儲物室的餘溫: 第十七章　接放工

第十七章　接放工

臨近考試嘅日子，老師們都忙住出卷。Miss Yung都唔例外，今日要喺學校留到夜少少，已經同Chan Sir申請咗要夜返。雖然Chan Sir已經知道咗，但係每隔半個鐘左右，佢都會打過嚟催佢返屋企煮飯。

「喺邊？」「仲爭幾多？」「返未？」「晚飯幾點？」「你係咪要餓死個女？」「你唔返嚟邊個同個女溫書？」

Miss Yung都幾大壓力，明明同佢講咗，今晚會買埋飯，八點半會返到屋企。Chan Sir過於頻繁嘅電話，令佢唔可以專心做嘢。佢望望個鐘，明明只係七點半，買埋外賣返到屋企都唔使八點。

佢歎咗口氣，默默收拾細軟，心諗都係返咗去先，今晚再繼續做。





成個教員室淨返佢一個，佢一開教員室度門，就見到阿凱喺出面，嚇咗一跳：「點解你仲喺度嘅？」

「等你，全校得返你一個咋，你唔係怕黑嘅咩？」阿凱遞上一樽熱檸蜜：「出完卷未？」

Miss Yung心頭一暖，笑容出返嚟：「未，返去繼續做。」

阿凱唔會放過機會，乘機捉住Miss Yung隻手：「呢幾日你都做到咁夜，今晚要早啲瞓啦，聽朝先做。」

「唔得啦，今晚要做完。」Miss Yung熄咗教員室嘅燈，閂好門，轉身走向漆黑嘅走廊，佢冇放開阿凱隻手，好實在咁拖住。其實，佢真係好怕黑：「真係得返我哋？」





「肯定，我check好晒㗎喇，得返門口看更。」

兩個人第一次拖住手行，走廊冇晒平時學生嘅嘈吵聲，好安靜，好舒服。

阿凱會同Miss Yung分享工作嘅事，講吓邊個同事好傻仔，連電腦都唔識開，次次都要去幫去手。

Miss Yung靜靜咁聽，見住阿凱咁多表情，佢都不自覺由心笑出嚟。

呢一刻，如果呢條路可以長少少就好喇。





落完樓梯，準備轉出更亭。阿凱停低腳步：「你走先啦，我等多一陣先出去。」佢錫咗一下Miss Yung嘅手：「聽日見。」

Miss Yung微笑點頭，心裡面真係好甜：「嗯。」佢心情好好，一路走出學校，一路忍唔住面上嘅笑容。

呢個感覺，係戀愛嘅感覺。

//