【甜】《那一年，我是一個援交妹》: 紫餘

Kelly個男朋友叫做Andrew，而另外兩個男仔叫阿文同傑仔，總之就係平時成日圍住Kelly佢哋嘅嗰幾個男仔。

「嘻，又會咁易就約到你出嚟。」Andrew面帶笑容咁望住我。

我覺得佢好嘔心，點解要咁樣約我。

「認錯人。」我二話不說，就果斷閃身喺佢三個男仔中間條罅穿過，但好快就俾Andrew捉住我隻手截返轉頭。

「去邊？」





「你認錯人。」我嘗試擺脫掙扎，但佢捉實咗我隻手我走唔甩。

「我哋做咗成年同學，點樣認錯你呢。」

我無理佢講乜，用力揈開佢隻手，再快步走返落地鐵站。

佢哋無追上嚟，但我都無停落嚟，我直接入閘，落月台，上地鐵。

我扶住地鐵個扶手柄，我個身體就隨住架地鐵加速減速，就會向左向右咁搖。





我身邊好多人，車廂裡面密密麻麻企滿晒人，有幾次我唔小心差啲挨到隔籬個叔叔，我先發覺我無捉實到個扶柄。

我用力捉返住。

無幾耐，過咗幾個站，我手機微微一震，我拎起一望。

係Andrew send個message俾我，佢繼續用返啱啱個陌生嘅id搵我。

「你走咗去，我啲book房錢點計？」





我望完之後，直接收返埋部電話。

我都唔知佢點解要咁做，點解要咁樣約我出嚟，話就話間學校除咗啲老師之外，人人都知道我係援交妹，但咁樣約我出嚟真係好咩？咁樣真係好好玩咩？

佢仲話book咗房，又帶埋阿文同傑仔出嚟，唔通真係想約我開房上床咩。

我真係諗唔明，完全唔明啲男仔諗啲咩。

我落咗車之後，沿住返屋企嗰段路一直行，我離遠望住公路對面嗰座山坡仔，有個小公園，由細到大返屋企都會見到呢個公園，但係有一次都無去過，唔知點解呢一刻好想過去坐一坐。

穿過行人天橋之後，再行咗十幾級樓梯，就嚟到呢個公園。

原來呢度好細，淨係得一幢瀡滑梯，隔籬有張長凳有個公廁，條瀡滑梯上面仲鋪滿落葉，好似日久失修嘅公園咁，隱蔽得嚟又有佢特別嘅地方。

因為我擒到上瀡滑梯最高嗰個位，可以俯瞰到成條青山公路，車來車往嘅情景，望遠啲仲可以望到我屋企嗰條邨，連我間中學，都喺樓與樓之間，露咗一撮小角出嚟。





我依家先知呢度個景觀係咁靚，我住咗咁耐都係依家先知，一直以嚟我都未嚟過，但係我一下子就鍾意咗呢個地方。

呢度好清幽，除咗後面條小路，偶爾會有路人經過之外，基本上無人會入嚟呢個公園。

我掃一掃啲落葉，坐喺瀡滑梯最頂個位，諗返起啱啱嘅經過，就覺得好核突，喺見到Andrew之前，我仲真心以為佢係約我嗰啲哥哥，但原來只係set個局嚟呃我。

我又會咁蠢都有，嗰下無諗清楚就應約，平時我都起碼會同啲唔識嘅人傾幾日偈，摸下佢個背景同埋係咪真係有心約，我先會約出嚟。

唉，點解我要心急…

坐下坐下，不經不覺個天漸漸泛起日落光霞，個天一半俾黃色佔據住，另一半就由紫色點綴，兩種顏色交織埋一齊，餘光填滿咗成個天空。

原來我坐低咗之後，完全無為意到時間流逝，一轉眼連太陽都埋藏咗喺城市嘅天際線之下。





我望住公路兩邊啲車川流不息咁駛過，望下望下，慢慢連啲車嘅輪廓都變到模模糊糊，淨係見到車頭大燈同車尾燈嘅殘光。

但忽然間，喺公路旁邊嘅一條行人路，有一對男女霎時間吸引住我個目光。

我捽捽眼睛，我確認我自己無認錯人之後，心裡面不由自主地一陣震動。

曾經熟悉嘅面孔，我竟然會喺呢度，又再見返呢個男仔嘅身影。