【甜】《那一年，我是一個援交妹》: 罰留堂

由上個學期開始，嗰幾個女仔就一直會畫花我張枱去唱衰我。

佢哋試過寫我係「綠茶妹」、「狐狸精」，話我周圍溝仔，玩弄啲男仔感情，搶人男朋友。

好似寫極都唔厭。

我靜靜地喺黑板度，拎起個粉刷擦返走啲字，之不過用粉刷擦，好似只會越擦越污糟…

Lunch過後係兩節數學連堂，今日阿sir一嚟就教微積分，我數學底子唔好，聽唔明，都跟唔上，臨落堂前，仲要派卷俾我哋操卷，我一題都唔識答。





「同學，你落咗堂過嚟搵我。」

「係…」

唉，可能個阿sir見到我趴咗喺枱度玩筆又唔做卷，就罰我留堂。

但當我落到教員室嘅時候，佢又要我企喺外面等佢一陣，嗰個一陣係…我等咗佢差唔多成廿分鐘佢先出返嚟。

「呢份卷你依家再做多次，俾返半個鐘你，你就企喺呢度做，開始計時。」





佢遞咗份卷俾我，然後又翹埋雙手入返教員室，我望住面前呢份卷，同啱先上堂嗰份完全係一模一樣，咁既然頭先我唔識，過咗半個鐘後嘅我，都唔會變到識做…

結果我喺教員室外面呆企咗半個鐘，企到對腳都有啲攰，時間一到，阿sir今次準時出返嚟。

「又交白卷？俾咗半個鐘你一題都做唔到？咁你頭先喺度做乜？」

阿sir見到我份卷又空白一片，就火山爆發咁一味係咁鬧我，佢嬲到啲連青根都爆晒出嚟，本身佢都係出名惡嘅老師…

「上堂又淨係識瞓覺，你阿爸阿媽供你讀書，你就係用呢種態度返學？」





佢鬧我嘅時候，我唔敢出聲，我只係耷低頭，望住地下…鬧到咁上下，佢嬲到要停低唞大氣，於是淨係一臉怒氣咁望住我，我更加唔敢出聲，教員室走廊不時會有老師經過，時間亦都一分一秒咁過。

「攞本手冊出嚟，我要記返個留堂紀錄，俾你家長知道！」

「嗯…」

我喺書包摷咗本手冊俾佢，佢一打開，又捉到一個鬧我嘅機會。

「你睇你，開學第一日，就已經俾人記遲到同校服儀容不整。」

佢喺上面即刻撩咗幾隻字，呢個時候，我先醒起，佢會發現我偷偷冒簽咗喺遲到同儀容不正嗰欄…

死喇…我可以用咩藉口瞞過呢…

「嗱，俾返本手冊你。」好彩佢眼大睇過龍，無為意到呢個細節我先可以避過一劫。





「係…」

佢將本手冊還返俾我嘅時候，我即刻攬實本手冊，暗地裡鬆一口氣。

「呢份卷，我唔會再嘥時間，你自己搵啲叻嘅同學教返你點做，下堂再交返俾我，知唔知？」

佢再將我份白卷遞埋俾我，我伸手去接之際…

「知唔知？成日都十問九唔應。」

「知道…」

「留完堂喇，你可以放學喇。」





「係…」

當我以為我可以甩難嘅時候，阿sir臨走之前，再贈多我一句。

「唔好以為自己生得靚啲呢，就可以唔讀書，時代唔同咗㗎喇。」

「係…」

教員室走廊又恢復返寧靜，我將本手冊同份卷塞返入書包，拉好拉鍊揹返好，第一日返學就俾人捉遲到又俾人罰留堂，不過我都終於可以放學。

但對於我嚟講，漫長嘅一日只係過咗一半，放咗學嘅我，要去轉換另一個身份，趕去一個地方。

時間倉卒嘅關係，我連衫都無時間換，唯有繼續著住呢套校服去…

行到去地鐵站上到月台，坐咗幾個站地鐵，我嚟到一個繁華鬧市嘅地方。





可能係放學時間，成個地鐵站滿滿係人，咁都好，起碼唔使顯得我太礙眼。

沿住地鐵站條扶手電梯上返地面，我穿過一排排舊式唐樓，轉咗兩個街口，嚟到一幢門面相對上比較光鮮嘅酒店面前。

「呼…」比預定時間我已經遲咗好多。

我整一整返好自己啲瀏海，補返少少唇膏，深呼吸一口氣，就推開玻璃門入去。