【校園青春】為咗報復初戀，我搵咗個MK仔做水泡，最後仲懲治咗全校最受歡迎嘅男神: 第四十章：星期六的「軍師會議」

轉眼就到咗星期六。
按照慣例，星期六係我同阿傑嘅「拍拖日」。
通常我哋會去行下商場，食啲平民嘢，或者返佢屋企打機（其實係睇佢打機）。
但係今個星期，我早幾日已經同佢講：「今個禮拜六我要幫阿媽大掃除，出唔到嚟啦。」
阿傑雖然好失望，但都唯有話：「咁好啦，你辛苦啦，記得飲多啲水。」

呃完佢之後，我轉個頭就約咗我嘅好姊妹——靜靜。
靜靜係我嘅中學同學，亦係我嘅戀愛軍師。
佢份人講嘢好直，最鍾意品評男人，而且佢嘅格言係：「女人青春有限，千祈唔好浪費喺垃圾身上。」
我哋約咗喺銅鑼灣一間好 high class 嘅 cafe，叫咗兩杯貴到飛起嘅 latte 同一份 pancake。





「快啲講！咩料呀？」靜靜一坐低，連啖咖啡都未飲就急不及待問我，「你話有新目標？阿傑點算？」
我攞出手機，開咗阿浚嘅 IG 比佢睇。
「你睇下呢個。」

靜靜接過手機，手指快速滑動，雙眼即刻發光。
「哇！屌！好大隻喎！」佢忍唔住爆咗句粗，「呢啲貨色你喺邊度搵返嚟㗎？個胸肌……嘖嘖嘖，想夾死人咩？」
佢放大咗阿浚打波嗰張相，仔細研究佢啲肌肉線條。
「個樣都正喎，陽光型，有點似彭于晏……唔係，有啲似你之前條仔阿俊！」
「係呀！」我激動咁拍枱，「我第一眼見到佢都係咁諗！連個名都一樣叫阿浚！」





靜靜放低電話，一臉認真咁望住我：「Hiu Ching，我話你知，呢啲係極品。識貨。」
「咁……阿傑呢？」我雖然心入面有數，但都想聽下軍師意見。
「阿傑？」靜靜冷笑一聲，眼神充滿鄙視，「嗰個弱智仔？」
佢攞起隻叉，指住碟上面舊 pancake。
「阿傑就好似快餐店啲薯條咁，你肚餓嗰陣，冇錢嗰陣，求其塞飽個肚係OK嘅。但係食得多熱氣呀，又冇營養，仲會搞壞身子。」
佢再指指手機入面阿浚張相。
「呢個阿浚，係 A5 和牛，係 Omakase。你而家有機會食和牛，你仲留戀包薯條做咩？」

我聽得頻頻點頭，覺得佢講得太有道理。




「但我同阿傑一齊咗都一段時間……突然分手好似好衰咁。」我扮下猶豫。
「衰咩啫？」靜靜白咗我一眼，「你唔係想同佢過人世呀嘛？上次你話佢連買包糖都要 AA 制，我已經叫你飛咗佢啦！Junk food 嚟㗎！食壞人㗎！」
佢飲咗啖咖啡，語重心長咁講：「趁而家阿浚對你有意思，快啲斬纜。拖泥帶水，兩頭唔到岸你就最蝕底。」