【校園青春】為咗報復初戀，我搵咗個MK仔做水泡，最後仲懲治咗全校最受歡迎嘅男神: 第三十九章：iOS 更新與二十四個未接來電

返到屋企，第一件事唔係換衫，而係即刻攞起電話 text 阿浚。
我：「我返到啦！你行返去未呀？」
浚：「啱啱到樓下，你沖個涼休息下先啦，今晚再傾。」
秒回。
呢種被重視嘅感覺，真係好耐冇試過。

我沖完涼，攤喺床上，一邊敷住 mask，一邊碌 IG。
阿浚嘅 IG 充滿咗生活品味，有佢打籃球嘅相，有去 cafe 嘅相，仲有啲風景相。
我忍唔住喺佢最新嗰個 post 留咗個言，send 咗個心心眼 emoji。
佢好快就 reply 咗我一個壞笑嘅 emoji，仲 DM 我一張佢啱啱沖完涼頭髮濕濕地嘅自拍。




浚：「洗完白白，香噴噴。」
我望住張相，雖然只係影到鎖骨以上，但係嗰種荷爾蒙嘅張力，搞到我面紅耳熱。

就在我同阿浚你一句我一句，傾得興高采烈嘅時候，電話突然震得好勁。
我彈出 WhatsApp 列表一睇，眉頭即刻皺埋。
置頂嗰個對話框，顯示住「傑 (24)」。
二十四個未讀訊息！
時間由放學四點幾開始，一直轟炸到而家七點幾。

傑：「BB 放學未呀？」




傑：「做咩唔覆機嘅？」
傑：「係咪發生咩事？」
傑：「我好擔心你呀，覆下我啦。」
傑：「打比你又唔通，你去咗邊？」
傑：「係咪嬲咗我？」
……

我由頭碌到落尾，除咗煩厭，完全冇其他感覺。
以前覺得佢咁樣係緊張我，而家覺得佢簡直係恐怖情人，係窒息嘅來源。
我同阿浚傾計傾得咁開心，邊得閒理你啲無聊問候？




但我知如果我再唔覆，佢分分鐘會衝上我屋企或者打比我阿媽。
我反白眼，求其作咗個藉口。

我：「哎呀，頭先部電話壞壞地，我不小心撳咗 update iOS，佢卡住咗成幾個鐘郁唔到呀！啱啱先開得返機，嚇死我以為部機壞咗。」
我：「而家冇事啦，不過我要去食飯做功課啦，遲啲再講。」

打完呢兩句，我完全冇等佢回覆，直接跳返出去同阿浚繼續傾。
至於阿傑信唔信？
Who cares？
Update iOS 呢個藉口雖然爛，但係對於一個我已經唔想再花心思嘅人黎講，已經係皇恩浩蕩。