追求演藝的Mikaela: 20

Mikaela化身的小龍女緊抱著細文化身的楊過：「過兒，嗰個細路女有咩好，你做乜要背叛我？」細文：「姑姑，我只係問佢，菜心幾錢一斤？」Mikaela：「講大話，你分明係想識女仔，你想知菜心幾錢一斤，做乜唔問佢阿媽？」細文被緊抱著，吃力地說：「佢阿媽同人打緊牙骹。」Mikaela：「我講過，任何情況都唔可以落山識女仔，同女人講說話要有我在場。」細文：「我...我唔知。」Mikaela激動落淚，把細文抱緊：「我唔准你識女仔！」眼淚滴在細文的背上。Mikaela 進入忘我境界，不再叫細文做過兒，而是大喊：「正太！我唔准你去識女仔，你識咗女仔，我要罰你落地獄！」然後手起刀落，把木製餐刀，狠狠刺落細文背上。細文叫痛之餘，不忘轉過頭來問導演：「導演，依家係拍緊古裝片，定係機械人卡通片？」
牛導演一邊示意：「唔好理，繼續、繼續！」一邊跟職員打眼色，職員立即會意然後前往校務處打電話。導演向Mikaela 說：「小姐，我好肯定妳曾經殺過人。」Mikaela：「我無殺人，我只係要佢瞓一陣，佢瞓醒就會起身。」導演：「我拍電影以來，已經幫警察手捉咗幾次殺人犯，今日妳係第四個。」Mikaela沒有回答導演，扔下木刀，改為用雙手扭著細文的頭：「我只係扭下佢條頸，等佢瞓得舒服啲，佢喺地獄反省完就會返來我身邊。」細文這時大叫：「家姐，我以後唔敢啦。」導演向細文說：「你入晒戲啦，講埋佢啦。」細文：「家姐，我想跟妳去聖堂做禮拜，到時又可以見到華神父、法蘭高叔叔同埋羅便臣先生。」Mikaela：「做乜一返到嚟就掛住羅便臣呀，等家姐煲湯俾你飲。」細文：「家姐，Bobo 太太去咗美國返來未？我等住佢帶個伯特公仔上來探我哋。」Mikaela：「你咪就係我個公仔囉，仲使乜玩公仔，你同我乖乖的留喺屋企，家姐就帶你過海買玩具。」這時職員已手拿一叠傳真交給牛導演。
牛導演看過資料，對細文說：「你扮演緊嗰個細路叫泰仔，係泰國個泰，唔係機械人卡通主角。」然後問Mikaela：「小姐，個細路唔係布公仔，佢死咗唔會返生。」Mikaela:：「佢無死，呢一個就係布公仔二號。」細文一聽到二號這稱呼時，立即清醒過來問：「導演，我依家係咪要扮演一文字隼人？」導演：「呢個咩角色嚟㗎？」經職員提示後認真向細文說：「聽清楚，我唔會拍㗎仔卡通片，你唔好再提呢啲片名同角色啦。」Mikaela 這時用力扭動細文的頭：「你點解會睇到呢套卡通，電視台明明無播到。」細文感到痛楚之餘回答：「我睇二號台。」Mikaela：「嗰個台你都睇，你不知所謂，無資格做我個布公仔。」正想加重力度之時，Mikaela 被兩個身份不明的男人用力拉開，二人打扮整齊，但不說任何話，當牛導演問二人是否警察時，只是搖頭否認。
Mikaela 坐在石凳上低頭哭泣，工作人員在旁安慰幫助她平伏情緒，Mikaela 還是不時失聲大叫：「泰仔！」校內名叫泰仔的同學都聞聲趕去後園，希望Mikaela 正在呼喚自己，但都被工作人員勸走。
兩名身份不明的人向Mikaela 和Zoe 做出躬身邀請的動作，牛導演已意會到是誰人的邀請，通知職員收隊，向細文啪了一下響指：「今日拍攝到此為止，你去操場休息一陣先離校，我要帶兩個女仔去見幕後老細。」然後帶著Mikaela 和Zoe 前往學校大門。
眾人到了學校大門外，女大狀正在等候，Mikaela：「今日我無叫妳嚟。」女大狀：「小姐，妳要跟我去警署，係關於泰仔嘅case.」Mikaela聞言不再多說，僅是點頭示意，然後指了指Zoe：「唔好告呢個細路女住，我依家同佢合作緊。」女大狀：「佢都好本事，讀中一就搵到張長期飯票幫佢找數，adjourned啦。」眾人邊說邊登上私家車，各自行程。
細文留低在學校操場等候眾人離去，細想著剛才入戲的情形，他發現自己說出一些不屬於自己的事情：他本人信佛，只去過佛寺，不曾去聖堂，他不認識外國人，更不喜歡布公仔。這些事物都不曾在他生活中出現過。
這時操場上有幾個名叫泰仔的同學前來包圍著細文，要細文講解關於Mikaela 大叫泰仔的原因，細文匆忙解釋是Mikaela 有一個叫泰仔的情人已經去世，她正在尋找替身，自己剛才當了泰仔二號。
幾位泰仔聽後立即春心蕩漾，認為自己最有資格當下一個替身，並互相猜拳去決定當替身的次序：三號、四號、五號直至十二號，細文就在眾人爭論之際放學離開校園，而中一上學期的拍攝工作就在一片胡鬧之中結束。