香港女子圖鑑: 第三章：東京 （ 四 ）

東京成田機場，離境大堂。
張凱推住行李，另一隻手好自然咁拖住林薇。呢幾日嘅相處令兩個人之間多咗份默契，張凱望住林薇嘅眼神，非常溫柔。喺佢心目中，林薇係一個純潔到不得了、甚至連拍拖經驗都冇乜嘅女仔——終歸嗰晚雪白床單上面嘅鮮紅血跡，對一個三十幾歲嘅男人嚟講，係最有力嘅證明。
佢根本無諗過，眼前呢個乖巧嘅女仔，喺香港其實有一個拍咗好多年拖嘅男朋友。

「林薇，仲有無嘢想買？」張凱寵溺咁揉咗揉佢個頭。
林薇心入面好虛，勉強笑咗笑，指住機場免稅店：「我想買啲嘢送畀……送畀朋友同埋我細佬。」最後佢揀咗一對手工精緻嘅手辦，同埋一盒最新款嘅限量版高達模型。
張凱見到盒高達，笑住問：「你細佬幾歲呀？仲玩模型？」
「呃……係呀，佢由細到大都好鍾意……」林薇低住頭避開眼神。其實，嗰盒高達係就係阿峰提咗好多次嘅心頭好，而嗰對手辦，係阿峰之前話過如果去到東京一定要買嚟做紀念品。

去到候機室，臨上機前收到阿峰傳過嚟嘅 WhatsApp：「薇薇！你幾點落機呀？我喺機場巴士站等你好無？我想第一時間見到你呀！」罪惡感壓到林薇抖唔到氣，佢望住個螢幕，回覆話：「唔使喇，你無車，專登行嚟行去好辛苦。我直接搭的士返屋企休息吓先，聽日我先拎禮物去你度啦。BB。」





第二日放工，林薇拎住手信行入阿峰租嗰間劏房。
一推開門，嗰陣熟悉嘅嗡味同埋潮濕嘅感覺撲面而嚟。阿峰正著住件波衫，見到林薇即刻興奮到好似隻大狗咁衝過去想抱住佢。
「薇薇！我好掛住你呀！呢幾日同埋成班同事去日本辛唔辛苦呀？張總係咪好嚴？佢有無帶你哋去食好嘢？」
阿峰一邊接過行李，一邊興奮咁連珠炮發。林薇聽住「成班同事」呢四個字，心入面虛到不得了，只能夠尷尬咁笑吓：「呃……係呀，大家都好忙，張總係幾嚴，不過都帶咗我哋去……食咗幾餐幾好嘅。」
「咁就得啦！我見你都冇乜係instagram 出 post，仲以為你哋成班人忙到連食飯嘅時間都無添。」阿峰一邊拆開啲手信，一邊仲喺度想像林薇同成班同事一齊熱熱鬧鬧咁出 Trip。
林薇望住阿峰拆開盒高達，開心到好似細路咁：「嘩！真係買到！薇薇你真係最好呀！你放心，我會努力草錢，我哋下次再一齊去東京，到時我帶你去行勻秋葉原，去晴空塔影相，好無？」
林薇望住阿峰嗰張充滿期待、純真到有啲傻嘅面孔，聽住佢講緊嗰啲「以後一齊去」嘅計劃，心入面好似俾刀割咁。阿峰完全唔知，林薇心中的東京經已變成表參道的手沖咖啡，銀座的Omakase與六本木嘅初雪。佢更加唔知，林薇身體入面，仲殘留住另一個男人嘅溫度。

「……好呀。」林薇低聲應咗一句。





當晚，阿峰好興奮咁想親熱。佢好似以前咁，手勢生硬咁去摸林薇對奶，急躁咁想剝佢件衫。但林薇腦入面全部都係張凱嗰對溫柔又熟練嘅手，同埋嗰一晚嘅瘋狂。

佢最後用「好攰」做藉口推開咗阿峰，轉身背對住佢。
「阿峰……我想返自己屋企瞓。」林薇突然企起身，手忙腳亂咁執嘢。
「吓？咁夜……你平時唔係最鍾意攬住我瞓咩？」阿峰對眼寫滿咗唔理解。
「我成個 Weekend 都要做嘢，真係好攰，想返去抖吓。」林薇連望都唔敢望佢一眼，走出間劏房。

喺返屋企嘅的士上面，佢收到張凱嘅 WhatsApp：「返到屋企未？我仲喺公司，突然好掛住你。早啲休息，聽朝見。」
林薇對住螢幕，嘴角竟然不自覺咁微微上揚，回覆咗一句：「差唔多返到喇，聽朝見。」





返到屋企，林薇第一時間衝入浴室，用凍水瘋狂沖洗全身，想洗走心中的煩惱。佢知道，由佢喺東京酒店接受張凱嗰個吻開始，佢同阿峰嗰段「純潔」嘅愛情，已經徹底爛透咗。