【校園青春】為咗報復初戀，我搵咗個MK仔做水泡，最後仲懲治咗全校最受歡迎嘅男神: 第四十三章：逍遙遊與漫長的等待

快樂嘅時間過得特別快，數學堂完咗。
阿浚好gentleman咁幫我執好嘢，送我行返去我原本個班房門口。
「陣間放學我嚟接你。」佢喺我耳邊輕輕講咗句，然後揮手走人。
我望住佢背影，成個心都跟埋佢飛走咗。

最後一堂係中文堂。
中文miss喺台上講得好激昂：「莊子嘅《逍遙遊》，講求嘅係否定世俗的『有用』標準，認為執著於功名利祿，反而被束縛……」
我托住腮，望住窗外嘅雲，完全聽唔入耳。
咩大瓠，咩樗樹，我淨係知我而家好似搵到我棵樹。
我被困喺呢個班房入面，度日如年。




我不斷望鐘，秒針每跳一下都好似慢動作咁。
腦入面全部都係阿浚頭先句「陣間放學我嚟接你」。

佢琴晚WhatsApp話本身想買零食比我食，但我話驚肥，最後佢話：「咁不如放學帶你去食甜品？我知道有間糖水舖啲楊枝甘露好正。」
甜品呀！
比起阿傑成日帶我去食M記或者茶餐廳，阿浚嘅約會提議永遠都咁有心思。
我偷偷攞出個鏡仔照下，補一補個潤唇膏，撥好啲劉海。
我要以最靚嘅狀態去見佢。

第四十九章：1.9米的等待與口罩之吻





「鈴——」
救命鐘聲終於響起！
阿Sir句「落堂」都未講完，我已經執好晒嘢。
一衝出課室門口，我就見到嗰個鶴立雞群嘅身影。
1.9米高嘅阿浚，倚喺走廊欄杆度，雙手插袋，戴住個黑色口罩，淨係露出一對深邃嘅眼。
周圍放學嘅同學經過佢身邊都要抬頭望，佢就好似自帶聚光燈咁。

見到我出嚟，佢眼角彎起，伸出一隻手。
我毫不猶豫咁行埋去，將手放喺佢手心。




佢一握實，就拉住我向樓梯口行去。
沿路好多人望住我哋，但我已經唔介意。
我哋行出校門，向巴士站方向行去。
雖然係放學時間好多人，但佢完全冇避忌，一直拖住我。

去到巴士站，咁啱有架車走咗，要等下一班。
我哋企喺站牌後面少少嘅位置，比較隱蔽。
佢突然轉身，雙手環住我條腰，將我成個人拉向佢。
我成個人貼喺佢心口，聽到佢強而有力嘅心跳聲。
「好掛住你呀。」佢低頭望住我，聲音沙沙地。
「頭先咪見完囉……」我面紅紅咁講。
「見唔夠。」
佢慢慢烏低身，越湊越近。
我緊張到閉上眼，心跳快到要爆。
隔住口罩，我感覺到佢溫熱嘅嘴唇印落我塊面度。




雖然隔住兩層口罩，但嗰種觸感異常清晰，好似有電流穿過塊面直達心臟。
呢個「口罩之吻」，喺呢個疫情時代，竟然有一種特別嘅浪漫同禁忌感。

巴士嚟到，我哋上咗車去市中心食甜品。
間舖頭裝修好文青風，燈光柔和。
我哋叫咗兩碗楊枝甘露同一個心太軟。
等食嗰陣，佢隻手依然冇閒著，喺枱面上面捉住我隻手玩。
佢摸下我啲手指，又捏下我手掌，好似當我隻手係玩具咁。
我望住佢，覺得自己好似變返個細路女，被寵愛住。

甜品到咗，真係好甜，但更甜嘅係佢嘅舉動。
佢主動幫我畢起一啖心太軟，吹凍咗先送到我嘴邊：「啊——」
我張開口食咗，朱古力流心喺口入面爆開，甜到入心。
成餐甜品，我哋你一啖我一啖，完全旁若無人。





食完之後，我習慣性咁攞出銀包想比錢。
畢竟同阿傑一齊咁耐，我已經被訓練成「AA制」專員，連買包糖都要除返開兩份。
點知阿浚一手搶過張單，另一隻手撳住我個銀包。
「做咩呀？」我愕然。
「傻豬，同我出街邊有叫女仔埋單㗎？」佢好自然咁攞出左張卡，「收埋佢啦。」
「但係……」
「冇但係。我請你，係我榮幸。」佢單眼笑咗一下，然後起身去櫃檯埋單。

望住佢個背影，我心入面嗰個天秤徹底冧咗。
唔係因為錢嘅問題，幾十蚊甜品我都比得起。
而係嗰種態度。
阿傑連幾蚊都要計較，阿浚就覺得照顧女仔係天經地義。
高下立見。
有啲人，真係連糖都要AA；有啲人，恨不得將全世界比晒你。