儲物室的餘溫: 第二十一章　電話

第二十一章　電話

第二日，但係Miss Yung同小欣都冇返學。而Chan Sir頭上面有一個傷口，用膠布痴住咗，嘴角同手臂都有明顯嘅瘀傷。不過Chan Sir仍然保持住嚴肅嘅氣場，好似冇事發生過咁。

八卦嘅同事，已經估到呢家人尋晚有啲事發生咗。但係Chan Sir嘅氣場太嚴肅，冇人夠膽行埋去問佢嘢，驚一行埋去就被佢咗溶咗。所以有啲相熟同事send message畀Miss Yung問候，但係Miss Yung 只係回覆因為小欣唔舒服，要照顧佢所以要請假。

其實，呢啲一聽就知係藉口。同事都唔係盲嘅，亦好心水清，點都會察覺到啲嘢，只不過係唔出聲。

阿凱收到消息，實在好擔心，即刻打電話畀Miss Yung，但係冇人聽。佢喺Chan Sir上堂嗰陣，特登走去觀察佢。佢留意到Chan Sir除咗表面傷痕之外，仲見到佢寫白板時抬唔起手，有可能整親膊頭。





阿凱緊握拳頭，望到Chan Sir個衰樣，就無名火起，好想衝入課室打佢。不過，「叮」一聲，Miss Yung報平安嘅訊息令佢放鬆咗拳頭。佢即刻一邊行返去電腦室，一邊打電話畀佢。

電話嘅另一邊，Miss Yung走咗入廁所諗咗諗要唔要接呢個電話。廁所入面好靜，只係得佢自己嘅呼吸聲，同電話嘅震動聲。

雖然佢唔知點樣面對阿凱，唔知要講咩好，但係佢好想聽到阿凱把聲，想尋求安慰。

「靜雯，尋晚發生咗咩事？」阿凱嘅聲音有啲急，但亦都好溫柔。

Miss Yung聽到阿凱把聲，鼻哥酸咗一酸，忍住喊咗出嚟。不過，佢好快咁索一索鼻水，清清喉嚨：「佢⋯⋯係唔係喺學校？」





「嗯。」阿凱要知道佢係咪安全：「你喺屋企？」

「唔係。不過我而家會返去，拎啲嘢。」

「我陪你。」

「唔好⋯⋯你可唔可以⋯⋯」Miss Yung低聲請求阿凱：「幫我睇住佢⋯⋯如果佢離開學校，第一時間通知我。我唔想見到佢。」

「好。」阿凱幾乎確定Miss Yung已離家出走，佢心裡面暗暗發誓，由今日開始，佢要保護呢兩母女：「小欣呢？佢今日都冇返學，佢係咪同你一齊？」





「係，我會帶住佢。」Miss Yung好掛住阿凱嘅氣味，欲言又止：「我⋯⋯」

「係。」阿凱聽到Miss Yung毫無神氣嘅聲線，好心痛：「我喺度。」

Miss Yung完全感到阿凱嘅可靠，心頭暖咗一下，又索咗吓鼻水。

阿凱完全係一個可靠男人嘅聲線：「今晚我嚟搵你好唔好？」

「不如⋯⋯遲啲先⋯⋯」Miss Yung合埋眼，就見返尋晚被強姦嘅情境，口入面好似仲有條毛巾塞住嘅感覺。佢輕輕攬住自己，個心依然好亂。

「點解？我想見你，我要知道你而家點。」

「我而家⋯⋯好好⋯⋯真係好好⋯⋯」Miss Yung淚水又再湧出嚟：「我想靜吓。」

阿凱知道Miss Yung一啲都唔好，佢仲以為Miss Yung會好需要自己，好想見自己。





「Sorry，我遲啲再搵你⋯⋯」Miss Yung好無力，匆忙收線。佢唔敢再聽多一秒阿凱嘅聲音，怕自己會崩潰。

阿凱握住電話，耳邊仲迴盪住Miss Yung無力嘅聲音，心口好似被人壓住，呼吸都唔多順。佢以為Miss Yung覺得自己唔夠可靠，所以先唔見佢。

佢同自己講：「無論點，我都一定會保護你同埋小欣。」

佢即刻mon住啲CCTV，留意住Chan Sir嘅一舉一動，然後報告畀Miss Yung知，等佢可以安全離開屋企。

//