我係鹹濕仔: 04 爆谷

04 爆谷

珊珊係我組女嚟，身為血氣方剛嘅組爸，梗係睇中佢又可愛又純情。而且，淨係講兩句氹佢嘅說話，佢都開心都癲咗。

不過咁，拍咗三個月拖，我哋上個星期，先第一次真正嘴對嘴咁錫過，只係嘴唇輕輕掂吓咋！唉，鬼叫佢除咗可愛純情，仲係A0咩。我已經就住佢，唔好操之過急，但係佢咁索真係好難忍！

拖手嘅時候，點會淨係十指緊扣咁簡單吖。今日就試吓用手臂去揩吓波邊，感受吓小波濤先。呀⋯⋯再挨過啲⋯⋯唔⋯⋯軟腍腍好舒服～

珊珊行開咗少少，偷望一望我一下，冇出聲。面紅紅嘅佢真係好得意。





佢抱住我嘅手臂，我特登用另一隻手拉低啲佢隻手，手臂又再揩到小波濤喇！今次仲有少少波浪添，正到暈呀⋯⋯

不經不覺，隨波逐流嘅我哋已經到咗小食部：「唔該一個大爆谷餐。」

我望到珊珊好似見到英雄咁望住我，我氣量都大啲呀：「嘢飲要升級珍珠奶茶，少甜少冰。」

哈哈！最佳男友仲唔係我？

我氣宇軒昂咁打開個銀包拎錢，裡面得返幾張20蚊紙。OH SHIT！唔記得咗呀妹搶咗我嗰100蚊呀！頂！





嚇到面都青埋，點算呢⋯⋯八達通唔知仲有冇錢⋯⋯我洩咗道氣，細細聲咁同職員講：「八達通吖。」

咇咇⋯⋯

「唔夠錢喎細佬，呢度冇增值。」

「你負咗錢呀？我畀吖。」珊珊搶閘幫我嘟咗。

哇！原來你先係我英雄！珊珊我愛你！





咦？咪先⋯⋯佢係咪唔記得咗係我要請佢食？



//