儲物室的餘溫: 第二十九章　結局

第二十九章　結局

Chan Sir回返氣，瞪大雙眼望住攬埋一齊嘅兩個人：「你個賤人真係出軌！」佢企咗喺身，想衝上前去打阿凱，但係畀佢見到小欣喺門口跑緊入嚟。

所以佢即刻衝過去單手攬住小欣條腰，成個人打橫挾起咗，仲扭轉小欣隻手。

「呀——」小欣慘叫，想掙扎但係Chan Sir太大力。

「停手呀！」Miss Yung嚇到大聲呼叫。





「你兩個奸夫淫婦唔好行埋嚟呀，再行埋嚟我就扭斷佢隻手！」Chan Sir一邊挾持住小欣，一邊走去門口方向。

「爸爸⋯⋯好痛呀⋯⋯」小欣痛到喊，只係喺度踢腳。

「喂！放手呀！」阿凱即刻諗緊點樣救返小欣：「你係咪人嚟㗎？」

「個小朋友走得咁快嘅，係咪呢間房？」門口有人探頭入嚟，見到Chan Sir挾持住小欣，反應勁快，諗都冇諗就從後面制服Chan Sir，畀人扭返住隻手，壓住喺地下。

小欣成功走甩，走向Miss Yung嗰邊：「媽mi！媽mi！」





阿凱即刻執起條褲畀Miss Yung著返，但係小欣已經見到。小欣呆住咗，唔知點反應：「媽mi⋯⋯」

Miss Yung尷尬咁著返條褲，然後攬住小欣：「冇事，媽mi冇事。唔使怕。」

然後，佢哋全部人都被帶返警署協助調查。

警署入面，光到殘眼嘅燈光，走廊上回響住人來人往嘅腳步聲。Miss Yung同小欣坐喺長椅上，身邊係沉默守候嘅阿凱。三人都仲未完全平復，心臟仲跳得好快。

小欣攬住媽咪，仲忍唔住抽泣。Miss Yung輕輕拍佢背，自己眼角亦泛紅。佢知道，雖然危險暫時過去，但心靈嘅陰影仲未散。但係佢忍住自己嘅情緒，安撫住小欣。





阿凱望住佢哋，心裡面充滿愧疚：「我嚟遲咗，令你哋受咗咁多苦。我應該有所防範⋯⋯」

Miss Yung搖搖頭，聲音震住咁：「唔係你嘅錯。多謝你趕嚟，救咗我哋。」

消息好快傳遍成間學校，連家長群、學生都知Chan Sir家暴被捕。

校長知道呢件事之後，開咗緊急會議，建議Miss Yung同小欣嘅狀態可以嘅話，就可以即刻返學，當冇收過佢哋嘅辭職信同退學信，全力撐Miss Yung兩母女，表示對家暴零容忍。

而阿凱，當然會有人揣測佢同Miss Yung嘅關係，但始終都冇證據。況且阿凱喺中六嘅時候，因為Miss Yung改變咗好多，阿凱去救Miss Yung都係理所當然。

——

一個月後，Chan Sir正式被落案起訴虐待、強姦等罪名，被拘留候審。而Miss Yung兩母女已經返返學，學生同家長好似已經淡忘咗呢件事，冇之前咁熱烈討論。

呢一日晚飯，兩母女同阿凱喺屋企食飯。





「媽mi，你係唔係真係可以同我一齊去海馬公園？」小欣喺餐枱上，興奮咁講。

「係呀，校長特登調動我職務，可以陪你去旅行日！」

小欣舉起雙手大叫：「好嘢！」佢已經開始習慣，喺食飯時可以任意講嘢。

阿凱羨慕：「你哋就好啦，我都好想同你哋一齊去。」

佢同阿凱講：「不如聽日我哋一齊出街玩？」

阿凱好開心小欣會邀請佢：「你哋想去邊度玩？」

「去迪迪尼好唔好？」Miss Yung衝口而出，露出掩飾唔到嘅笑容。





「你想去？」阿凱望住Miss Yung嘅時候，永遠都帶住愛慕嘅眼神。

小欣都看在眼內，而且發現阿凱最近成日都嚟屋企陪Miss Yung，而Miss Yung臉上面都多咗好多笑容。雖然佢仲未知、仲未明白佢哋兩個人之間嘅關係，但係佢感受到嘅，係Miss Yung開心咗好多。

最重要嘅人開心，小欣就會開心。咁就夠喇。


//