【甜】《那一年，我是一個援交妹》: 女廁

「望咩？」

我用好細微嘅聲線問，我諗只有佢先聽到。

「邊有望你。」

都估到佢唔會認，不過望我做咩啫，反正你都有女朋友，同埋乜我喺你哋眼中，唔係援交妹公廁雞咩？定係你哋啲男仔其實唔會理我咩身份，只要係女仔就會想望。

仲要就算俾我識破咗佢，我企足成堂，佢就偷𥄫咗我成堂。





終於等到落堂，阿sir直接轉身離開班房，我唔知道佢仲有無下文，不過我見佢走咗，我諗住返埋位坐。

「你真係做援交？」臨走之際，佢仲要伸隻手過嚟掂一掂我手背，細細聲問，佢嘅聲量，同樣應該啱啱好得我會聽到。

我無理佢，自顧自地返埋位，反正佢都唔係第一個咁問我。

落咗堂之後都到lunchtime，我自己一個去老闆嗰間茶餐廳嗰度食晏。

「阿妹。」





「老闆娘。」

老闆娘照舊離遠就見到我，笑住出嚟同我打招呼，我照舊都係嗌沙嗲牛肉麵，老闆亦都照樣問我使唔使加多份奄列，然後我再婉拒佢哋嘅好意。

老闆同老闆娘今日好忙，並唔係因為今日客多咗，而係好似有個員工臨時請咗病假，唔夠人手，搞到佢哋兩個要應付全間舖嘅工作。

見到佢哋咁忙，我恨不得依家就可以即刻放學入去廚房幫佢哋手。

不過點都好，我都要等到晏晝放咗學先可以過嚟，食飽飽之後，我又一個人行返學校，返去嘅途中，我打俾我細佬，呢個鐘數佢應該啱啱放lunch。





嘟嘟。

「做咩呀黃子妤？」佢個背景好嘈好雜，係滿滿嘅細路喧嘩聲，仲有啲尖叫。

「你食咗飯呀？」

「食緊喇，有咩事咁急要打過嚟？我依家好忙呀。」從佢啲背景聲，聽得出佢應該同啲同學打緊機，咁啱俾我阻住咗佢。

「咩喎，我係你家姐，我唔可以打俾你咩？」

「我打緊機呀，唔得閒聽你喺度擺家姐款，你有咩咁急事就再whatsapp我啦。」

嘟嘟嘟…

就係咁，我俾我細佬cut咗線，我發覺呢，佢呢半年對我唔耐煩嘅次數越嚟越頻密，可能係佢開始踏入青春期變得反叛咗，可能係屋企嘅事，原生家庭嘅問題令到佢性格有所改變。





我覺得一啲都唔出奇，因為我都經歷過呢啲死都唔聽話嘅時候。

踏上學校大門前面條樓梯，我又返到嚟學校，打鐘之前我走入女廁，匿喺廁格尿尿嘅時候，下面有少少隱隱作痛，我知道係因為最近操勞過度，有時啲男人太用力，搞到我裡面損咗，會痛幾日。

忽然間，我聽到外面傳嚟一陣來勢洶洶嘅腳步聲，廁所密封嘅空間，顯得佢哋嘅腳步聲格外響耳，而下一秒鐘，廁格前面已經多咗幾對腳影。

正當去完廁所諗住出嚟洗手嗰陣，眼前有幾個女仔圍埋嚟。

「喂，黃子妤！」

「痛…」

其中一個走埋嚟從後捉住我條辮，我從鏡裡面望到係成日針對我嗰班女仔，為首最惡嗰個，佢叫做Kelly，班上面有啲男仔會直接叫佢做Kelly姐。





亦都係頭先數學堂我罰企嗰陣，掂我手背嗰個男仔嘅女朋友。

「喂，我問你啊，你做乜頭先上堂嗰陣撩我條仔講嘢？」

我想掙扎擺脫，但Kelly用力向後扯住我條辮，完全無諗過要放開我。