【甜】《那一年，我是一個援交妹》: 細佬

我媽以前仲喺屋企嗰陣，會成日抱怨家貧百事哀，而且我細個嘅時候仲會鬧我郁啲就喊。

「喊咩啊？頭家俾你越喊越衰。」當我呀媽鬧我嘅時候，呢一句總會掛喺嘴邊。

如果佢依家喺度嘅話，見到我又喊，肯定又會鬧。

「黃子妤…你做咩喊埋一份？嗚嗚…」

「嗚嗚…」





「唔好喊啦，黃子妤…」個傻瓜，調返轉頭幫我抹走我啲眼淚，搞到我喊得仲犀利。

「仲好講，你呀，正衰人…成日搞到人哋喊囉。」

我呢個細佬，細細個就好鍾意同我作對，佢會搶我啲綿花糖食，又會偷我啲日記嚟睇，仲會用粉筆畫花晒成本日記簿。

細個嘅佢，總係會搞到我好激氣，我呀媽又時時刻刻偏幫住佢。

但呢一晚，洗衣機雖然壞咗，佢陪我一齊用手慢慢逐件逐件洗乾淨，再用衣架晾好晒，我哋開著把風扇對住套校服吹，依家只能祈求啲衫乾得切，聽朝早可以有校服著。





搞咗成個幾鐘，我條裙同對襪都濕晒，雖然醃住對腳但我無所謂，晾好啲衫之後，終於可以去沖涼。

「咁個洗衣機點算好？」我沖完涼吹頭嘅時候，黃子俊問。

「um…可能要買個新。」

第二朝，奇蹟嘅係，我哋啲校服居然乾得切。

我照舊好早就起咗身煮早餐，而黃子俊居然一反常態唔使我再打鑼打鼓咁叫醒佢，都識自動自覺起身。





今日係禮拜五，返埋今日就可以有兩日假期，開咗學短短幾日已經好似發生咗好多事。

但我一返到入班房，尋日同Andrew一齊嗰兩個男仔即刻望過嚟我呢邊，我耷低頭避開佢哋眼神，我都無去深究Andrew喺唔喺班房，我返埋自己位就坐低，無再望過後面。

但朝早班主任堂嗰陣，Andrew再一次用嗰個陌生id send message俾我。

「我啲酒店錢點算？」

佢居然仲糾結緊呢樣嘢，我繼續唔覆佢，睇完就即刻塞返埋部手機入裙袋，然後無耐裙袋又震咗一下。

「明明見住你睇電話，扮睇唔到？」

佢做咩要冤魂不散…我把心一橫決定收埋部電話唔再理會，之後再震咗幾次，我都無再理佢。

咩嘢酒店錢關我咩事，係佢自己無聊扮客約我，我覺得我唔理佢，佢都唔會奈我咩何，況且佢有女朋友，仲要係Kelly。





喺學校，我估佢唔敢會對我做啲乜。

小息嘅時候，我留喺班房，Kelly嗰班女仔同Andrew嗰幾個男仔一齊出咗去，我趁佢哋行開咗，我就拎埋部電話去咗課室走廊嘅一個角落，靜靜地咁撳電話。

我其實只係想睇下，有無人send message約我。

如果無嘅話，我就要問下老闆，今日可唔可以去佢茶餐廳度打工。

因為洗衣機壞咗，又要有筆大嘅開支…

自從暑假過後，少咗好多人約我，對上一次已經係開學嗰日嘅大叔，尋日又俾人放飛機，仲要遇到自己學校嘅男仔白撞。

我唔敢再更新我個profile住，因為Andrew肯定知道咗我個account，實會mon住我個動態，如果我依家upload新相，佢就一定會知道同埋見到，但係我都唔敢貿貿然轉另一個新account，突然間轉嘅話可能會無咗班約開我嘅熟客。





仲要我profile裡面嗰幾張相有啲暴露…其中一張係我除咗衫，拉低對bra影，有意無意咁露咗少少乳暈出嚟，我諗緊del唔del好，del嘅話…又會少咗吸客嘅能力。

好麻煩，當初俾班女仔周圍唱我係援交妹嗰陣，都無依家咁麻煩，依家俾同班嘅男仔知道咗我個account，樣樣嘢都要就住就住咁。

唉。

我都唔知點好，但係好快，小息嘅鐘聲又響起。

返到班房之後，又聽到Kelly佢哋把煩人嘅吵鬧聲，佢哋又喺度討論緊新嚟嗰個實習老師，好似話下個禮拜一就會嚟學校，仲要係教我哋班。

我聽完就算，反正我都諗唔到有咩咁值得期待。

呢一日，貌似喺風平浪靜之下就度過咗，開學嘅第一個禮拜，終於結束。