萬金油與孺子牛（第二季）見山無底: 10
由救護車到轉去私家醫院，整個過程Kerry一直在我身邊，但我們一句對話也沒有。她靜靜看着我，似乎在沉思，而我有時也偷偷看着她。直至我順利上到私人病房，她終於緩緩開口。
「我係大學嘅時候識到TY，當時佢係香港已經係好厲害嘅生意人。其實我同佢嘅關係，係好似你同Donald咁，但係佢嘅能力同深度，唔係我哋諗嘅咁簡單，唔好諗住捉摸到佢……」她望了我一眼，歎了一口氣，忽然問我一個問題：「上次你講起Roger，今日…你又講起Rachel。你…係咪好多問題想問我？」
我笑了，其實現在問，還有意義嗎？她也不過是覺得我不在她的掌控之內，想用這個方法重新掌握我罷了。
「呢個問題，你應該問返自己。只有你最清楚，你佈呢個局嘅原因。要我問你，有意義咩？」她聽到這句的反應，似乎完全超出她預計。
因為我的反應，將我們這個對弈的主導權移回到我手上。我看見她偷偷握緊拳頭、五官焦急的一瞬、俾我反制的驚愕。
我沒有放過她，打量她一下：「你展示呢啲情緒俾我睇，係想同我講啲咩？做啲疑似緊張我嘅反應，令到我乖乖咁，行你想行嗰步？」
她聽到我說這句似乎更錯愕、更憤怒、更焦急地望向我，卻沒有反駁我。
「林泳昕，有冇諗過你做咁多嘢，你喺度掩飾緊啲乜嘢？」我烘近她，她慌了，是我第一次見到她慌張。
如果她慌張、想掩飾，證明那件事是她無法解釋給我。
「Michael你有冇事呀？嚇死我啦，我頭先見完客即刻趕過嚟…」
此時，緊張的Flora跑了進來，才看到坐在我身邊的Kerry。
「少事啫，你去做野啦，唔使理我。」我安慰Flora。
「係囉Flora姐，雖然Michael係董事，但博聯嘅野都係你主力負責。佢入咗醫院你唔使咁緊張，唔會影響到博聯運作。」Kerry這個充滿攻擊性的樣子，也不似她性格。
Flora彷彿莫名其妙被Kerry放了場火燒到她身，雖然表情平靜，但我在空氣中感受到火場那種閃燃。
「Michael唔止係我老細，仲係我朋友，我關心佢係好應該。其實Michael係一個對人好好、又暖男、令人覺得相處好舒服嘅人，喺我嘅角度，佢既然可以做到好老細、好嘅朋友，感情上佢一樣做得到。如果佢嘅對手係一種好逼迫嘅人，我自己覺得，先至會令Michael嘅情緒大上大落，影響到身體。」
大鑊了，Flora雖然是看不過眼想幫我出頭，但她和Kerry之間的銳利眼神，似乎越來越凶狠。
「Flora姐咁直接，咁我都直接啲，其實我同Michael已經訂咗婚，我哋有個仔架喇。感情上嘅嘢，我比你更清楚。佢嘅身體，我都好清楚。」我從來未見過這麼凶狠的林泳昕，Flora似乎也被嚇一嚇。
「啊，仲有，你上次講嘅意大利牌子，我建議你都係換過隻。成日都甩色，整污糟啲衫，洗起上嚟都唔係幾方便…」聽到這句，我真的後頸發涼，很想躲入被窩中逃避。
「Michael，我遲啲再嚟睇你。我諗今日你未婚妻因為太擔心你所以心情唔係幾好…我返公司先。」Flora還是這麼大方得體，這樣真的顯得Kerry很失控。
Flora走了，我嘆了一口氣：「而家得我哋兩個，林泳昕，你唔使特登做場戲。」
「我做戲？」她很激動。忽然她將我桌上的關於博聯的對策手稿撕碎，拿起我盛了水的水杯往門外大力扔，把外面路過的人和護士嚇得目光望了進來。
她深呼吸一口，對我說：「唔好意思，我太擔心你，所以心情唔好。我自己返去消化吓。」她拿了張紙巾拭走身上濺到的一點水，匆匆離開了。
他們都走了，我去了同一醫院、Donald的病房，卻見到一個人。
「Michael？」「Michael，估唔到咁快又見到你…」
「TY。」TY居然帶來了花和水果，還在給Donald切蘋果。
「你又入咗院啊？」Donald看到我的手帶。
「今朝同你開會嘅時候，見你中氣仲幾好。冇嘢吖嘛？」TY說。
「小事。」我看到這個恐怖的男人，心頭不由自主地緊了緊。
「佢頭先見完你呢？唔怪得頭先Kerry突然嬲爆爆咁走入嚟，跟住見到TY，講唔夠兩句，佢又走咗。」Donald說。
「睇嚟我阻住佢，向你投訴Michael喎…」TY對Donald這句明明很幽默，但我聽到有點後頸發涼。
只不過，Donald和TY… 居然可以這樣聊天？但TY不是回來拿回「屬於自己的東西」嗎？
「其實Kerry一啲都唔複雜，係你有冇用心去睇佢啫……」TY遞了一片蘋果給我：「蘋果對身體好，Michael？」
「多謝TY。」我咬著蘋果，消化着龐大的資訊量。這句對Kerry的評價，出自Kerry的「Donald」，可信度必定是史詩級。但，為什麼？為什麼要這樣說？為什麼要告訴我？
「Michael，食多啲啦！唔好郁啲就咁激動～你仲後生，點可以成日入醫院㗎？」Donald讓我多吃一點切好的水果，又對TY說：「你買嘅生果真係靚、又新鮮又甜！TY~你真係好識揀～」
「佢呢批靚啫…」TY拿了另一個外面看很不錯的蘋果，結果一切開居然爛了。
「個樣好靚架喎…」Donald拿了半邊去看，發現蘋果招紙貼着的位置原來已經有潰爛：「俾佢呃咗啦你！D商家佬，為咗賣得出，成日都係咁，將啲靚嘅同埋爛嘅放埋一齊。一有包裝嘅野，九成都係掩飾呢啲位架啦～」
「咁佢地係要特登用啲包裝同貼紙去遮住，確實係難睇啲嘅。而家我哋開咗出嚟，－切，咪知囉～」TY笑一笑。但為什麼…他們看似在討論生果，但我覺得他們又並非真的討論生果。
「Michael～ 食橙啦！」「開多個蘋果？」「你切上癮咩TY？」「哈哈哈…你咁幽默～睇黎好快可以出院…」……