「三十分鐘的一人之境」: 第六章

過去哩幾個星期, 沉溺既情傷當中, 我真係好需要有D新衝擊,

令自已既生活重新回到正軌,

剛剛做滿一年, 之前努力儲落去澳洲既旅費, 

而家大概可以計劃一下用作其他用途, 強哥又加左我千五蚊人工,

咦...好似可以考慮下買返架萬零蚊既舊車過下車主癮喎,





大概本來唔係Garcie去澳洲, 我早就許下願望,

返工儲錢, 買人生第一架車用尼同Garcie拍拖車出車入,

甘心做隻台灣人口中既馬子狗,

雖然本來打算既一半用途, 已經再無咁既需要,

至多養唔掂咪劏左佢囉, 叫曾經擁有丫嘛.





一於就打開一本便利, 睇下有無D萬零蚊車仔先.

93年豐田歌露娜AE100白色絲絨櫈自動波天窗一見即合售萬二

94本田EG細踢灰色棍波十六寸合金軨皮座車況佳售萬五全原裝直版任驗

96年萬事得323千三自動電窗香檳色零字牌簿賣九仟

計一計數, 屋企樓下停車場八佰, 星期六日先用車, 
油錢六佰, 牌費燕梳保養平均一個月一仟, 




即係一個月三仟蚊左右, 慳慳地洗, 應該勉強夠用, 
人一世物一世, 死就死啦, 之後既事之後再諗.

約左兩三架車出尼睇, 一萬幾仟我都唔期望可以買到D咩好野架喇, 

但係又唔駛咁甩皮甩骨架?

第一架95年Suzuki辣椒仔, 一開車咯咯,咯咯,咯咯好似揸緊火車咁,

第二架大發仔Charade, 電窗壞既, 水撥唔著, 本身對個車款已經有D嫌棄...next

第三架93年三菱Lancer, 頂...連試車都水滾.  拜拜!

原來成年人既世界, 要達成咁卑微既小小人願, 都可以咁困難.





有時星期六悶悶地, 會落去荃灣間車房搵表哥吹下車經,

表哥唔係做車房, 不過佢好鍾意響唔駛陪佢女朋友果陣,

就響果間車房打躉吹車, 連帶就識埋班車房朋友, 

講下車經, 講下女仔, 講下天南地北, 

過時過節更會拖男帶女, 就響車房門口搭個燒烤爐BBQ.

就係咁橋, 車房有位熟客係一位退休教師,

剛巧就攞佢架思域過尼驗車,

仲一邊同老闆講, 年紀大喇, 驗左架車就一邊揸一邊賣左佢啦.





此時車房老闆向我一指, 同哩位退休教師講: 果位後生仔想搵哩D車喎! 

退休教師就轉頭過尼望住我講: 後生仔, 哩架舊車啱唔啱呀? 平D俾你丫!

見佢咁講, 我就認真睇下架車, 

架車過去幾年一直響哩間車房做保養,

應該有D信心保證,

95年黑色思域細Tec, 16吋原裝軨, 全車原裝, 層油仲keep得好閃閃擰,

唯一驚喜就係棍波, 同埋改裝潛力大, 





輕輕試探下車主心目中想賣既價錢,

佢諗左兩秒就開口: 兩萬蚊, 你意下如何?!

我就回答: 噢, 我筆直預萬五蚊左右咋, 兩萬我負擔唔到喇, 唔好意思!

車主聽到後, 思考左一陣又開口: 後生仔, 係咪有興趣先? 萬五就萬五啦!

有時做人既野, 真係睇際遇, 睇左幾架甩皮甩骨, 

而家又突然無心插柳就眼前出現一個機會,

其實我心裡面已經心急如焚準備過數落訂,

車主仲不停咁叮囑我, 好好照顧好架車,





馬上握手成交約定翌日去運輸處過戶.

交易當日, 我就攞左日大假, 迎接新拍檔,

急不及待, 運輸處都未開門, 

我就響門口排住隊等待賣家攞埋牌簿合約過尼辦手續,

終於禮成, 跟賣家握手道別,

轉身就飛奔落停車場攞車,

一行入停車場, 車就泊正響升降機大堂對面,

急步行埋去慢愎圍住架車行一圈,

原來賣家真係好有心, 

交車之前仲為架車打左一次蠟, 內櫳一塵不染,

馬上插匙著車, 一撻即著, 感覺非常精神,

仲有半缸油, 唔理喇, 直踩落黑布街換部仟伍蚊既 Kenwood車機先,

之後再揸車去深井食個晏先,

將架車泊好響路邊, 特意揀坐響茶記門口位, 

一邊食緊個豆腐火腩飯, 一邊好似痴漢後望住架車,

連有人行過架車, 行埋少少都精神緊張起來,

食完嘆埋杯凍啡, 打倒回府.

泊低左架車響屋企樓下停車場,

一邊行去電梯大堂, 行五步就回望一下, 

都數唔到究竟回望左幾多次,

返到屋企, 經歷一整晚既腎上線上升,

沖個熱水涼, 放下心頭大石就抱頭入睡,

一覺醒來原來已經係第二日清晨五點

相比平時早左一個鐘起身,

梳洗完畢, 換好晒衫, 早餐食完,

都仲有一個鐘先要出門返工,

哩一刻我個腦內交戰起來,

正所謂新屎坑三日香,

到底今日好唔好揸車呢?

左腦既天使提醒我: 買左車要慳D洗呀!

右腦既魔鬼比天使更多鬼主意: 

公司對面停車場三十五蚊日泊咋!

揸車返工可以遲半個鐘先出門口喎,

今日出面三十四度呀! 自已有車仲去同人迫巴士?!

腦內交戰左一個鐘, 我輸左俾魔鬼.

即刻著鞋飛奔落停車場向位新拍檔請安,

馬上跳上車, 撻匙, 一波, 鬆手制, 

終於可以帶住輕鬆既心情, 

真正享受一人駕駛樂.

日子一日一日咁過, 

哩兩年正經過沙士,

商廈中央冷氣系統維修清洗消毒需求巨大,

托賴老闆中左好多新標,

而老闆又待我地班伙計不薄,

隔幾個月中左標書, 

就直接加人工, 每次加一至二仟,

前後入職短短三年, 人工已經加了一倍到萬六,

養車壓力開始無咁大, 

而家仲可以容許自己每個星期五都揸車返工,

為左星期五放工, 就即刻可以一個人去遊下車河,

有時收工就直入東隧過海, 經柴灣入赤柱, 

食個頹飯, 停低架車響聖士堤反灣旁邊, 聽下歌望下海,

最後經淺水灣行返黃泥涌峽道落灣仔經紅隧返回平民世界.

但哩個已經係我消除寂寞既良方.