《我阿媽淘寶淘到成屋都係"假人"》短篇8章+結尾: 第一章：屋企多咗個「人」

第一章：屋企多咗個「人」

我真係好撚憎淘寶。

唔係話歧視定點，而係我阿媽個淘寶癮已經去到病態嘅地步。我哋住緊藍田舊式公屋，本來三百幾呎住兩個人已經唔算闊落，依家仲要俾佢啲戰利品佔領咗大半個廳。

每日放工返屋企，推開鐵閘，迎接我嘅唔係飯香，而係一座座由啡色紙箱堆成嘅「長城」。

「阿媽，你又買埋啲咩垃圾啊？行都無路行啦！」我一邊踢開門口幾袋集運膠袋，一邊除鞋。





阿媽坐喺梳化堆雜物中間，對眼無離開過手機螢幕，手指飛快咁掃緊：「咩垃圾啊？呢啲好嘢嚟架，限時秒殺，唔買就笨。」

我嘆咗口氣，費事同佢嘈。行入廚房斟水飲，突然覺得背脊有啲寒寒地，好似有人望住我咁。

我猛然回頭。

喺廳嘅角落，即係神枱隔離個位，唔知幾時多咗個「人」。

嗰下我真係嚇到個心離一離，差啲噴咗啖水出嚟。





定睛一望，原來係個假人模特兒。即係旺角啲時裝舖擺喺門口，著住衫嗰啲塑膠公仔。

不過呢個公仔有啲怪。平時舖頭見嗰啲，多數無樣，就算有樣都係畫得好求其。但呢個公仔，五官造得異常逼真。

佢著住阿媽件舊碎花睡衣，皮膚係嗰種死白死白嘅塑膠色，但對眼……對眼畫得好精細，眼珠黑漆漆咁，好似戴咗大眼仔con，直勾勾咁望住廚房呢邊。

「做咩買個公仔返嚟啊？嚇死人咩！」我忍唔住大叫。

阿媽終於捨得放低手機，望咗一眼個公仔，嘴角竟然泛起一絲慈祥嘅笑意：「靚唔靚啊？店主話清倉大減價，九塊九包郵咋！我見屋企啲衫無位掛，買個公仔返嚟著住，咪唔洗摺囉，幾省位。」





「省位？你個腦裝屎架？咁大舊嘢擺喺度叫省位？」我真係火都嚟埋。

「你識咩啊，阿『小美』好乖架，又唔會駁嘴，又唔會嫌我煮飯難食。」阿媽行埋去，竟然伸手摸咗摸個假人個膠頭，動作溫柔到令我毛骨悚然。

「小美？」連名都改埋？

我懶得理佢，轉身入房打機。

嗰晚，我戴住耳機同班friend打LoL，打到凌晨兩點幾先訓。

人有三急，半夜起身去廁所。

一出房門，全屋黑麻麻。公屋啲走廊燈壞咗好耐都無人整，得窗外少少街燈透入嚟。

我迷迷糊糊咁行過客廳，經過神枱嗰個位。





下意識望咗一眼。

空嘅？

原本擺喺角落頭個「小美」，唔見咗。

我個腦即刻醒咗一半。唔通阿媽半夜三更搬咗佢入房？

就喺我疑惑緊嘅時候，我聽到身後傳嚟一陣極其輕微嘅聲響。

「喀……喀……」

似係塑膠摩擦地板嘅聲音。





我全身僵硬，慢慢轉身。

藉住微弱嘅月光，我見到個假人「小美」，竟然企咗喺我阿媽間房嘅門口。

佢個姿勢變咗。

原本佢係雙手垂低，好似一般站立咁。但依家，佢隻右手舉起咗，手指屈曲，正正係握住門把嘅姿勢。

而佢個頭，扭轉咗一百八十度。

嗰對黑漆漆、畫上去嘅眼珠，喺黑暗中死死咁盯住我。

佢個嘴角，唔知係光影問題定係我眼花，好似比朝早嗰陣，揚起咗少少。

似係喺度笑緊我。





「阿……源……」

一把沙啞、斷斷續續嘅聲線，喺寂靜嘅客廳響起。

唔係阿媽把聲。

把聲係從個假人個口入面傳出嚟嘅，聽落好似兩塊發泡膠摩擦咁刺耳。

「你……阿媽……買咗……好多……朋友……俾我……」

我嚇到腳軟，一屁股坐咗喺地下。

與此同時，我見到大門口嗰堆未拆嘅淘寶紙箱，其中一個最大嘅箱，突然郁咗一下。





紙箱裡面，傳出咗指甲刮紙皮嘅聲。

「滋……滋……」

我終於明白，阿媽口中嘅「限時秒殺」，到底殺嘅係咩。