【甜】《那一年，我是一個援交妹》: 又男

但無見一排，個男仔，好似又高咗，佢一個人孭住兩個書包，一個係佢自己，另一個係個女仔，孭住兩個書包對佢嚟講都好從容。

而個女仔一直翹住佢手，挨住佢膊頭，含情脈脈咁咬住佢耳仔邊不停咁密密講嘢。

忽然間，個男仔又唔知同個女仔講咗啲咩，搞到個女仔嬌嬌羞羞咁搣咗佢手臂一下。

然後個男仔就攬住個女仔條腰，抱入懷裡，唔俾個女仔再郁嚟郁去。

唉，個天做咩又要我遇返佢哋。





等到佢哋離開咗我視線範圍之後，個世界又恢復返平時一樣，我伸直對腳，沿住條瀡滑梯，順着地心吸力瀡返落地下。

瀡落嚟嗰陣，我條短裙反起晒，佢本身都已經夠短，依家直情走晒光，不過都無所謂啦，反正呢度都無人，又黑又暗，唔會俾人望到。

我整一整返好條裙，拍一拍條裙上面啲枯葉碎，呢一晚，我又一個人默默行返屋企。

今日我好似無做過啲乜，但又好似發生咗好多事。

返到屋企，已經好攰，我衫都無換，就坐咗喺梳化發吽哣，但呢個時候我細佬喺房裡面匆匆忙忙咁走出嚟嗌我。





「黃子妤。」

「做咩…」我聽得出自己把聲已經無氣無力。

「我呢，見你咁夜未返，我想幫手洗衫，你教過我點用，但佢唔知點解著著下去到一半又停咗。」

我嘆咗一口氣，原本想唞唞嘅我，都要企返起身走入廁所睇吓部洗衣機咩狀況。

「佢轉到一半突然間停咗，啲水仲喺裡面，但個蓋已經打唔開。」





「嗯…唔緊要我去睇下先。」

我走入廁所，我細佬就跟住我後面，去到部洗衣機面前我踎低睇，裡面裝滿水起晒泡泡，啲衫仲喺入邊。

我撳咗幾下掣，啲燈keep住眨吓眨吓，但部洗衣機偏偏就無反應。

「佢就係咁，唔識轉。」黃子俊又踎埋過嚟一份，黐喺我側邊，一齊望住部洗衣機。

「有無試過夾硬熄咗部機，再開過。」我問。

「試過。」

「都係唔轉？」

「係。」





「唉…」

其實上個月開始，部機已經開始神神地，佢係會無啦啦洗到一半自己熄咗，但係重新開機佢又會自己著返，但計埋依家呢次，已經係第四次壞。

弊就弊在，呢一次，無論我點樣熄咗再開都唔識再著返。

「係咪壞咗？」我細佬問。

「唔知道…」我連電掣都試過掹咗再插返，部機都係無反應。

「但係依家個蓋可以打得開，唯有拎咗啲衫出嚟先。」熄咗電掣嘅話，個蓋就可以打得開，不過一打開裡面啲水就即刻漏晒出嚟。

黃子俊陪我夾手夾腳將裡面啲衫拎返晒出嚟，啲衫濕淋淋，最主要就係我同佢啲校服，另外仲有我出街嗰啲短裙仔。





我哋用個膠桶裝起晒去，成個廁所地下都係洗衣機流出嚟嘅泡泡水，一下子浸濕晒我對襪。

我數一數，黃子俊兩套校服都喺晒度，唔洗嘅話佢聽日就無得返學。

「我洗啦。」

但係我咁大個女，都未試過要用手洗衫，霎時之間我都搞到手忙腳亂，唔知啲污糟嘅衫，同埋洗緊嘅衫，仲有洗好咗嘅衫，應該點樣分類好。

我隨手喺廁所角落再拎咗一個膠盤出嚟…

但呢個時候，我隱隱約約聽到我後面有陣嘶嘶嗦嗦嘅抽泣聲。

「黃子俊你做咩事？」我即刻擰轉身，啲泡泡仲停留喺我隻手度。

「嗚嗚…」





「做咩啊？」我停低落嚟，跪低喺我細佬面前，即刻借我條裙抹乾啲泡泡，再幫佢抹走啲眼淚。

「我…我係咪整壞…咗部洗衣機？」

「傻瓜，邊有。」

「我想…幫你忙，但係我整壞洗衣機…嗚嗚…」佢越喊越犀利，一下子居然喊到一發不可收拾。

「無事啊，部機本身都壞壞地㗎。」 「嗚嗚…我想幫你忙…嗚嗚…我本來就係唔想黃子妤你咁辛苦，偏偏我就…

「傻豬，家姐湊你一啲都唔辛苦，你唔好喊啦，你喊嘅話…搞到我都喊㗎啦…」