是咁的，我同個 YouTuber 瘋狂做愛 | 《愛的紀錄》: 93

靜看了一會兒景色，曉晴忽然問我：「你知唔知呢到如果潮退嘅話就會有條石路出現，然後可以行過去長索島？」

「幾時會潮退？」我還是第一次聽過這個現象。不過看看前方，確實有一條若隱若現的短短石路藏在水面之下。

「好浮動，好似話冇一個確實嘅時間。」曉晴查看網上的資料後說。

「你想過去睇睇？」

「冇呀……我純粹好奇行咗過去之後會係點嘅樣。」曉晴說。





我想了想，看著眼前平靜的長索島：「都係嘅，宜家我哋剩係離遠見到佢嘅一部分。」

「唔緊要啦，呢啲都好睇緣分。」曉晴從容地笑著，然後再在四周用相機留影。

曉晴拍照的時候總是專心一意，幾乎不太會說話。如果要說的話，她可能只是和景色在說話，以旁人無法竊聽的方式互相分享光影之中的秘密。而我會靜靜在曉晴身邊陪伴和凝望著她的身影，既不打擾也不想打擾她，只因那也是我眼中的美景。

而我不敢想象的是，我可以佔有眼前的美景。