萬金油與孺子牛（第三季）此中有真意: 24
保安的單位對單位可視像通話平板響起了，我走到電視旁邊拿起。
「梁生，唔好意思阻阻你。有位葉嘉儀小姐想搵你，你方唔方便接見佢？」
嗯……
很好。
Kerry聽到，有點緊張地望向我。
「比佢上黎。」
「知道梁生。」
Kerry睥向我。
我坐回她身邊，呷了一口茶：「佢都係想同我傾兩句啫。」
我望向她，她的眼神有點糾結。
嗯……
我看了看手錶，下午4時半。「今晚食唔食壽司？」我問她。
原本有點不滿的她，嘴角上揚。
「我揀下先…」她說著，同時迅速地將她的鞋、手袋，搬入我衣帽間，拿走我的粟米片和我的兩部私人手機，躲進我房間，鎖上了門。
哈哈哈……
我將她的茶杯放進廚房的鋅盤沖洗，剛清洗完，門鈴便響起。
「Flora，你搵我？」我開門，對她微笑。
她似乎有點着急：「對唔住呀TY。我知道你秘書話你身體唔好，休養緊，我本來唔應該騷擾你。但係…Kerry無啦啦清年假，Rachel、Michael、Ken冇一個聯絡到佢，我哋…真係好擔心佢……」
「唔緊要。入嚟坐。」我微笑。
Flora環顧四周，看見我放在鋅盤旁的第二隻茶杯。
我緩緩走過去把茶杯拿過來：「你上得嚟咁急，都冇咩招呼你。龍井岩唔岩？」我坐回沙發，為她斟了一杯，再補滿自己那一杯。
「唔該TY…」她帶點憂心和愧疚望向我：「真係唔好意思，打擾你……你身體有冇好少少啊？」
我輕鬆地笑一笑：「冇事，唔打攪。最近都係咁，少少痛。」
她眉頭皺了皺，呷了一口茶，又望向我，但欲言又止。
我知道，她想問的事。
「唔使咁擔心。Kerry係個好有分寸、好有事業心嘅人。恆博、同松山，我相信佢都會處理得好。」我微笑。
放在茶几上、但非常接近我這邊的Kerry工作電話，彈出了通知。Flora看見了。
嗯。
我自然地將電話收入褲袋，微笑，呷了一口茶。
Flora的眼神反應，比我計算中，更大，而且長時間。
嗯……
她恢復平靜，呷了一口茶，問我：「咁Kerry，有冇搵過你啊？」
我故意皺着眉，提起茶杯在空中停留多兩秒，望著茶杯。
「冇。」我再呷一口茶，望向她。
很好。
「你知唔知，佢喺你同佢求婚之後，同我求多咗一次婚？」她忽然說，還在望向我。
不應該是一個，告訴我的資訊……
而且Kerry…求了兩次……嗯……
她做的…比我計算的…多……
林泳昕……
而Flora她……
嗯……
「我去個洗手間先。」Flora說。
她失陪的時候，我望向她的茶杯，我知道我在皺眉。
我不知道，是否有足夠時間，陪你們計……
我去把蒸氣熨斗拿出來，走到鎖上的房門前，我剛才掛起門柄、Kerry送的西裝前，熨著。
Flora去完洗手間開門，看見我。
「皺咗？」她走近我問。
「係。諗住過兩日去同港澳辦食飯嘅時候着。」我提高並反轉西裝，故意讓Flora看見品牌。
Flora有一個閃過的反應。
「呢個品牌…」她說了一半。
「我著咗20年喇。」我微笑。
是我帶Kerry進入這個品牌貴賓客戶層，每件都是設計師度身訂造的不同主題、用料、剪裁，每個客戶，獨一無二。
Flora微笑，她目光停留多一秒在我上鎖的房間上。
嗯。
「咁睇黎，你身體有好啲喎？」
她故意的。
葉嘉儀……
我微笑，重新掛回西裝，用手勢邀請她返回沙發。
「Rachel比咗Mr Robinson嗰份文件比我地睇。Mr Robinson係全球最大天使投資公司BoA執行董事長，我地加入姜總嘅資金同早前嘅合併之後，只係內地第二投資公司。但係TY…」她認真望向我：「大越、山傲、加恆博，三大股東。如果加埋Mr Robinson，會唔會對松山資本……」
「Flora，你都係松山嘅董事。你點睇？」我呷了一口茶。
她有點疑惑，但又有點欣賞的目光望向我。
「松山資本係你心血…」她輕輕吐出這句。
我微笑。
「點解？…」她還是淡淡地問了。她望了一眼上鎖的門，又望向我。
「做生意，商業考慮向來都係第一位。Arthur有自己嘅盤算，亦可能係睇到你哋嘅能力。」我說。Arthur即是Mr Robinson。
她和我對望著。我知道，她知道。
「最近我諗返…第一次見到你嘅時候。」Flora呷了一口茶。
嗯？
「我係李氏岩岩做副經理嘅時候，你岩岩收購投資公司整合成立松山資本嘅時候。人脈同資金有缺乏，但你前後三年之內，搵大老闆投資、說服銀行融資、建立李老闆爹吔佢哋呢啲舊錢圈嘅信任同支持……」
她停頓了一下，欣賞、羨慕、認真地望向我，繼續說：「之後，你投資科技類、物流、原材料類嘅中小企、初創公司，嗰時根本冇人會投資。我果陣覺得，呢個男人係癲架。十年之後，智能手機時代開始咗，我知道，呢個男人唔係癲，係超級癲。因為佢嘅眼光，唔係三年、十年。」
她在讃我……
她再次望向上鎖的房門，望向我微笑說：「TY…以前我從來都冇諗過，可以咁諗，同你飲茶傾計。係因為林泳昕…」
她同樣在，以退為進……
她望了三次……
嗯……
「Rachel、Michael…就算係我，有啲野，都未必做到……」她站起來，拿起手袋走向門口：「唔阻你咁耐TY。我走先。我哋再傾…」
我開門送她：「Flora，我哋再傾。」
葉嘉儀，其實很強。
而且她……
或者……可以考慮…
嗯。