儲物室的餘溫: 第二十二章　樓梯

第二十二章　樓梯

收線後，Miss Yung只容許自己失落片刻，佢抹走眼角嘅淚水，暫時忘記尋晚發生嘅事，即刻帶埋小欣返屋企執拾。

踏入家門，佢心裡仲有一絲餘悸。但係佢拖實小欣隻手，畀勇氣自己，一齊行入屋。

執拾嘅時候，佢一直都留意住電話，睇住個時間，一定要喺Chan Sir返嚟之前離開。

「小欣，如果我哋以後都唔再返嚟，你會唔會唔開心，或者唔捨得呢度？」Miss Yung見到小欣喺自己間房，將心愛嘅玩具同埋鍾意嘅圖書放入喼，臉上一面。





「同媽mi一齊就會開心。」小欣對住Miss Yung笑一笑。可愛嘅笑容，畀咗好多溫暖Miss Yung：「媽mi，我可唔可帶晒呢個兩個走？」小欣拎住兩個中型公仔，有啲擔心個喼放唔落，但又好想要。

「當然冇問題。」Miss Yung微笑，將公仔放入真空袋，pack好。

執到咁上下，佢收到阿凱嘅電話，喺電話入面嘅阿凱，講嘢好急好喘氣：「快啲走，佢返緊嚟。」

「吓？」Miss Yung嚇到面容失色，差啲跌咗個電話：「點解⋯⋯你冇⋯⋯」

「我send咗、好多個message畀你，見你、冇應機、所以打畀你。」阿凱講嘢斷斷續續，好似跑緊步：「你係咪12樓？佢喺停車場。」





「係。」Miss Yung心跳一直標升，一邊講一邊加快手腳。

「我入𨋢喇，你唔好搭𨋢，喺你嗰層等。」阿凱入大廈前，已經見到Chan Sir喺停車場嗰邊泊緊車。佢滿頭大汗，猛咁撳𨋢掣，心諗如果呢部𨋢係隨意門就好。

到咗12樓，Miss Yung咁啱行出屋。阿凱見到佢，即刻拎咗一手一喼，衝向後樓梯：「佢可能上緊嚟，我哋行樓梯，落兩層先。」

Miss Yung拖住小欣，跟住阿凱行樓梯落。

喺樓梯間，聽到Chan Sir嘅大叫聲：「死八婆又走咗？」然後傳嚟幾下重重嘅錫門聲。責罵聲同錫門聲，經過樓梯嘅回音，好似貫穿咗全幢大廈咁，直插入Miss Yung嘅心臟。





Miss Yung當堂嚇到行唔郁，停咗喺半層中間。佢望住上面個門，好驚會隨時被打開，然後Chan Sir會捉去返入屋。

「媽mi⋯⋯我哋走喇⋯⋯」小欣行落兩級，放輕聲音，拉住Miss Yung走。但係Miss Yung走唔郁。

已經落咗一層嘅阿凱放低兩個喼，行埋去拖住Miss Yung捉住扶手嘅手，震得好利害：「靜雯，咩事？」

「媽mi，爸爸喺屋企入面，唔會追嚟㗎。」小欣再拉幾下，有啲心急，想快啲拉Miss Yung走。

Miss Yung終於都清醒過嚟，佢拖住小欣手繼續落樓梯，好似冇發生過斷層咁。

阿凱有啲奇怪，不過呢個時間唔適宜問咁多，而家最主要任務要帶佢哋安全離開現場先。

佢哋喺10樓等咗一陣，見無咩動靜，阿凱一個人走上去12樓睇睇情況。

阿凱返到12樓即刻撳咗𨋢先，佢聽到Miss Yung屋企入面有好多聲音，撞擊聲、Chan Sir嘅發洩大叫聲。呢一刻，佢肯定佢由學校跑過嚟呢個選擇係正確嘅。





入𨋢，喺10樓會合Miss Yung兩母女，再離開大廈。

喺佢哋身旁嘅呢兩個行李喼，裡面除咗有好多物件之外，仲裝住兩母女嘅希望。

阿凱，將佢哋全部，順利帶離開呢一個家。


//