【重甜】叔叔的那些年: 第一章 中學同學Farewell聚會 第一節

件事發生响2007年，唔經唔覺都已經拉近20年前嘅事，想番起最初係一個電話開始。果日開開下工收到一個好少聯絡嘅中學女同學嘅電話，佢花名叫鯨魚
我：喂！鯨魚，咁好死打俾我重咩，係咪有好野益我？
鯨魚：你條友一開聲就想攞我著數，你估重係以前讀書果時咩？成日講埋D衰野…
我：妳諗左去邊呀？上次見妳已經係兩年幾前，就係妳結婚果次，畢業之後妳都好少搵我，上次一搵我就話結婚要我做人情，而家咁突然收到妳電話咪以為妳生左BB請我飲滿月酒囉，唔係妳以為我講咩？定係妳間唔中諗番起我地中學果時D開心野，心郁郁掛我嗎？
(我同鯨魚中三果時開始左一段關係，我地無拍拖唔係男女朋友，但係就做哂所有男女朋友會做嘅事，就係除左拍拖之外，我同佢keep左呢段關係接近兩年，之後佢有男朋友就慢慢終止左我同佢呢段關係，我同佢嘅事諗番起都幾回味架，有機會再講。)
鯨魚：掛你個死人頭呀！係關於我個閏蜜即係你追唔到果個呀，佢就快移民啦，佢想約番中學果時玩得埋果幾個同學出黎食飯見面同farewell，睇下你得唔得閒出黎？
我：妳話慧兒要移民？邊一日？我要睇下先喎，唔能夠即刻覆妳，我驚老婆唔放人呀！
鯨魚：係呀！佢同老公移民去多倫多，佢老公D屋企人响果邊喎，至於邊一日未定好，應該係下個月，邊一日我要夾埋其他同學先，預早打俾你睇下你會唔會唔想見佢姐，如果你無問題嘅話可以帶埋老婆同個細路黎，因為預計會响我屋企烤野食或者煮D野一齊食，志在見面聚下傾下計囉。
我：我ok架，同佢又無咩野，妳定好邊日再話我知啦！
鯨魚：你話ok就好啦！因為唔知點解佢話好想見你喎，我結婚果時佢幫我做伴娘忙到死，佢同我講見到你果時又無時間同到你傾計，佢話如果呢次見唔到可能無咩機會再見。咁我定好日子再通知你啦！重有呀！你唔好再叫我鯨魚好嘛！叫番我做阿琼，麻煩哂！Bye！


 
一個禮拜之後鯨魚就打俾我，話我知定左月尾即係6月30號，我心諗” 仆街啦！個女間學校有個咩三日兩夜畢業親子營，頂！撞到正一正。” 不過我果時又好firm同佢講” 無問題！” 因為我最怕去果D家長會乜乜學校座談會之類，對住果班人妻雖然有好幾個都好索下，但係佢地一開聲句句有骨又尖酸刻薄、白鴿眼…我真係頂唔緊；再加上我係做銷售，理論上星期六、日再加一日紅日係攞唔到假，但係今次我就同我阿頭講自加target先俾我sell掂佢攞到三日假，而且我重未同老婆講，所以我至咁快應承。
到咗果日一朝早我就送老婆同個女返學校，跟住我就扮返工返咗屋企沖個涼換件衫，到下晝就去鯨魚屋企。
鯨魚係响政府度做高級文職，而佢老公就係响私家醫院做麻醉師，佢地兩個好搵到錢，重响西貢買左間有個小花園嘅獨立屋二人世界。