香港女子圖鑑: 第五章：北角與康城 （ 三 ）

有一日晚餐，凱隨意問林薇：「妳銀行戶口有幾多錢？」
林薇愣了愣：「咁多年做 Part-time 加上返工草落，大約有六萬，做咩事？」
凱放低餐具：「我想妳學識點樣做到資產增值，真正優雅地生存。」
喺凱嘅指示下，林薇心驚膽戰咁將全部積蓄一把火咁買落一隻波幅極大嘅科技股度。頭兩日，股價好似坐火箭咁升咗 15%，林薇望住戶口多咗九千蚊，係佢以前要做兩個月 Part-time 先賺到嘅錢，佢好開心，覺得呢個世界真係有魔法咁。點知好景不長，兩日後股價突然「變臉」，九千蚊利潤瞬即蒸發，甚至倒蝕四千。林薇手心冒汗，即刻 WhatsApp 凱：「凱……我哋而家要點做？係咪要等一等佢升返？」
凱只係回訊三個字：「放晒佢。」
薇不捨地回覆：「而家放會蝕四千，或者聽日會升呢？」
凱嘅回覆依然簡短霸氣：「信我。」
林薇咬住牙撳咗賣出掣。結果收市後，嗰隻股因為壞消息直接暴跌多 15%。如果佢唔走，蝕嘅就係萬二蚊，而唔係四千。

嗰晚，凱喺屋企斟咗杯紅酒畀佢：「薇，呢四千蚊係我教妳嘅第一課。記住呢種蝕錢嘅痛，佢會令妳以後做決定嗰陣更冷靜。」「今日妳做得好好，如果妳唔捨得壯士斷臂，妳就會輸晒嗰六萬蚊。股票市場賺快錢有時好容易，但輸可能仲快。真正要做到資產增值，最緊要嘅係紀律同清醒。」「投資同人生一樣，你唔會永遠都預測準確，當個勢唔對，妳就要有斷手斷腳都要離場嘅克制。猶豫，係弱者輸身家嘅原因。」




交咗呢筆「學費」後，凱send在幾份上市公司嘅年報，教佢咩叫「價值投資」。佢教林薇唔好淨係睇股價升跌，而係要睇「護城河」、現金流同商業模式。林薇開始戒掉無謂嘅娛樂，放工就鑽研毛利率同市盈率。

兩個月後，佢用剩返嗰五萬幾蚊，睇準咗一隻被市場低估嘅消費龍頭股，忍住一時嘅波動去繼續持有。結果嗰隻股業績爆發，幫佢淨賺咗兩萬蚊利潤。加上之前日本 Project 嘅成功，林薇順利升咗做 Senior AE，人工加咗20%，仲攞到兩個月 Bonus。呢啲錢加埋投資利潤，畀咗佢以前從未有過嘅底氣。

佢無急住搵凱慶祝，而係第一時間去咗北角。林薇簽一個開放式單位，租金雖然佔咗佢人工三分一，但勝在交通方便，更重要嘅係，呢度係一個完全屬於佢自己嘅獨立空間。
搬入去嗰日，佢去咗中環 Landmark 買咗人生第一對 Roger Vivier 黑色漆皮高跟鞋。當佢踩住嗰對閃亮方扣嘅鞋，企喺自己租返嚟嘅木地板上面，嗰種踏實感，係凱或者陳志峰都畀唔到佢嘅。

而家嘅林薇，生活過得規律精緻。放工後佢會去練 Pilates。凱教過佢，人最講求嘅係 「Self-discipline」，管理好身材，先可以管理好人生。逢星期二、四，佢會去學日文。掌握多一種語言，就係掌握多一種同世界溝通嘅權力同機會。

深夜，佢一個人坐喺北角窗邊，飲住白酒望住出面條電車路。




「陳志峰話我拜金。係，我係變咗。但我追求嘅唔係錢本身，而係凱教我嗰種『向上流動』嘅尊嚴。我唔要嗰粒三萬蚊鑽石嘅虛榮，我要嘅係一套可以帶畀我優雅生活嘅『功夫』。阿峰，我追求緊嘅世界，要求一種你連理解都理解唔到嘅專業與克制。」

呢一刻嘅林薇，踩住對 RV，腳步聲「嘚、嘚、嘚」咁響。佢知道，由紅磡到太古坊，再由沙田到北角，佢已經完成咗自己第一步嘅轉身。