成長的天空: 開學日

今日係九月一日，全港中小學生開學嘅大日子。一如往年，我好唔願意咁起身返學。hea咗成個暑假，真係好唔習慣咁早起身！

自我介紹吓先，我叫陳家輝，個名勁老土！呢個世代，仲邊有人會改自己個仔個名叫家輝㗎？勁老土、勁娘囉！我同阿爸阿媽响幾個月前，先搬嚟呢個有三十幾年樓齡嘅居屋屋苑，阿爸做食環，阿媽就返茶記做早更part-time，都算係窮窮哋嘅小康之家。

我今年升中一，阿媽話冇理由跨區返學咁嘥時間，於是求其揀咗間近屋企嘅中學報讀。就咁，我就入咗呢間「廣東潮汕總商會劉力行紀念中學」嘞！

呢個潮汕商會，响區內仲有間直屬小學，叫「廣東潮汕總商會劉博學紀念小學」。聽講劉力行同劉博學係兩兄弟，死鬼咗㗎啦，係白手興家嘅潮州商人。呢兩間學校响區內薄有名聲，正所謂「博學力行，輸波打人；唔夠人打，周身傷痕」！咁你知呢兩間學校咩料啦！

我讀F1B，班主任係個姓楊嘅中年肥大叔，教我班Maths。好羨慕隔離1A班，頭先响操場集隊嗰陣，見到1A班個班主任係個年輕靚女Miss。天呀，點解我唔係讀1A㗎？！



同班同學大部份都係由「博學」升上嚟嘅，我原本响另一區讀小學，所以我响呢班咩人都唔識，完全冇fd。

第一日返學，都係舉行開學禮、聽個肥婆校長廢噏吓呀，班主任派吓通告呀，講吓校規班規呀，調吓位呀，選吓班長呀，咁囉。

無驚無險，又到十二點，走人！