追求演藝的Mikaela: 22
除夕的前一天，星期二。
天色陰暗略帶寒冷，細文特意早起往樓下的熟食檔吃早餐，吃飽回家之途經球場，這時先前在學校門口向他問話，後來掌摑了Zoe一巴掌的男人在球場附近的行人通道跟他打招呼：「早晨。」細文亦說了一句早晨作回應，男人示意細文走近，細文知道事情跟Zoe 有關，於是上前了解。
男人先自我介紹：「我姓本田，你叫我所長啦，我喺日本有一間藝人事務所，有十二個簽約藝人。」細文：「你廣東話好流利。」所長：「多謝。」然後進入話題：「細文，你欺騙咗我同社長，個女仔當日唔係去拍電影，佢係同新伴侶搭車去啟德機場，去咗外國。」細文表示歉意：「其實我都係受佢欺騙，我自小學認識Zoe開始都知道佢鐘意講大話。」本田：「你答覆別人之前應該要確定先至得，否則就係欺騙咗別人。」細文：「你係唔係導演所講嗰位幕後老闆？」本田搖頭：「我只係一個小職員，社長先至係。」細文：「你當日打咗Zoe一巴掌，係懲罰佢欺騙你？」本田搖頭：「係懲罰佢無禮，我問佢點解要轉換伴侶，佢居然回答話呢啲係自由，所以我先要教訓佢，我事務所嘅藝人，幾時拍拖，同邊個拍拖，都要得我同意。」細文聽後睜大雙眼，說不出話來，本田繼續：「欺騙就要受罰，你返學嘅時候就知道。」細文一臉尷尬地笑著，本田：「聽講你有個新女伴，身形好高。」邊說邊用手比劃，細文：「嗰個有錢女，佢有向記者提起我係佢男朋友，不過我只係喺學校見過幾次面。」本田搖頭：「見面幾多次無關係的，總之佢係你女朋友，不過我哋收到消息，佢其實都係做舞女的。」細文：「佢讀名校又係有錢女，點解要去夜總會返工？」本田：「係為咗搵更多嘅錢。」細文：「學校有人知道佢喺夜總會叫lily，不過導演就話lily其實已經葬喺赤柱墳場。」本田：「夜總會女仔都識變身，只要客人出得起價錢，佢就可以變成任何人。」邊說邊做出超人變身的動作，細文覺得有趣，十分高興地笑著。
本田臉色一沉向細文說：「你不如同原本嗰個走返埋一齊，因為車上面嗰位大人物唔可以得罪，既然你哋喺電視上係情侶，就應該一直都係情侶。」細文：「Zoe佢家庭好貧困，何文田又有咁多錢，佢一定唔肯放手㗎。」本田：「如果個女仔唔走返去妳身邊，就等於承認自己係妓女，客人只要有錢就可以帶佢走，佢嘅命運一定唔好。」細文：「佢上電視嘅時侯隨口講我係佢初戀，不過依家想改口都難，我其實識得佢初戀男友，佢初戀男友睇完電視節目之後都好傷心，不過依家都有新女朋友啦。」本田：「原來係咁，睇來個女仔會為金錢做任何事。」細文：「我都覺得係啦。」本田：「你同返原本個女仔一齊比較好，因為睇過節目片段嘅人都已經知道妳哋係情侶，至於身形材高大嗰位小姐，我同鄉會直接搵佢，會請佢去日本發展，我當你應承咗我哋。」細文知道拒絕無用，也只能笑著點頭，跟本田說再見後，逕自返回家中溫習。
到了下午約二時，細文又到球場踢波，見到文文和Cindy都站在附近的行人通道向他招手：「細佬，過來啦！」兩人的打扮都是濃妝艷抹，路過的居民都向她倆指指點點，評頭品足。細文走近二人：「姐姐，妳哋唔使準備考淘汰試咩,再過十日左右就要考啦。」文文搖頭：「細佬，我哋唔考試㗎啦，Cindy 同我都喺舞廳開工。」細文：「妳哋下學期唔返學㗎啦？」Cindy:「仲返乜學丫，搵錢啦。」這時文文拿出一部黑色的手提電話,電話上的液晶螢幕顯示著「ANALOG」字樣，文文：「我依家打電話搵個𡃁妹，有乜嘢講清楚佢。」細文：「妳都搵到佢哋外國電話？」文文：「有個神秘男人放低張字條同呢部電話喺我舞廳，叫我哋搵佢講關於你呢件事。」細文這時聯想到這種做法是和當日房車上的大人物有關，但不敢跟文文姐姐提起。
文文用手提電話致電Zoe：「喂，𡃁妹，做緊乜？」Zoe：「妳係邊個，我依家執緊行李，同我阿媽講聲我好快返嚟。」文文：「我係細文個契姊，妳係咪佢初戀女友先？」Zoe：「我無話過佢係我初戀。」文文：「嘩，妳喺電視節目入面講我細佬就係妳初戀，妳想呃人？」Zoe：「電視講唔算數，無人會信。」細文跟文文說：「佢本身喺小學就有個初戀男友，一齊上過電視，不過入唔同我哋一間學校。」文文以眼色示意知道：「喂，𡃁妹，聽講妳本身小學就有個男朋友，一齊上過兒童節目，妳到底有幾多個初戀？」Zoe驚諤：「妳點知㗎？」文文：「大家同一間小學，有乜會唔知，妳利用咗我細佬，引到個有錢仔出錢搶妳走，係咪？」Zoe：「細文佢嗰晚睇唔到電視，唔知我係佢初戀，何文田即刻追我話會俾到好多錢我，咁我咪應承佢囉。」文文：「細佬掛住溫書無睇電視啫，妳咁就移情別戀？妳都算無良心啦。」Zoe：「係鬼，佢屋企部西門子電視壞咗幾個月都無錢換，星期六日又要入元朗開工，阿媽同我講話呢種人無前途呀，咪跟個有錢囉。」文文：「原來係妳阿媽叫嘅，唔怪之得啦，我細佬喺度，妳同佢講兩句。」文文把電話交給細文，細文：「妳講我係妳初戀我好開心，不過妳小學本身有個初戀，佢睇到電視之後就無再同我打招呼啦。」Zoe：「嗰個，由佢算啦，佢升上間中學仲差過我哋嗰間，讀完出來都係無前途，我已經用擦紙膠擦走佢，唔記得咗佢㗎啦。」細文：「咁妳會唔會唔記得我㗎？」Zoe：「你呀，妳其實好好丫，你將來搵錢多過何文田，我咪做返你個初戀囉。」文文和Cindy 在旁互相對望，低聲說：「學下嘢先。」細文轉個話題：「Zoe，妳去外國玩得開唔開心呀？」Zoe:「唔使扮嘢啦，係你叫個男人走落嚟搵我，累我俾佢打咗一巴，仲喺對面馬路扮晒嘢揮手送行，等我拎轉背無上巴士。」細文：「電視劇啲男主角係咁㗎，分咗手都要祝福對方。」文文和Cindy在旁私語：「細文佢幼稚園開始就睇日劇，吸晒入腦。」Zoe：「我同打我一巴嗰個男人講，同邊個一齊係我嘅自由，車上面個男人聽到好嬲，佢無落車，有一個叫王校長嘅人落車問我係唔係舞女，又問我哋校長叫咩名，佢返上車前同我講咗句：返學妳就知。」細文：「過兩日都開始考試啦，妳都好快會知校長點樣罰妳。」Zoe：「何文田本來喺呢度報咗學校，準備叫我留喺度同佢一齊開學，不過佢收到電話，屋企間公司出咗問題，所以先趕返來香港，我要執行李啦，返學見啦。」 掛斷電話前，還在電話邊大喊：「老公！老公！」
文文：「細佬，你俾人利用咗啦，我哋都無佢咁識做舞女，我試下同你追返筆分手費啦。」細文：「妳叫佢賠佢都係問個有錢仔攞，到時都係麻煩啦，唔好啦。」 文文 ：「總之包喺我哋身上啦。」文文這時從膠袋中拿出了布公仔伯特：「嗱，送個布公仔俾你，你俾心機學下點做泰仔啦。」細文：「姐姐，個有錢女其實係殺咗泰仔，請緊律師打官司㗎。」文文：「我知丫，我同你一齊喺和宜合道泳池門口見到佢有幾個大狀傍住佢上警車，大聲喝住差佬唔好撞親佢，我收到風佢請一次大狀要幾多錢，你又知唔知？」細文隨意估計：「一萬。」文文：「嗰日有個細狀在場，佢就收一萬當幫朋友。」細文：「咁大狀呢？」文文：「嗰日見到其中一個大狀，直頭喺大學做教授，佢哋所有律師費加埋，夠我哋喺旺角買一層舊樓，又或者買一間新居屋包埋全屋裝修電器。」細文：「佢入我哋學校就搵律師擋住差人，殺咗人又係搵律師擋住差人，有錢人係唔係大晒，請得起律師就做乜都得？」文文：「細佬，自由要用錢買㗎，所以你要聽話，以後個有錢女叫你做正太就正太，泰仔就泰仔。」
文文從膠袋中拿出一盒錄影帶，片名是著名西片「美國舞男」，文文指著錄影帶封面上的主角：「嗱，細佬，你當你自己係佢，千祈唔好激嬲個有錢女，唔怕話埋你知，嗰個泰仔窮極都係住私家樓，你住呢度屋邨條命低佢幾級呀，泰仔俾人殺，有個叫王校長嘅人幫佢報警，你俾人殺，你估我哋校長會唔會幫你報警？」細文搖頭：「唔會，只會無聲消失。」文文：「你明就好啦，其實我真係唔好得你幾多。」一時感觸落淚。這時在對面馬路的記者在大喊：「喂姐姐仔，妳哋咁樣係販賣人口，犯法㗎。」文文回應：「唔關你事呀。」文文繼續說：「仲有呀，我哋講咗大話，同個有錢女講話帶咗你去日本整容，所以你先咁似泰仔，佢問手術費用咗幾多錢，然後就全數補返俾我哋。」細文：「姐姐，妳呃人唔好㗎。」文文：「女人講大話好閒啫，是但啦，總之有錢就得。」對面馬路的記者：「仲唔係販賣人口？」文文開始和記者隔著馬路對罵。
有一名穿著褐色制服的印度人走近細文，用極重口音的英語向細文打招呼：「Good afternoon!」細文也回應了一句，就像平時上課向老師問好：「Good Afternoon， sir。」印度男人舉起姆指稱讚：「good boy!」，男人個子不高，身型略胖，手拿著一個黑色文件夾，男人打開文件夾再看看細文對照，文件內容以英文寫成，細文看到 「Bombay」、「Police Station」等字眼，文件上有一張Mikaela 與泰仔的黑白合照，驟眼之下細文也以為那照片是自己和Mikaela的合照。
男人滿意地點點頭，在文件上做了一個剔號的手勢然後把文件夾合上，向在場的記者表示以後若Mikaela 到了印度境內將不會被警察拘捕，因為受害人還在生。記者追問事件詳情，並找來邨內印度人幫忙翻譯，穿著褐色制服的男人是來自印度孟買的警察，而且是警察局長。