「計返日子好似就係聽日！」阿麵看一看日期說。




 
「咁ｆｉｔ曬！」我說。
 
「不過我地要低調啲，唔好俾屋企人知道你有語意力呢件事。」阿麵說。
 
「吓……點解啊？」我問。
 
「畢竟你係全條村唯一一個，雖然唔肯定戚仔會唔會周圍同人講，但係越少人知麻煩會越少。」阿麵說。
 
「就好似蜘蛛俠都唔會周圍同人講佢係蜘蛛俠咁……」我說。
 
「蜘蛛俠？係咪爛ＧＡＧ？」阿麵問。
 
「啊……唔係啊……總之我明咖喇。」我笑說。
 




「咁我去同雅瑪講聲先，因為商隊交易一定要登記咗嘅人先去得。而雅瑪嘅裝備鋪就係有登記嘅，到時我地就會跟埋佢去咖喇。而且佢都係目擊過語意力發生，係自己人所以冇事嘅。」阿麵說。
 
我舉起手指公說：「ｏｋ啊，就咁啦。咁我地做埋啲嘢之後就去搵雅瑪啦。」
 
阿麵點頭和議，大家就繼續埋頭苦幹將手頭上的工作盡快完成。