追求演藝的Mikaela: 06
何文田想了想回答：「我喺私家醫院做手術出世。」梁山放開何文田的手掌：「原來如此，既然你唔係胎生，我就睇唔到你嘅運程啦。」何文田說：「我去外國問西洋星座，個占師都係咁講。」接著問梁山：「咁我即係同佢襯唔襯。」說罷望著Zoe，緊張之情溢於言表。
梁山回答：「八字夾唔到都係次要，最重要係你有本事幫到呢個女仔。」再指了指細文：「呢個細路同個女仔係夾，但係日子會過得好幸苦。」細文最近讀過唐代李商隱的詩：「我知，係咪貧賤夫妻百事哀呀？」導演大叫：「嘩細路你真係活學活用。」說完便伏在桌上偷笑。邊笑邊指著何文田：「唔使算啦，就呢個啦。」梁山向Zoe說：「呢個走唔甩啦，妳宗官司交俾佢辦啦。」這時何文田和Zoe 都是滿臉通紅，低頭不語。
在課室內的記者一直有留意眾人的對話，間中用寫下筆記，見眾人話題已轉移，便跟導演說：「既然大學講師親口確認有呢個拍攝計劃，咁我返去報館先。」說完便先行離開。梁山向著Zoe和細文指了指，繼續向牛導演說：「呢兩個做銀幕夫妻好。」牛導演笑說：「你地兩個早啲成年啦，到時你哋會喺我部機鏡頭前面結婚。」何文田聽罷，登時站起，怒目指著細文大喊：「我要消滅你！」
牛導演揚手阻止：「阿班長，我係指拍場結婚戲呃下觀眾，唔好當真。」何文田大叫：「拍劇都唔得！」便衝向細文有所動作。梁山見狀隨即申手阻止並安慰這位少爺仔，但細文還是被他拍打了幾下。這時門外傳來Mikaela 聲音：「邊個要結婚呀？」似已收到消息特意前來。
牛導演先說：「小姐，妳消息都好靈通。」隨手指著細文及Zoe:「佢地成年之後就會喺我鏡頭前面結婚。」Mikaela這時已意識到Zoe是個威脅，緊張地走到細文身旁：「導演，佢要同我結婚，佢係楊過，咁我就係小龍女。」何文田即時反應：「好呀，小姐妳快啲帶佢走。」梁山有點哭笑不得：「緊張得你，等我出馬幫呢位小姐算一算。」他見Mikaela 身穿名校校服，外貌條件十分好，語調亦柔和起來：「小姐，妳穿身上穿著的名校制服係真的？」牛導演替她確認：「係真的，唔係演員服裝。」Mikaela主動回答：「我讀中六，今年十七歲。」雙眼十分用力地望著細文：「我未拍拖㗎！唔似得人哋，一上中學就霸住兩個男同學。」言語間在刺激著Zoe。Zoe只能怒見相向，強忍著衝動。
梁山知道她讀中六，便緊接問：「小姐妳預科班修乜科目？」Mikaela:：「我修文學。」梁山聽罷，臉上難掩喜悅：「小姐妳唔使心急拍拖，過兩年上咗來文學院再慢慢揀唔遲。」Mikaela略帶失望地搖搖頭：「我唔想入文學院，我要入醫學院！」梁山耐性回答：「小姐妳修文學係報讀唔到醫學院的。」Mikaela：「我唔理，我要入醫科，睇下呢個人腦袋有乜問題，做咩揀佢唔揀我。」說著手指向細文和Zoe。 牛導演這時加入：「指桑罵槐，係我決定要用佢哋兩個，我另外有工作派俾妳。」Mikaela：「我要做演員，唔係做模特兒，妳叫我拍洗頭水廣告，咁我同個公仔咩分別？」導演笑先是笑而不語，說了一句：「一步登天。」再沒回答。
梁山知道Mikaela 是在發小姐脾氣，知道不好直接衝撞，語氣宛轉地說：「小姐，我幫妳睇一睇掌，睇下妳同呢個細路做唔做得成楊過與小龍緯。」Mikaela 見梁山懂算命，說了一句：「勞煩先生。」便遞上手掌讓他算命。
梁山給Mikaela 看了掌，輕輕搖頭：「小姐，妳命格同小龍女呢個角色相差太遠，不如同導演再研究下有咩角色會比較適合。導演這時加入：「不如直接問下楊過啦！」隨即問細文：「細路，你覺得呢位小姐係唔係小龍女？」細文搖了搖頭，梁山緊接著問：「咁呢位小姐似邊個角色？」細文想了想回答：「李莫愁。」
Mikaela 隨即發火：「你咁講即係話我夠毒，仲要詛咒我搵唔到男朋友？」細文：「妳打官司叫Zoe賠錢，佢跟本無錢賠。」梁山聽罷才得悉：「小姐，原來係妳告緊呢個細路女？」接著嘆息說：「呢個細路女其實做唔到我學生，佢只可以早啲出社會工作，跟導演搵多幾個錢，但係妳做到我學生，我可唔可以用老師的身份叫妳停止告呢個細路女？」Zoe聽後便忍不住哭泣落淚，何文田趕忙安慰。
Mikaela 眼神凶狠地回答：「我無話過要入文學院，邊個話我入唔到醫學院？」又指著Zoe:「呢個女仔要同我爭角色，爭男人，仲郁手打人，我要告佢告到底，等全香港都知佢下場。」
導演見情況不妙，便下清場令：「小姐，妳返去學校問下人究竟上唔上到醫科先，有新工作我再搵職員聯絡妳。」Mikaela見導演有心維護Zoe，不忿回應了一句：「我會！」然後一邊從手袋中拿出了機身白色的水壺型手提電話，離開課室。梁山在旁補上一句：「小姐，文學院的大門為妳打開左，妳隨時上來都得。」Mikaela 邊打電話邊揚手道謝：「多謝先生。」拂袖而去。走廊上傳來電話的對話：「同我拖到宗官師司直到佢成年為止。」課室內眾人都聽到。
Zoe聽到後更是害怕得大哭起來，牛導演跟她說：「細路女，唔好俾佢嚇到，妳會有人支持的。」何文田急不及待竹 舉手回應：「係，我呀。」導演笑說：「唔單止你一個支持佢㗎，仲有楊過呢！」細文也點了點頭。
梁山這時談及Mikaela 的掌相：「嗰位小姐命格其實好難搵到真正男朋友，叫佢扮演李莫愁其實係適合人選，不過佢似乎又唔認命，係都要扮演小龍女，導演，不如你設計一個角色幫下佢啦。」導演：「呢個要叫埋編劇一齊諗啦。」然後向眾人說：「好啦，天色唔早，今日就到此為止。」隨即啪了一下響指，示意細文等眾學生放學。