追求演藝的Mikaela: 21
聖誕崇拜日，星期二。
今天並不是正式上課日，而是用崇拜感恩來結束上學期，經過洗腦式的唱聖詩、祈禱、全體老師分享、學生代表分享、再唱聖詩然後祈禱，全程近三小時，大約剩下半小時給學生開聖誕派對細，細文在派對期間忙著吃菠蘿腸仔，阿ken落力追問關於細文如何成為泰仔的事，還即場在伏在地上做掌上壓表示自己很夠資格去成為下一個泰仔，細文表示Mikaela 沒這個要求，但阿ken說女人都喜歡男人做掌上壓，還叫細文即場跟他一起做掌上壓，大家都似懂非懂，嬉笑一輪後細文說：「做住咁多先啦。」然後繼續談天說地。
Zoe和何文田坐在課室角落，二人只是輕聲說話，沒有跟班上其他人一起玩樂，細文走去問Zoe：「今日慶祝聖誕，妳哋兩個唔一齊慶祝下？」何文田不屑回答，轉過臉不看細文，Zoe跟細文說：「今日下晝我哋要去觀塘拍片，然後過澳門。」然後指了指地上的紫紅色行李箱，上面有張貼著hello kitty 的大頭貼紙，再問細文：「學校去觀塘點樣搭車？」細文：「搭38號啦，放學唔好走過對面線，行斜路落去。」Zoe：「唔該晒你，恭喜晒妳，搵到個有錢女做女朋友。」細文：「佢殺咗人㗎，而且佢只係當我係二號。」Zoe：「唔使理佢有無殺人啦，佢請咗律師幫佢就得，總之我恭喜你啦。」細文：「咁我都恭喜妳同何文田一齊。」何文田斜眼望著線細文：「你行開啦，嘈住晒！」細文指了指Zoe：「你對佢好啲啦。」之後就回到大夥兒之中，何文田問Zoe：「其實你哋係唔係兩兄妹？」Zoe：「唔知，我都唔識分。」何文田聽罷就沒有再問下去。
派對的時間不長，大家收拾好課室的桌椅之後放學，聖誕假期正式開始，學生門都爭相湧出校園，情況跟逃亡差不多，Zoe 在前往九龍方向的巴士站前，不忘向細文說：「以後見到個有錢女，唔好喺佢面前提起佢殺咗人嘅事，我怕佢會殺埋你。」細文答應之餘亦問Zoe:「妳今日會見到佢嗎？」Zoe：「我依家就去搵佢會合。」何文田在旁一直催促，Zoe再不多說，跟細文互相祝賀聖誕快樂之後便步往巴士站。
細文亦準備離開，向著葵涌方向的巴士站走去，他突然被兩個打扮整齊，同樣是一言不發的人強壓著肩膀，被帶回學校大門附近，有一個身材不高的男人問細文：「頭先個女仔要去邊？」細文：「佢要去觀塘拍片。」男人：「你應該係同佢一齊拍片的，點解會係第二個陪住佢？」細文：「嗰個有錢仔來㗎，Zoe已應承咗同佢喺一齊。」男人：「你哋係咪互相恭喜對方？」細文聽到後打了個冷顫，因為這個男人知道他在課室中的說話，男人狡猾地看著細文：「到底你哋兩個係乜關係？」細文：「小學同學。」男人：「你哋上電視係情侶，就應該一直係情侶。」細文：「佢其實好任性，想做就做。」男人聽到後笑了笑，打眼色叫二人放開細文：「你返去先，我哋遲啲會再搵你。」細文也不多說話，轉身前往巴士站回家。
細文在葵涌方向的巴士回家，而Zoe 和何文田則在九龍方向的巴士站等巴士往觀塘，因為何文田家中的司機已開始放假二人才會這樣做法，大約過了十五分鐘，二人等候的38號巴士先到，細文隔著公路向二人揮手，Zoe臉露不悅背向細文，何文田催促她上巴士亦不理會，於是巴士開走，二人只好繼續等候，Zoe這個失誤的決定令到她和何文田日後有很大的麻煩。
到細文所等候的巴士到達，當他步上上層座位時，往Zoe和何文田所站的位置望過去，就看到了二人一連串麻煩的開端，剛才向細文問話的男人向步近Zoe，二人一番對答之後，男人動手打了Zoe一巴掌，何文田想上前阻止，但就被男人的兩名助手壓著肩膀動彈不得。
細文乘搭的巴士緩緩離站開出，只見對面馬路有一輛警車正在為一輛豪華房車開路，似是護送著重要人物，警車見到路邊有人發生爭執率先停下，而豪華車輛的車門打開並有人步出，這時細文乘搭的巴士已開始遠離，心中所有的疑問要等假期過後再回校問二人。
從平安夜到boxing day，細文都在元朗渡過，除了元朗大馬路有聖誕燈飾外，其他地方還是一片農村景像，水牛和黃牛還是如常在菜田上耕作，農民的假期都在農曆年，所以區內聖誕氣氛並不濃厚。
回到葵涌家中，細文就開始溫習課本應付下個星期開始，為期約兩週的上學期考試，當然溫習之餘襯冬日陽光充沛，細文還是會到樓下的球場和同學們玩足球籃球。
西曆年除夕前兩天，星期二。
細文在下午約一時來到球場，球場上居然空無一人，細文已約好的同班同學也沒有依約出現，細文獨自射籃解悶時，阿ken和他的堂兄隆哥來到球場找細文，阿ken 手上拿著一本playboy雜誌遞給細文：「唔好淨係掛住睇龍虎豹啲泰妹啦，睇返幾頁鬼妹先啦。」細文首次拿起playboy，只覺得自己的品味突提升了層次，這本雜誌為他沉悶的溫習日子帶來了新的刺激。
阿ken和細文寒喧一番後收回playboy，隆哥隨即問細文：「個女仔去咗邊？」細文：「上星期放學嗰日佢話去觀塘搵埋個有錢女拍片，放假期間都無晒消息。」阿ken:「佢又講大話，我哋收到風佢同何文田喺黃大仙落車，再轉的士去啟德機場。」然後望了望身邊的隆哥：「佢俾咗麻煩我阿哥。」隆哥：「班㗎佬成個聖誕假期都包場，一定要Zoe阿媽交個女出來，佢哋雖然有俾錢，但我個場都要招呼人客。」阿ken：「我哋約咗Zoe媽上來，準備報警。」細文：「佢哋唔係搬咗入屯門咩，做乜會喺呢度報案？」這時Zoe媽媽己趕到：「未交屋㗎。」細文跟Zoe媽簡單講出當日放學後Zoe要前往觀塘後，Zoe媽就步向邨中第五座的報案室報警。而細文和阿ken則在外面等，至於隆哥因身份問題留在轉角位置的長椅上和等候消息的突發記者們閒聊。
Zoe媽媽在報案室向當值警員說自己女兒在聖誕節前已下落不明，警員正在登記事項期間，報案室的電話響起，警員接聽後將電話遞給Zoe媽媽：「太太，有線路搭通咗，妳聽下呢個係唔係妳個女？」Zoe媽媽接過了電話，確認聲音是自己的女兒，Zoe在電話傳來聲音：「阿媽，我同何文田去咗數星星，呢度啲星星好多好靚，仲有好多綿羊。」Zoe媽：「阿女，又猩猩又綿羊，妳係唔係去咗荔園，猩猩有乜好睇，仲要好靚？」阿ken 和細文在門外開始討論著Zoe是否真的喜歡猩猩，還是喜歡聽猩猩叫。
Zoe在電話中繼續：「唔係呀，我同何文田由啟德飛咗去雪梨，再轉飛機去威靈頓，呢度好似叫紐西蘭。」Zoe媽向著電話大叫：「死女包，粒聲唔出跟男人走，好快啲同的返來！」電話中傳來何文田的聲音：「auntie，我哋依家好安全，倒數埋除夕就會返香港。」Zoe媽怒叫：「你好即刻帶我個女返來！」說罷重重把電話拍在木桌上。
當值的警員把電話收好，跟Zoe 媽說：「有大人物出手，所以立即搵到妳個女，除非佢飛出外太空啦，妳個女上過電視真係零舍不同。」Zoe媽再問大人物的名，警告員只說無可奉告。
Zoe媽步出報案室，向在場等候的突發記者講述事件後，隆哥和阿ken就帶著Zoe媽，前往尖東準備開工，隆哥邊行邊跟Zoe媽說：「唔好輸俾妳個女，快啲搵返個大客跟咗佢。」三人登上私家車後就離開，而細文亦回到球場，這時已多了幾個同學到場，大家高興地開波。