儲物室的餘溫: 第十八章　廚房

第十八章　廚房

買外賣，搭𨋢，直到屋企門口，Miss Yung停落嚟，收拾心情，放低笑容。因為，佢又返入去呢個惡夢嘅屋企。

硬住頭皮走入去，拿拿臨拎埋啲外賣出嚟，放喺餐枱上面。

Chan Sir啱啱沖完涼，坐喺餐枱前，拎起咗筷子：「菜呢？」

「我、我而家去炒，好快，你食住先。」Miss Yung一邊入廚房一邊嗌入房：「小欣，食飯喇。」佢極速洗菜、開爐炒，好快就整起咗一碟炒生菜。





晚飯時，小欣問Miss Yung：「媽mi，你會唔會同我一齊去海馬公園？」

「對唔住呀，嗰日中學部唔係旅行日，應該陪唔到你去喇。」Miss Yung耐心解釋畀小欣知。

小欣好明白事理咁點點頭：「咁我哋放假再去吖。」

「食不言，寢不言。」Chan Sir嚴肅咁講，完全冇尾音。

餐枱再冇人講嘢，冇人再敢講嘢。





食完飯，小欣擔咗張櫈仔，主動話幫Miss Yung洗碗：「我想試吓洗鑊。」

「你做完功課喇？」Miss Yung扶一扶小欣企上櫈，喺側邊護住，幫小欣戴小手套。

「係呀，今日好少功課，書我都溫好喇。」小欣細細嘅手，心情大好咁開始刷鑊：「哇！呢個鑊好大個呀！」

「係呀，呢個係鐵鑊，煮嘢食好快㗎。」

「點解嘅？」





Miss Yung好有耐性咁解釋，滿足小欣嘅好奇心。

洗完碗，小欣同Miss Yung講：「媽mi，其實你係唔係都唔鍾意爸爸？」

Miss Yung嘅手停咗一下，再笑一笑咁答小欣：「唔係呀。點會呢？我同你爸爸結咗婚。」

「但係爸爸好惡，對你又唔好，我唔鍾意佢。」小欣除低咗手套，放喺架上面掠乾。

Miss Yung蹲低，同小欣相同嘅眼平線，凝重咁講：「小欣，啱啱你講嘅說話，千祈唔好畀爸爸聽到，知唔知道？」

小欣扁起嘴，喺佢心目中嘅Chan Sir，其實已經係零分：「知道。」

「今日做晒功課，溫好晒書，可以玩一陣電腦。」

「20分鐘得唔得？」小欣眼前一亮。





「殊，唔好話畀爸爸知就得。」Miss Yung溫柔咁笑：「十點要瞓覺，OK？」

小欣用力點點頭，攬住Miss Yung錫咗一啖面，然後就衝入房玩。

Miss Yung長長咁嘆咗一口氣，忽然覺得有好大壓力，心口好似有啲嘢壓住。

佢咪埋眼，慢慢抖氣，感受住當下。

心理建設好，慢慢行入危險區。

//