【校園青春】為咗報復初戀，我搵咗個MK仔做水泡，最後仲懲治咗全校最受歡迎嘅男神: 第四十二章：頹飯堂裡的愛心烏冬

第二日返到學校，我成個上晝都處於一種極度亢奮嘅狀態。
平時覺得沉悶嘅課堂，今日過得特別快，因為我個腦入面淨係諗住晏晝嘅數學拔尖堂。
其實拔尖堂教乜我根本唔care，重點係，呢堂係全校精英混合上堂，即係話——我可以名正言順同阿浚一齊坐。

終於捱到 lunch time。
我哋學校係封閉式管理，冇得出去食，所有學生都要留喺學校食嗰個傳說中嘅「頹飯堂」。
啲飯又硬又乾，啲汁又稀，平時我食兩啖就想倒咗佢。
我拎住盤頹飯，周圍望搵位，一眼就見到阿浚坐咗喺角落頭個窗邊位向我招手。
陽光灑落佢身上，佢成個人好似發光咁，同周圍灰沉沉嘅飯堂格格不入。





我行埋去坐低，正想扒啖飯，阿浚突然撳住我隻手。
「咪食呢啲垃圾啦。」佢眉頭輕皺，眼神充滿嫌棄，「冇營養㗎。」
「咁冇計㗎，鬼叫學校唔比出去食咩。」我扁扁嘴。
佢好似變魔術咁，從書包攞出一個好精緻嘅保溫飯壺，一打開，一股濃郁嘅咖喱香味即刻爆發出嚟，甚至蓋過咗飯堂本身嗰陣油益味。

「登登登登！焗豬扒咖喱撈烏冬！」佢一臉自豪，「我今朝早起身整㗎，仲熱㗎。」
我眼都凸埋：「你識煮飯？」
「少少啦，見你咁瘦，驚你食學校飯暈低嘛。」佢將個蓋當做碗，分咗大半比我，「試下？」

我望住碗烏冬，啲豬扒金黃酥脆，咖喱汁杰撻撻掛喺烏冬上面，仲有幾舊紅蘿蔔同薯條。




我食咗一啖，好食到想喊。唔係講笑，真係好食過出面餐廳。
「好唔好食？」佢托住腮望住我食。
「好食！超好食！」我點頭如搗蒜。
「好食就食多啲。」佢笑得好溫柔，自己就食剩低嗰少少。

呢個時候，我感覺到周圍有好多視線射過嚟。
後邊幾枱女同學開始竊竊私語。
「喂，你看下嗰邊，5B班個男神阿浚呀……」
「佢同邊個食飯呀？好似係5E個Hiu Ching？」
「佢哋咩關係呀？share飯盒食咁sweet？」




「唔係拍拖呀嘛？Hiu Ching唔係有仔㗎咩？」

聽到呢啲議論，我唔單止冇尷尬，反而有一種極大嘅虛榮感。
被全校最正嘅男仔照顧，成為眾人焦點，呢種感覺真係好high。
比起同阿傑食飯，佢只會掛住打機，或者計較邊個比錢，阿浚簡直係另一個層次嘅生物。

食完 lunch，我哋一齊行去特別室上數學拔尖堂。
一入課室，佢好自然咁拉開佢隔離張櫈：「坐呢度。」
然後佢直接將我張枱拉埋去佢張枱度，兩張枱拍到實一實，中間連條那都冇。
老師入嚟開始講書，係講啲好深嘅微積分。
我本身數學就麻麻，聽咗兩句就想遊魂。

突然，我感覺到大腿邊有啲嘢郁動。
我低頭一瞄，見到阿浚隻手喺枱底慢慢伸過嚟，輕輕掂咗下我隻手背。
我心跳即刻加速，緊張咁望向講台上面嘅阿老師。




老師正背對住我哋寫黑板。
阿浚見我冇縮手，就大膽咁捉住我成隻手，然後十指緊扣。
佢隻手好大，好暖，手指修長有力，完全包住我隻手。

「喂……比老師見到死得㗎……」我壓低聲線，用氣音同佢講，面都紅晒。
「驚咩啫，佢寫緊字。」佢側過頭，壞壞咁笑，眼神充滿挑逗，「定係你唔想我拖？」
「唔係……」我口裡說不，身體卻很誠實，反手握緊咗佢。

呢種感覺，除咗心動，仲有一種好強烈嘅背德感同刺激感。
喺嚴肅嘅課堂上面，喺老師眼皮底下，我哋偷偷地做緊啲親密行為。
每一次老師轉身望過嚟，我哋就扮聽書，但枱底隻手依然拖到實一實，手心都出晒汗，濕濕地，滑滑地，但我完全唔想放開。

望住佢專注扮聽書嘅側面，我腦海突然閃過以前嘅畫面。
以前同阿俊一齊嗰陣，因為正值停課，我哋從來冇試過一齊返學，更加冇試過喺課室拍拖。
我曾經幻想過無數次，復課之後，我哋可以著住同一套校服，喺班房眉目傳情，放學一齊行。




可惜，阿俊退咗學，我哋無疾而終。
「可惜沒如果」，呢句歌詞成日喺我腦海出現。
但係而家，阿浚幫我圓咗呢個夢。
佢著住同我一樣嘅校服，坐喺我隔離，做緊我以前最渴望做嘅事。
望住佢，我分唔清我係鍾意佢，定係鍾意佢填補咗我對初戀嘅遺憾。
但我知，這一刻，我沉船了。