【甜】《那一年，我是一個援交妹》: 被罰企

結果諗多兩諗，小息鬧鐘都響埋。

「起立。」

鐘聲響完，就聽到坐後排嘅男班長嗌起立，原來阿sir已經殺到入班房，佢個表情，特別係個眼神，總係兇神惡煞咁，好似全世界都差佢錢咁。

「Good morning 黃sir。」

「得喇，坐低。」





佢連早晨都懶得講，一入嚟就教書係佢嘅風格，浪費時間係佢最討厭嘅事情，呢啲都係佢自己親口講出嚟。

讀書叻嗰啲同學，先敢同佢有正常嘅交流，佢成日都話成績好係應份，唔好以為自己高分就覺得自己好叻，讀唔到書、成績包尾嗰啲，喺佢眼中應該等同垃圾，所以我完全唔敢同佢有眼神接觸。

最慘嘅係，我坐最前排，同黑板距離最近，佢經常好似幅高牆咁企喺我面前，𥇣住啲學生嚟教書。

「呢條直線，畫落去穿過呢一點，有無人答到我，係代表啲乜？」

佢啱啱用力喺黑板畫完條線，啲粉筆碎仲喺半空慢慢滲緊落嚟…





但重點係，成班都無人出聲答佢。

我就更加係唔識啦，我耷低頭，默默禱告佢唔好叫我起身答。

「你答。」

「吓？」我心跳速度幾何級數咁向上攀升。

「你。」





我開頭見佢指住個方向係我，後來原來佢係指我斜後面嘅嗰個女仔，我即刻鬆一口氣。

「欸…應該係…」

嗰個女仔欸咗陣都答唔出，阿sir又即刻指後排另一個男仔答，但個男仔都係唔識，不過佢好勇敢，直接話唔識，好彩直到第三個人終於答得出個正確答案。

佢越教就越好投入，我以為佢忘記咗尋日留堂，罰我做返份數學卷嘅呢回事，之不過…

上堂上到一半左右，佢寫幾條題目喺黑板，俾十五分鐘時間叫我哋自己做，佢交代好晒之後，就走埋嚟我位。

「你尋日份卷呢？」唉，要嚟嘅始終都係要嚟。

「我…」

「你係咪諗住唔讀書？」佢依家個樣，好似想吞咗我咁。





本身個班房已經夠晒靜，依家直程好似連空氣都靜止埋，班裡面嘅目光應該又聚焦咗落我身上。

「你企起身，企喺度上堂。」

「係…」

我都唔敢駁嘴，只能夠乖乖地聽佢話，拉開張凳企起身，全班好專心咁做緊題目嘅時候，唯獨是我一個俾阿sir罰企，而企喺度嘅我，亦都無所事事，啲題目我都唔識做，百無聊賴咁企咗十五分鐘，班上面啲同學好多都做完，我枱上面張單行紙維持住空白狀態。

到對答案嗰陣，阿sir又指住我。

「你企去壁報板嗰度，唔好遮住啲讀書嘅同學望黑板。」

「哦…」





「自己企喺度反省下。」

就係咁，我喺眾目睽睽之下擰轉身，一個人穿過一排排同學嘅枱凳，走到去壁報板前面企喺度，我旁邊係全班最高嗰兩個男仔，再隔籬兩三個位左右就係成日針對我嘅嗰幾個女仔，從佢哋啲表情睇得出佢哋嘅幸災樂禍。

而阿sir要我離開座位罰企，佢都應該無預我再有上堂嘅需要，雖然佢本身教嗰啲嘢我都係聽唔明。

其實咁樣俾人罰企都好顯眼，外面走廊有老師或者同學經過嘅話，都會擰個頭入嚟望我發生咩事，不過佢哋應該只會覺得係我唔乖，做錯事先會咁樣俾人罰企企喺壁報板前面。

我企到攰，我好奇望下周圍啲同學上堂嘅時候會做啲咩，我左邊個男仔好專心咁聽緊書。

而右邊個男仔…um其實佢係成日針對嗰班，某個女仔嘅男朋友，佢拎住枝筆好努力唔知寫緊啲咩，我一望，發現原來佢表面上就抄緊notes，實際上無聊到喺度畫緊本數學書，啲題目佢根本都唔識做，仲耐唔耐借啲意用眼尾𥄫我…