「三十分鐘的一人之境」: 第五章

公司上一年度生意都唔錯,

農曆年前意外地收到老闆強哥恩賜既兩個月花紅, 

加埋雙糧一共兩萬四,

之前考車牌果筆分期付款又仲有一個月就供完,

本來就想計劃下預訂好四月去Melbourne既機票,





想俾Garcie一個驚喜,

可惜事與願違, 從佢上次十二月既假期開始,

可能已經識左好多新朋友, 功課又忙,

每個星期六既電話約定裡面,

佢好似已經無最初時咁多野要跟我分享同抱怨,





而佢之後續漸變得每次都講佢同班新朋友既生活,

再之後，

電話裡面開始出現愈來愈長既沉默。

有時我講完一大輪，

佢只係輕輕應一句：





「哦。」

「係呀。」

「幾好呀。」

然後又靜落嚟。

甚至有兩三次，

佢話暫舍有活動，

或者第二日要交功課，

未夠十分鐘就匆匆收線。





感覺就好似, 電話既另一邊,

有另一條線等緊佢咁,

大家好似慢慢咁越行越遠,

最近佢開始連電話約定都話好忙無時間,

聖誕期間只係收到過佢既一張聖誕卡,

上面只係草草一句Merry X'mas,

冇近況。





冇思念。

冇期待。

感覺哩張, 

只係佢眾多既親朋戚友中, 

既其中一張.

於是我改為寫信寄俾佢, 

每日都寫一封,連續7日, 

隔左一個星期, 兩個星期, 三個星期,





都收唔到回信,

佢就好似響我既世界入面消失左咁, 

但我仍然係諗左好多理由為佢解釋點解咁耐都收唔到佢回信,

可能是澳洲郵差罷工, 

可能係寄船運時間要長D, 

可能係香港郵差送錯地址?!

一直等, 





一直等, 

到左暑假, 有一晚同IVE既舊同學踢波時, 

舊同學問: 點呀?! Garcie返左澳洲未呀?!

我果刻一頭霧水, 心裡諗佢究竟講緊D乜?!

當我準備開口問佢講乜之前,

佢已經講出: 早兩星期響海港城見到佢同Natalie行街, 我仲問點解唔見阿堯既?!佢答我你未放工丫嘛!

仲約好佢下次返尼先約埋食餐飯添!

果一刻我腦內麻痺左一秒, 唔知點回應,

於是掩飾自己對Garcie返左尼香港渡假既事一無所知,

我: 哦..哦..佢早兩日返左澳洲喇, 係囉係囉, 佢有同我講撞到你約好下次返尼先約食飯丫嘛!

內心一沉之下, 又要裝作震定叫: 唔好講喇, 下半場開波!

講完即時行入球場, 

但係我個心, 

我個腦已經完全飛出左球場,

坐上小巴後，

我一路望住窗外。

腦入面不停重播頭先果幾句說話。

「海港城。」

「Natalie。」

「阿堯未放工。」

原來佢返過嚟。

原來所有人都知道。

只有我唔知道。

可惜, 

我連問一句既渠道都無.

一個月後, 

終於響大廈信箱收到佢既回信,

佢仲係用緊佢最鐘意既Melody信紙,

但係內容就非我所願, 

係一封手分通知書, 

大概係佢響果邊, 

識到個新男仔, 

朝夕相對, 

日久生情,

叮囑我將佢忘記, 

努力搵另更好既對象,

信唔長。

但足夠將過去一年既等待，

一次過劃上句號。

無辦法。

無得上訴。

亦都無人可以追討。

我唯一可以做既，

就係照單全收。

我有考慮過不顧一切, 

飛去澳洲搵佢問過清楚,

但一諗到, 

佢之前返尼香港, 

大家近在咫尺佢都唔願意同我面對面講清楚,

咁我都係咪應該為大家留一點體面, 

就俾哩段脆弱既感情無疾而終算啦.

將封信摺返好。

再放入抽屜。

房間靜得只剩下風扇聲。

我坐左好耐。

但其實一句說話都諗唔到。

耳機裡忽然播到：

「你叫我最快樂，

你也叫我最心痛......」